ଭୁବନେଶ୍ୱର,୦୯/୦୫: ନବୀନ ତାଙ୍କ ନୂଆ ଟିମ୍ ଗଢ଼ିଦେଲେ । ରାଜନୈତିକ ବ୍ୟାପାର କମିଟି ସହ ରାଜ୍ୟସ୍ତରୀୟ ସାଂଗଠନିକ କମିଟି, ବିଭିନ୍ନ ସାମ୍ମୁଖ୍ୟ ଓ ସେଲ୍ ନେତା ବାଛି ସାରିଛନ୍ତି ବିଜେଡି ସଭାପତି ନବୀନ ପଟ୍ଟନାୟକ । ଏବେ ନଜର ବାକି ଥିବା ୯ ସାଂଗଠନିକ ଜିଲ୍ଲା ଓ ତିନି ଛାମୁଆ ସଂଗଠନ ନେତା କିଏ ହେବେ? ନବୀନଙ୍କ ଏହି ନିଷ୍ପତ୍ତି ଉପରେ ସଭିଙ୍କ ନଜର ଅଟକିଛି ।
ସବୁଠୁ ଅଧିକ ଚର୍ଚ୍ଚା ଯୁବ ବିଜେଡି ସଭାପତି ପଦକୁ ନେଇ । ବିଧାୟକ ଦେବୀ ରଞ୍ଜନ ତ୍ରିପାଠୀଙ୍କୁ ନବୀନ ତାଙ୍କ ରାଜ୍ୟସ୍ତରୀୟ କମିଟିରେ ସ୍ଥାନ ଦେଇନାହାନ୍ତି । ତେଣୁ ଦେବୀଙ୍କ ନାଁ ଏବେ ବି ଯୁବ ବିଜେଡି ସଭାପତି ଦୌଡ଼ରେ ଥିବା କୁହାଯାଉଛି । ଏହାବାଦ୍ ରାଜ୍ୟସଭା ସାଂସଦ ଶୁଭାଶିଷ ଖୁଣ୍ଟିଆ, ଯୁବ ନେତା ଚିନ୍ମୟ ସାହୁ, ଅମରେଶ ପତ୍ରୀଙ୍କ ନାଁ ମଧ୍ୟ ଚର୍ଚ୍ଚାରେ ଅଛି । ଯଦି ସଭାପତି ପଦ ନ ମିଳିବ, ଏହି ନେତାଙ୍କୁ ଭିତରୁ କେହି ଯୁବ ବ୍ୟାପାର ଉପଦେଷ୍ଟା ହୋଇପାରନ୍ତି ।
ବିଜୁ ଜନତା ଦଳର ମହିଳା ସଂଗଠନ ମୁଖିଆ ଦୌଡ଼ରେ ପୂର୍ବତନ ବିଧାୟିକା ଲତିକା ପ୍ରଧାନଙ୍କ ନାଁ ଆଗରେ ଥିବା କୁହାଯାଉଛି । ରାଜ୍ୟ କମିଟିରେ ସ୍ଥାନ ପାଇଥିବା ସ୍ନେହାଙ୍ଗିନୀ ଛୁରିଆ, ସାଂସଦ ସୁଲତା ଦେଓ, ବିଧାୟିକା ସୁବାସିନୀ ଜେନାଙ୍କ ନାମ ମଧ୍ୟ ଚର୍ଚ୍ଚାରେ ଅଛି । ଛାତ୍ର ବିଜେଡି ସଭାପତି ପାଇଁ ପୂର୍ବତନ ବିଧାୟକ ରୁଦ୍ର ମହାରଥୀ, ରାଜେଶ ରାଜ ସ୍ୱାଇଁ, ବିଶ୍ୱପ୍ରତାପ ସାହୁ, ପ୍ରଦୋଷ ପରିଡ଼ା, ହରିଶଙ୍କର ରାଉତ ପ୍ରମୁଖଙ୍କ ନାଁକୁ ନେଇ ଚର୍ଚ୍ଚା ବେଶି । ଖବର ମିଳୁଛି, ସପ୍ତାହକ ଭିତରେ ତିନି ଛାମୁଆ ସଂଗଠନ ସଭାପତିଙ୍କ ନାମ ଘୋଷଣା ହୋଇପାରେ ।
୯ ସାଂଗଠନିକ ଜିଲ୍ଲା ସଭାପତି ଘୋଷଣା ଉପରେ ବି ନଜର ଅଟକିଛି ସଭିଙ୍କର । ଜିଲ୍ଲାର ପ୍ରମୁଖ ନେତାମାନେ ରାଜ୍ୟ କମିଟି ଓ ସାମ୍ମୁଖ୍ୟରେ ବଡ଼ ଦାୟିତ୍ୱ ପାଇଛନ୍ତି । ତେଣୁ କଟକ ଜିଲ୍ଲା ସଭାପତି ପାଇଁ ପୂର୍ବତନ ମନ୍ତ୍ରୀ ତଥା କଟକ ସଦରର ପୂର୍ବତନ ବିଧାୟକ ଚନ୍ଦ୍ରସାରଥୀ ବେହେରାଙ୍କ ନାମ ଆଗରେ ଥିବା କୁହାଯାଉଛି । ସାଲେପୁର ବିଧାୟକ ପ୍ରଶାନ୍ତ ବେହେରା ମଧ୍ୟ ଅନ୍ୟତମ ଆଶାୟୀ ଅଛନ୍ତି ।
ସେହିପରି କେନ୍ଦ୍ରାପଡ଼ା ଜିଲ୍ଲା ସଭାପତି ପଦର ପ୍ରମୁଖ ଦାବିଦାର କୁହାଯାଉଥିବା ଅଂଶୁମାନ ମହାନ୍ତି ଓ ଧ୍ରୁବ ସାହୁଙ୍କ ଭଳି ଟାଣୁଆ ନେତାମାନେ ରାଜ୍ୟ କମିଟିରେ ସ୍ଥାନ ପାଇଛନ୍ତି । ଏବେ ଜିଲ୍ଲା ସଭାପତି ପାଇଁ କେନ୍ଦ୍ରାପଡ଼ା ମ୍ୟୁନିସିପାଲିଟି ଅଧ୍ୟକ୍ଷା ସରିତା ସାହୁଙ୍କ ସ୍ୱାମୀ ରଣଜିତ ସାହୁ, କାଳୀପ୍ରସାଦ ମିଶ୍ର, ଜିଲ୍ଲା ପରିଷଦ ସଭ୍ୟ ପ୍ରମୋଦ ରଥ, ଧୀରେନ କୁମାର ସାହୁଙ୍କ ନାମକୁ ନେଇ ଚର୍ଚ୍ଚା ଚାଲିଛି ।
ଖୋର୍ଦ୍ଧା ଜିଲ୍ଲା ପାଇଁ ବିଧାୟକ ପ୍ରଦୀପ ସାହୁ ଓ ପୂର୍ବତନ ବିଧାୟକ ରାଜେନ୍ଦ୍ର ସାହୁଙ୍କ ମଧ୍ୟରୁ କାହାରିକୁ ସଭାପତି ପଦ ମିଳିପାରେ। କଳାହାଣ୍ଡି ଜିଲ୍ଲା ସଭାପତି ପାଇଁ ପୂର୍ବତନ ମନ୍ତ୍ରୀ ପୁଷ୍ପେନ୍ଦ୍ର ସିଂହଦେଓଙ୍କ ସମ୍ଭାବନା ଅଧିକ ଥିବାବେଳେ କମିଟିରେ ସ୍ଥାନ ପାଇଥିବା ଦିବ୍ୟଶଙ୍କର ମିଶ୍ର ଏବେ ବି ଆଶାୟୀ ଥିବା କୁହାଯାଉଛି । କୋରାପୁଟରେ ବିଜେଡି ସଭାପତି ପଦ ପାଇଁ ପୂର୍ବତନ ସାଂସଦ ଝିନ ହିକକା, ପୂର୍ବତନ ବିଧାୟକ ପ୍ରୀତମ ପାଢ଼ୀ, ପୂର୍ବତନ ମନ୍ତ୍ରୀ ତଥା କୋଟପାଡ଼ର ପଦ୍ମିନୀ ଦିଆନ, ବୋରିଗୁମ୍ମାର ଜିଲ୍ଲା ପରିଷଦ ସଭ୍ୟ ପ୍ରସାଦ ବିନିକାଙ୍କ ନାମ ରେସରେ ଅଛି ।
ରାୟଗଡ଼ାରେ ବିଜେଡି ସଭାପତି ହେବାକୁ ପୂର୍ବତନ ସାଂସଦ ଏନ୍.ଭାସ୍କର ରାଓ ଓ ପୂର୍ବତନ ଜିଲ୍ଲା ସଭାପତି ସୁଧୀର ଦାସଙ୍କ ଭିତରେ ଟକ୍କର ରହିଛି । ଗଞ୍ଜାମ ଜିଲ୍ଲା ସଭାପତି ଦୌଡ଼ର ଅଧିକାଂଶ ପ୍ରମୁଖ ଦାବିଦାରମାନଙ୍କୁ ନବୀନ ତାଙ୍କ କମିଟିରେ ସ୍ଥାନ ଦେଇଛନ୍ତି । ଜିଲ୍ଲା ସଭାପତି ହେବାକୁ ପୂର୍ବତନ ବିଧାୟକ ବିକ୍ରମ ପଣ୍ଡାଙ୍କ ନାମ ଏବେ ସବୁଠାରୁ ଆଗରେ ରହିଛି । ଢେଙ୍କାନାଳ ଜିଲ୍ଲା ସଭାପତି ପାଇଁ ସସ୍ପେନ୍ସ ବଢ଼ିଛି । ସୁଧୀର ସାମଲଙ୍କୁ ବିଜେଡି କମିଟିରେ ସ୍ଥାନ ମିଳିଛି । ବୟାନବାଜି ପାଇଁ ଦଳରେ ବିବାଦୀୟ ହୋଇ ପଡ଼ିଥିବା ପ୍ରଫୁଲ୍ଲ ମଲ୍ଲିକ ଓ ନୃସିଂହ ସାହୁଙ୍କ ହାତରେ ଦଳ ଜିଲ୍ଲା ମଙ୍ଗ ଦେବ କି ନାହିଁ, ଠଉରାଇ ହେଉନି । ଏହାବାଦ୍ କାମାକ୍ଷାନଗର ଏନଏସି ଅଧ୍ୟକ୍ଷ ଧର୍ମାନନ୍ଦ ପରିଡ଼ା ବି ଅନ୍ୟତମ ଦାବିଦାର ବୋଲି କୁହାଯାଉଛି । ବାଲେଶ୍ୱରକୁ ନେଇ ରବୀନ୍ଦ୍ର ଜେନା ଓ ଜ୍ୟୋତି ପାଣିଗ୍ରାହୀଙ୍କ ଭିତରେ ଟଣାଓଟରା ଲାଗିଛି । ଦଳ ବାଲେଶ୍ୱରକୁ ଦୁଇଟି ସାଂଗଠନିକ ଜିଲ୍ଲାରେ ଭାଗ କରିବା ନେଇ ମଧ୍ୟ ବିଚାର କରୁଛି ।
ଦଳର ଶୀର୍ଷ ନେତୃତ୍ୱଙ୍କ ସହ ନବୀନ ଏ ନେଇ ବିଚାର ବିମର୍ଷ କରିଛନ୍ତି । ଖୁବଶୀଘ୍ର ସମସ୍ତ ଅଡ଼ୁଆ ଓ ବିବାଦର ସମାଧାନ କରି ଜିଲ୍ଲା ସଭାପତିଙ୍କ ନାମ ଘୋଷଣା କରିପାରେ ବିଜେଡି ।
