ଭୁବନେଶ୍ଵର, ୨୬/୦୪ : ଭୁଲିଗଲା ମାନବିକତା। ସ୍ତ୍ରୀ ଓ ଦୁଇ ପୁଅଙ୍କୁ ହାଣିଲା ନୃଶଂସ ସ୍ଵାମୀ। ଜଟଣୀ ଥାନା ଅନ୍ତର୍ଗତ ଗଜପତି ନଗର, ରେତଙ୍ଗ କଲୋନୀ ରୋଡ୍ରେ ଶୁକ୍ରବାର ରାତିରେ ଏଭଳି ଅଭାବନୀୟ ଘଟଣା ଘଟିଛି। ସ୍ଵାମୀର ଆକ୍ରମଣରେ ସ୍ତ୍ରୀ ଓ ଦୁଇ ପୁଅ ଗୁରୁତର ହୋଇଛନ୍ତି।
ସୂଚନାନୁଯାୟୀ, ଡେଲାଙ୍ଗ ଥାନା ପାଟଣାପୁର ଅଞ୍ଚଳର ଅନୁରାଧା ସାହୁ ୧୫ ବର୍ଷ ତଳେ ବାଲିପାଟଣା ଥାନା ବାଳକାଟୀ ଅଞ୍ଚଳର ଅମୁଲ୍ୟ ସାହୁକୁ ବିବାହ କରିଥିଲେ। ବିବାହ ଦିନଠାରୁ ଅମୁଲ୍ୟ ଯୌତୁକ ନିର୍ଯାତନା ଦେଇ ଆସୁଥିଲେ। ଶୁକ୍ରବାର ରାତିରେ ଅମୁଲ୍ୟ ଅନୁରାଧାଙ୍କ ନାଁରେ ଥିବା ଜମିକୁ ନିଜ ନାଁରେ କରିବା ପାଇଁ କହିଥିଲେ। ଅନୁରାଧା ରାଜି ନହେବାରୁ ଏକ ଧାରୁଆ ଅସ୍ତ୍ରରେ ଆକ୍ରମଣ କରିଥିଲେ। ଅନୁରାଧା ପାଟି କରିବାରୁ ଦୁଇ ପୁଅ ଦୌଡ଼ି ଆସିଥିଲେ। ଅମୁଲ୍ୟ ଦୁଇ ପୁଅଙ୍କୁ ମଧ୍ୟ ଆକ୍ରମଣ କରିଥିଲା। ଏହାପରେ ଘଟଣାସ୍ଥଳରୁ ଫେରାର୍ ହୋଇଯାଇଥିଲା। ଗୁରୁତର ଅବସ୍ଥାରେ ଦୁଇ ପୁଅ ଓ ମାକୁ ପ୍ରଥମେ ଜଟଣୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନିଆଯାଇଥିଲା। ପରେ ଭୁବନେଶ୍ୱର ଏମ୍ସକୁ ଚିକିତ୍ସା ପାଇଁ ପଠାଯାଇଥିଲା। ଏନେଇ ଅନୁରାଧାଙ୍କ ଭାଇ ଜଟଣୀ ଥାନାରେ ଅଭିଯୋଗ କରିଛନ୍ତି। ପୋଲିସ ଅମୁଲ୍ୟକୁ ଗିରଫ କରି ଅଧିକ ତଦନ୍ତ କରୁଥିବା ଜଣାପଡିଛି।
