ଜୟପୁର,୩୦/୦୬: ପେଟ ପୋଷିବା ପାଇଁ କୋରାପୁଟର ଜୟପୁର ସହରକୁ ଆସିଥିଲେ ହରିଆଣାର ଜଣେ ମହିଳା । ତାଙ୍କୁ ଦୁଷ୍କର୍ମ କରାଯାଇଥିବା ଅଭିଯୋଗ ହୋଇଛି । ମହିଳା ଜଣଙ୍କ ଏ ସମ୍ପର୍କରେ ଲିଖିତ ଏତଲା ଦେଇଛନ୍ତି । ଏନେଇ ମହିଳା ଥାନାରେ ଏକ ମାମଲା ରୁଜୁ ହୋଇଛି । ଅଭିଯୁକ୍ତଜଣଙ୍କ ସହରର ଜଣେ ଅଣଓଡ଼ିଆ ବ୍ୟବସାୟୀ ବୋଲି ଅଭିଯୋଗରେ ଉଲ୍ଲେଖ ରହିଛି । ପୀଡ଼ିତାଙ୍କୁ ନେଇ ସିନ୍ ରିକ୍ରିଏସନ୍ କରାଯାଇଥିବା ମହିଳା ଥାନା ପକ୍ଷରୁ କୁହାଯାଇଛି । ଅନ୍ୟପକ୍ଷେ ଏହି ଘଟଣାରେ ସହରର ଆଉ ଜଣେ ଅଣଓଡ଼ିଆ ଯୁବବ୍ୟବସାୟୀଙ୍କ ସମ୍ପୃକ୍ତି ଥିବା ଚର୍ଚ୍ଚା ଜୋର ଧରିଛି ।
ଅଭିଯୋଗ ଅନୁଯାୟୀ, ଗତ ୨୮ ତାରିଖ ରାତିର ଘଟଣା । ହରିଆଣାର ମହିଳାଙ୍କୁ ଦୁଷ୍କର୍ମ କରିଥିଲେ ବ୍ୟବସାୟୀ ଜଣଙ୍କ । ବିଳମ୍ବିତ ରାତିରେ ପୀଡ଼ିତା ଥାନାର ଦ୍ୱାରସ୍ଥ ହୋଇଥିଲେ । ଏତଲାକୁ ଭିତ୍ତି କରି ଆରମ୍ଭ ହୋଇଥିଲା ତନାଘନା । ତାଙ୍କ ବୟାନ ରେକର୍ଡ କରାଯାଇଥିଲା । ମାମଲା ରୁଜୁ ପରେ ରବିବାର ଅପରାହ୍ଣରେ ଆଇଆଇସି ଆଶ୍ରିତା ଖାଲ୍କୋ, ଏସ୍ଆଇ ଶକୁନ୍ତଳା ଦେବୀ ପ୍ରମୁଖ ମହିଳାଙ୍କୁ ସାଙ୍ଗରେ ନେଇ ଘଟଣାସ୍ଥଳକୁ ଯାଇଥିଲେ । ସିନ୍ ରିକ୍ରିଏସନ୍ କରାଯାଇଥିଲା ।
ଏ ସମ୍ପର୍କରେ ଏସ୍ଡିପିଓ ପାର୍ଥ ଜଗଦୀଶ କଶ୍ୟପଙ୍କୁ ପଚାରିବାରେ କହିଛନ୍ତି, ହରିଆଣାର ମହିଳାଜଣଙ୍କ ଦୁଷ୍କର୍ମ ଅଭିଯୋଗ ଆଣିଛନ୍ତି । ତଦନ୍ତ ଜାରି ରହିଛି । ଅନ୍ୟପକ୍ଷେ ସହରରେ ଚର୍ଚ୍ଚା ହେଉଛି ଯେ, ସ୍ଥାନୀୟ ଏକ ଗୁରୁତ୍ୱପୂର୍ଣ୍ଣ ଛକରେ ୨ ଅଣଓଡ଼ିଆ ବ୍ୟବସାୟୀଙ୍କ ଦୋକାନ ରହିଛି । ଉଭୟ ବ୍ୟବସାୟ କରୁଥିବାରୁ ସେମାନଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା ଲାଗିରହୁଛି । ଗତ ୨୮ ତାରିଖ ରାତିରେ ଉଭୟ ବ୍ୟବସାୟୀ ଏବଂ ଅନ୍ୟ କେତେଜଣ ମିଶି ପାର୍ଟି କରିଥିଲେ । ସହରର ଏକ ସାହିରେ ରହୁଥିବା ଉପରୋକ୍ତ ମହିଳାଙ୍କ ଘରକୁ ଉଭୟ ଅଣଓଡ଼ିଆ ବ୍ୟବସାୟୀ ଯାଇଥିଲେ । ବିଳମ୍ବିତ ରାତିରେ ମହିଳାଙ୍କୁ ଦୁଷ୍କର୍ମ କରାଯାଇଥିବା ନେଇ ସେ ଥାନାର ଦ୍ୱାରସ୍ଥ ହୋଇଥିଲେ । ତଦନ୍ତ ପରେ ପ୍ରକୃତ ଘଟଣା ପଦାକୁ ଆସିବ ବୋଲି ପୁଲିସ କହିଛି ।
