ନୂଆଦିଲ୍ଲୀ,୧୦/୦୫: ମୁଣ୍ଡ ଉପରେ ଇଂଲଣ୍ଡ ବିପକ୍ଷ ଟେଷ୍ଟ ସିରିଜ । ଏହା ପୂର୍ବୁରୁ ଭାରତକୁ ଲାଗିପାରେ ଝଟକା । ରୋହିତଙ୍କ ପରେ ଅବସର ନେବେ କି କିଙ୍ଗ କୋହଲି ? ଆସନ୍ତା ମାସରେ ଇଂଲଣ୍ଡ ବିପକ୍ଷରେ ୫ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଖେଳିବ ଭାରତ । ଏହାପୂର୍ବରୁ ଅଚାନକ ରୋହିତ ଅବସର ନେଇଛନ୍ତି । ଏବେ ବିରାଟ କୋହଲି ସନ୍ନ୍ୟାସ ନେଇ ପାରନ୍ତି ବୋଲି ଚର୍ଚ୍ଚା ହେଉଛି ।
ଜାତୀୟ ଗଣମାଧ୍ୟମ ସୂଚନା ଅନୁଯାୟୀ, ବିରାଟ କୋହଲି ଇଂଲଣ୍ଡ ବିପକ୍ଷ ଟେଷ୍ଟ ସିରିଜ ପୂର୍ବରୁ ଅବସର ନେଇପାରନ୍ତି । ଇଂଲଣ୍ଡ ଗସ୍ତ ପୂର୍ବରୁ ହିଁ ସେ ସନ୍ନ୍ୟାସ ଘୋଷଣା କରିପାରନ୍ତି ବୋଲି କୁହାଯାଉଛି । ଏ ନେଇ ସେ ବିସିସିଆଇକୁ ଜଣାଇ ଦେଇଥିବା କୁହାଯାଉଛି । ବିସିସିଆଇ ଏହାକୁ ନେଇ ପୁର୍ନବିଚାର କରିବାକୁ ଆଗ୍ରାହ୍ୟ କରିଛି । ବର୍ତ୍ତମାନ ବିସିସିଆଇର ଟପ୍ ଅଧିକାରୀ ତାଙ୍କ ନିଷ୍ପତ୍ତି ଉପରେ ବିଚାର ବିମର୍ଶ କରୁଛନ୍ତି । ଆସନ୍ତା କିଛି ଦିନ ଭିତରେ ଫାଇନାଲ ନିଷ୍ପତ୍ତି ଆସିପାରେ ।
କୋହଲିଙ୍କ ଟେଷ୍ଟ କ୍ୟାରିୟର- ରନ୍ ମେସିନ୍ ବିରାଟ କୋହଲି ୨୦୧୧ରେ ଟେଷ୍ଟ କ୍ୟାରିଆର ଆରମ୍ଭ କରିଥିଲେ । ଏବେ ସୁଦ୍ଧା ସେ ଭାରତ ପାଇଁ ୧୨୩ଟି ଟେଷ୍ଟ ମ୍ୟାଚ ଖେଳିଛନ୍ତି । ୪୬.୮୫ ଆଭରେଜରେ ୯୨୩୦ ରନ କରିଛନ୍ତି । ଟେଷ୍ଟରେ ତାଙ୍କ ନାମରେ ୩୧ ଅର୍ଦ୍ଧଶତକ ଓ ୩୦ ଶତକ ରହିଛି । ୨୦୧୪ରେ ବିରାଟ କୋହଲି ଟେଷ୍ଟ ଫର୍ମାଟରେ ଅଧିନାୟକତ୍ୱ କରିଥିଲେ । ଟେଷ୍ଟରେ ଅଧିନାୟକତ୍ୱରେ ତାଙ୍କର ଭଲ ରେକର୍ଡ ରହିଛି । ୨୦୧୪-୨୦୨୨ରେ ୬୮ ମ୍ୟାଚରେ ସେ କ୍ୟାପ୍ଟେନ୍ସି କରିଛନ୍ତି । ତାଙ୍କ ନେତୃତ୍ୱରେ ଭାରତ ୪୦ଟି ମ୍ୟାଚ ଜିତିଛି ।
କହି ରଖୁଛୁ କି, କିଛି ଦିନ ତଳେ ଭାରତୀୟ ଦଳର ଅଧିନାୟକ ରୋହିତ ଶର୍ମା ଟେଷ୍ଟ କ୍ରିକେଟରୁ ଅବସର ଘୋଷଣା କରିଥିଲେ । ବର୍ତ୍ତମାନ ସେ କେବଳ ଦିନିକିଆ ଖେଳିବେ । ପୂର୍ବରୁ ଟି-୨୦ରୁ ଅବସର ନେଇ ସାରିଛନ୍ତି । ତେବେ ତାଙ୍କ ସ୍ଥାନରେ ଟେଷ୍ଟ କ୍ରିକେଟରେ କାହାକୁ ଅଧିନାୟକତ୍ୱ ଦିଆଯିବ ତାହା ଜଣାପଡିନାହିଁ । ଏହା ସହିତ ତାଙ୍କ ସ୍ଥାନରେ କାହାକୁ ଦଳରେ ସୁଯୋଗ ମିଳିବ ତାହା ମଧ୍ୟ ଅସ୍ପଷ୍ଟ । ଯଦି କୋହଲି ଅବସର ନିଅନ୍ତି ତେବେ ଦୁଇ ଅଭିଜ୍ଞ ପ୍ଲେୟାରଙ୍କୁ ହରାଇବା ଦଳ ପାଇଁ ଚିନ୍ତାର କାରଣ ହୋଇପାରେ ।
