ପ୍ରତିଦିନ ଗାଧୋଇବା ସମୟରେ, କେଶ ଧୋଇବା ସହ ଦାନ୍ତ ଘଷି କିନ୍ତୁ ଜିଭକୁ ଅଣଦେଖା କରି ଦେଇଥାଉ। ହେଲେ କ’ଣ ଆପଣ ଜାଣନ୍ତି ଯେ, ପ୍ରତିଦିନ ଆପଣଙ୍କ ଜିଭରେ ହଜାର ହଜାର ବ୍ୟାକ୍ଟେରିଆ ଜମା ହୁଏ, ଯାହା କେବଳ ଆପଣଙ୍କ ଶ୍ୱାସକୁ ଦୁର୍ଗନ୍ଧିତ କରେ ନାହିଁ ବରଂ ଧୀରେ ଧୀରେ ଆପଣଙ୍କ ସମଗ୍ର ଶରୀରକୁ ପ୍ରଭାବିତ କରେ? ଦାନ୍ତ ସଫା କରିବା ପରି ଜିଭ ସଫା କରିବା ମଧ୍ୟ ଗୁରୁତ୍ୱପୂର୍ଣ୍ଣ।
ପାଟିରୁ ଦୁର୍ଗନ୍ଧ: ଜିଭରେ ଜମା ହୋଇଥିବା ମଇଳା ପ୍ରଥମେ ଆପଣଙ୍କ ପାଟିକୁ ଦୁର୍ଗନ୍ଧ କରିଥାଏ। ଆପଣ ଯେତେ ଥର ବ୍ରଶ୍ କରୁଥିଲେ ମଧ୍ୟ ଯଦି ଜିଭ ସଫା କରୁ ନାହାନ୍ତି, ତେବେ ଦୁର୍ଗନ୍ଧ ଲାଗି ରହିବ।
ସ୍ୱାଦ ହ୍ରାସ: ଆପଣ କେବେ ଅନୁଭବ କରିଛନ୍ତି ଯେ, ଖାଦ୍ୟର ସ୍ୱାଦ ଜଣି ପାରୁ ନାହାନ୍ତି? ଏହାର କାରଣ ଆପଣଙ୍କ ଜିଭରେ ଜମା ହୋଇଥିବା ମୃତ କୋଷ ଏବଂ ବ୍ୟାକ୍ଟେରିଆ ହୋଇପାରେ, ଯାହା ଆପଣଙ୍କ ସ୍ୱାଦକୁ ନଷ୍ଟ କରିଥାଏ ।
ପାଚନ ସମସ୍ୟା: ଜିଭରେ ଜମା ହୋଇଥିବା ଜୀବାଣୁ ଆପଣଙ୍କ ପାଟି ଦେଇ ପେଟରେ ପହଞ୍ଚି ପାଚନ ପ୍ରଣାଳୀକୁ ପ୍ରଭାବିତ କରେ। ଏହା ଯୋଗୁଁ ଗ୍ୟାସ୍ ଏବଂ କୋଷ୍ଠକାଠିନ୍ୟ ଭଳି ସମସ୍ୟା ବଢ଼ିପାରେ।
ଦାନ୍ତ ସଂକ୍ରମଣ: ଜିଭରୁ ବାହାରୁଥିବା ମଇଳା ଦାନ୍ତ ଏବଂ ମାଢ଼ିକୁ ମଧ୍ୟ ବ୍ୟାପିପାରେ । ଯାହା ଫଳରେ କ୍ୟାଭିଟି, ମାଢ଼ି ଫୁଲିବା ଏବଂ ପାଇରିଆ ଭଳି ସମସ୍ୟା ସୃଷ୍ଟି ହୁଏ।
ରୋଗ ପ୍ରତିରୋଧକ ଶକ୍ତି ଦୁର୍ବଳ ହେବା: ଜୀବାଣୁ ଏବଂ ବିଷାକ୍ତ ପଦାର୍ଥର ନିରନ୍ତର ସଂସ୍ପର୍ଶରେ ଆସିବା ଆପଣଙ୍କ ରୋଗ ପ୍ରତିରୋଧକ ଶକ୍ତିକୁ ଦୁର୍ବଳ କରିପାରେ। ଜିଭକୁ ସଫା ରଖିବା ଶରୀରକୁ ସଂକ୍ରମଣରୁ ରକ୍ଷା କରେ ।
ଚର୍ମ ଉପରେ ପ୍ରଭାବ: ଜିଭ ସଫା କରିବା ମଧ୍ୟ ଆପଣଙ୍କ ଚର୍ମ ସହିତ ଜଡିତ। ଯେତେବେଳେ ଶରୀରରେ ବିଷାକ୍ତ ପଦାର୍ଥ ଜମା ହୁଏ, ସେତେବେଳେ ବ୍ରଣ ଭଳି ଚର୍ମ ସମସ୍ୟା ହୋଇପାରେ।
