ନୂଆଦିଲ୍ଲୀ,୯/୫ :   ଇଣ୍ଡିଆନ ପ୍ରିମିୟର ଲିଗ୍ (IPL) ୨୦୨୫କୁ ଏକ ସପ୍ତାହ ଲାଗି ସ୍ଥଗିତ ରଖାଯାଇଛି । ଭାରତ- ପାକିସ୍ତାନ ମଧ୍ୟରେ ଲାଗିଥିବା ଯୁଦ୍ଧ ପରିସ୍ଥିତି ମଧ୍ୟରେ ଏଭଳି ନିଷ୍ପତ୍ତି ନିଆଯାଇଛି । ଶୁକ୍ରବାର ଭାରତୀୟ କ୍ରିକେଟ ନିୟନ୍ତ୍ରଣ ବୋର୍ଡ(BCCI)ର ବୈଠକରେ ଏହି ବଡ଼ ନିଷ୍ପତ୍ତି ନିଆଯାଇଛି । BCCIର ଉପାଧ୍ୟକ୍ଷ ରାଜୀବ ଶୁକ୍ଳା ଏହି କଥାର ସୂଚନା ଦେଇଛନ୍ତି ।

ଏହା ମଧ୍ୟରେ ଦିଲ୍ଲୀ ଏବଂ ଜିଲ୍ଲା କ୍ରିକେଟ ସଂଘ(DDCA) କୁ ଏକ ଧମକପୂର୍ଣ୍ଣ ଇମେଲ୍ ମିଳିଛି । ଯେଉଁଥିରେ କୁହାଯାଇଛି କି, ଆମ ପାକିସ୍ତାନ ସମର୍ଥକ ସ୍ଲିପର ସେଲ୍ ପୂରା ଭାରତରେ ଉପସ୍ଥିତ ଅଛନ୍ତି । ଆମେ ତାଙ୍କୁ ‘ଅପରେସନ ସିନ୍ଦୂର’ର ବଦଲାରେ ଆକ୍ଟିଭ କରିବୁ । ଆମେ ଆପଣଙ୍କ ଷ୍ଟାଡିୟମରେ ଧମାକା କରିବୁ । DDCAଏହି ଇମେଲ ବିଷୟରେ ଦିଲ୍ଲୀ ପୋଲିସକୁ ସୂଚନା ଦେଇଛି ।

ଏହା ପୂର୍ବରୁ ଅହମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମକୁ ବମରେ ଉଡ଼ାଇବାକୁ ଧମକ ମିଳିଥିଲା । ଗୁଜୁରାଟ କ୍ରିକେଟ ଆସୋସିଏସନ(GCA)ର ଅଫିସିଆଲ ଇମେଲକୁ ଧମକ ପଠାଯାଇଥିଲା ‘ଆମେ ଆପଣଙ୍କ ଷ୍ଟାଡିୟମକୁ ଉଡ଼ାଇ ଦେବୁ’। ସେତେବେଳେ ପାକିସ୍ତାନ ନାଁରେ ଇମେଲ ପଠାଯାଇଥିଲା, ଯାହା ପରେ ସାଇବର କ୍ରାଇମ୍ ଟିମ୍ ଯାଞ୍ଚ ସମ୍ଭାଳି ଥିଲା ।