କଟକ,୨୬/୦୪: ଘରେ ଲାବ୍ରାଡର୍ ବିଦେଶୀ କୁକୁର ପାଳିଥିଲେ । କୁକୁରକୁ ଘରେ ତାଲା ପକାଇ ସପ୍ତାହେ ପାଇଁ ପଳାଇଲେ ପୁରୀ ବୁଲିବାକୁ। ଅସହ୍ୟ ଗରମ ଓ ଗୁଳୁଗୁଳି ସହି ନପାରି ଶେଷରେ କୁକୁରଟି ଆଖି ବୁଜିଲା । ଏଭଳି ଅଭାବନୀୟ ଘଟଣା ଘଟିଛି ପୁରୀଘାଟ ଥାନା କୁମ୍ଭାରସାହିରେ । ପୁଲିସ ମୃତ କୁକୁରର ମୃତଦେହ ସତ୍କାର କରିବା ସହ ନିଜ ଆଡୁ ମାଲିକଙ୍କ ନାଁରେ ମାମଲା କରିଛି । ଫଳରେ ମାଲିକଙ୍କ ଅଡୁଆ ବଢ଼ିଛି ।
ଘଟଣାରୁ ପ୍ରକାଶ ଯେ, କୁମ୍ଭାରସାହିର ଚନ୍ଦ୍ରମୋହନ ସିଂ ଗତ କିଛି ବର୍ଷ ଧରି ଘରେ ଏକ ବିଦେଶୀ କୁକୁର ଲାବ୍ରାଡର୍ ପାଳିଥିଲେ । ଏହାସହ ୪ଟି ଶୁଆ ରଖିଥିଲେ । ତାଙ୍କ ନିଜ ଘର ପୁରୀରେ ହୋଇଥିବାରୁ ନିୟମିତ ବ୍ୟବଧାନରେ ପରିବାର ଲୋକେ ପୁରୀ ଯାଆନ୍ତି । କିନ୍ତୁ ସପ୍ତାହକ ତଳେ ପରିବାରର ସମସ୍ତେ ଏକାଠି ପୁରୀ ପଳାଇ ଯାଇଥିଲେ । ହେଲେ କୁକୁରକୁ ଘରେ ଛାଡ଼ି ଯାଇଥିଲେ । ମାଲିକଙ୍କୁ ନ ପାଇ ପ୍ରଥମେ କୁକୁର ପ୍ରବଳ ଭୋକିଥିଲା । ହଠାତ୍ କିଛି ଦିନ ପୂର୍ବରୁ କୁକୁରର ଭୁକିବା ଶବ୍ଧ ଶୁଣିବାକୁ ମିଳି ନଥିଲା । ଧୀରେ ଧୀରେ ଘରୁ ଦୁର୍ଗନ୍ଧ ବାହାରିବା ପରେ ଲୋକେ ପୁଲିସକୁ ଖବର ଦେଇଥିଲେ । ପୁଲିସ ଘଟଣାସ୍ଥଳରେ ପହଞ୍ଚି ମାଲିକ ଚନ୍ଦ୍ରମୋହନଙ୍କୁ ଖବର ଦେଇଥିଲା । ଚନ୍ଦ୍ରମୋହନଙ୍କ ପରିବାର ପହଞ୍ଚି ତାଲା ଖୋଲି ଦେଖିବାରେ ପୋଷା କୁକୁରଟି ମରି ପଡ଼ିଥିଲା । ଶୁଆ ଗୁଡ଼ିକ ମଧ୍ୟ ମୁର୍ମୂଷୁ ଅବସ୍ଥାରେ ରହିଥିଲେ । ପୁଲିସ କୁକୁରର ବ୍ୟବଚ୍ଛେଦ କରାଇବା ସହ ସଂସ୍କାର କରିଥିଲା । ଶୁଆ ଗୁଡ଼ିକୁ ଉଦ୍ଧାର କରିବାକୁ ବନ ବିଭାଗକୁ ଖବର ଦିଆଯାଇଛି । ଏଭଳି ସମ୍ବେଦନଶୀଳ ଘଟଣାରେ ପୁଲିସ ୧୪୦/୨୪ରେ ନିଜ ଆଡୁ ମାମଲା କରିଛି । ପଶୁ ନିର୍ଯାତନା ନିରୋଧ ଆଇନ ଅନୁସାରେ ମାଲିକ ଶ୍ରୀ ସିଂଙ୍କ ବିରୋଧରେ ମାମଲା କରାଯାଇଥିବା ପୁରୀଘାଟ ଥାନା ପକ୍ଷରୁ ସୂଚନା ପ୍ରଦାନ କରାଯାଇଛି।
