ନୂଆଦିଲ୍ଲୀ: ନେପାଳରେ ପୁଣି ଥରେ ଭୂମିକମ୍ପ ଅନୁଭୂତ ହୋଇଛି । ନ୍ୟାସନାଲ ସେଣ୍ଟର ଫର ସିସ୍ମୋଲୋଜିର ସୂଚନା ଅନୁଯାୟୀ, ଭୂମିକମ୍ପର ତୀବ୍ରତା ୩.୬ ରହିଥିଲା । ତେବେ ସବୁଠାରୁ ବଡକଥା ହେଲା ନେପାଳରେ ହୋଇଥିବା ଭୂକମ୍ପର ପ୍ରଭାବ ଭାରତରେ ଅନୁଭୂତ ହୋଇନାହିଁ । କେବଳ ନେପାଳ ନୁହେଁ ବରଂ ଆଫଗାନିସ୍ତାନର ଫୈଜାବାଦରେ ମଧ୍ୟ ପ୍ରବଳ ଭୂକମ୍ପ ଅନୁଭୂତ ହୋଇଥିଲା । ନ୍ୟାସନାଲ ସେଣ୍ଟର ଫର ସେସମୋଲୋଜି କହିଛି ଯେ ଆଫଗାନିସ୍ତାନରେ ୪.୫ ମ୍ୟାଗ୍ନିଚ୍ୟୁଡର ଏକ ଭୂକମ୍ପ ଘଟିଛି।
ସୂଚନାଥାଉକି, ଶୁକ୍ରବାର ବିଳମ୍ବିତ ରାତିରେ ନେପାଳରେ ୬.୪ ମ୍ୟାଗ୍ନିଚ୍ୟୁଡର ଏକ ଭୂକମ୍ପରେ ୧୫୭ ଜଣଙ୍କର ମୃତ୍ୟୁ ଘଟିଥିଲା । ଏହି ସମୟରେ ଅତି କମରେ ୩୭୫ ଜଣ ଆହତ ହୋଇଥିଲେ । ସେଠାରେ ସନ୍ଧାନ ଏବଂ ଉଦ୍ଧାର କାର୍ଯ୍ୟ ଏବେ ମଧ୍ୟ ଜାରି ରହିଛି । ଶୁକ୍ରବାର ଦିନ ନେପାଳର ଜଜାର୍କୋଟ ଜିଲ୍ଲାରେ ଘଟିଥିବା ଭୂକମ୍ପ ଯୋଗୁଁ ବହୁ ଧନସମ୍ପତ୍ତି ନଷ୍ଟ ହୋଇଛି । ଗତ ମାସରେ ମଧ୍ୟ ନେପାଳରେ ଅନେକ ଥର ଭୂକମ୍ପ ଅନୁଭୂତ ହୋଇଥିଲା ।
ଶୁକ୍ରବାର ଦିନ ପଶ୍ଚିମ ନେପାଳରେ ଘଟିଥିବା ଏହି ଶକ୍ତିଶାଳୀ ଭୂକମ୍ପକୁ ନେଇ ବୈଜ୍ଞାନିକ ଚିନ୍ତାପ୍ରକାଶ କରିଛନ୍ତି । ଏକ ଗବେଷଣାରୁ ବୈଜ୍ଞାନିକ ମାନେ ଜାଣିବାକୁ ପାଇଛନ୍ତି ଯେ ପଶ୍ଚିମ ନେପାଳରେ ପ୍ରାୟ ୫ ଶହ ବର୍ଷ ଧରି ପୃଥିବୀ ପୃଷ୍ଠରେ ବିପୁଳ ଭୂକମ୍ପ ଶକ୍ତି ଜମା ହୋଇ ରହିଛି । ତେଣୁ ବିଶେଷଜ୍ଞମାନେ ଚେତାବନୀ ଦେଇଛନ୍ତି ଯେ ଆସନ୍ତା ସମୟରେ ରିଆକ୍ଟର ସ୍କେଲରେ ୮ କିମ୍ବା ଅଧିକ ତୀବ୍ରତାରେ ଭୂକମ୍ପ ହେବାର ସମ୍ଭାବନା ରହିଛି।