ପୁରୀ,୧୦/୦୫: ରଥ ଖଳାରେ ବିଶ୍ୱକର୍ମାମାନେ ରଥତ୍ରୟର ୪୨ ତୁମ୍ବରେ ଅର ବିନ୍ଧ ଖୋଦେଇ ସାରିଛନ୍ତି । ପ୍ରତି ତୁମ୍ବରେ ୧୬ ଯୋଡ଼ା ଲେଖାଏଁ ବିନ୍ଧ ହୋଇଛି । ସେଥିରେ ଅର ଭୁଞ୍ଜା ଯିବ । ସୁତାବାଡ଼ିଆ ପରେ କରତି ସେବକମାନେ ତୁମ୍ବରେ ଘେର କାଟୁଛନ୍ତି । ଫଳରେ ବକଳା ଅଂଶ ବାହାରି ଚକ ପାଇଁ ପ୍ରସ୍ତୁତ ହେଉଛି ତୁମ୍ବ । ଶୁକ୍ରବାର ସୁଦ୍ଧା ୪୨ରୁ ୧୯ ତୁମ୍ବର ଘେର କଟା ସରିଥିବା କହିଛନ୍ତି ମୁଖ୍ୟ କରତି ସେବକ ରଣଜିତ ମହାରଣା ।
ସେହିଭଳି ତୁମ୍ବରେ ଅର କଣ୍ଟା ପାଇଁ ଅଗର ବିନ୍ଧ ମଧ୍ୟ ସରିବା ଉପରେ । ଶାଳରେ ଓଝା ସେବକ ରଥ ପାଇଁ ଅର କଣ୍ଟା ନିର୍ମାଣ ସାରି ପନ୍ଦାରି କାମରେ ଲାଗିଛନ୍ତି । ତାଳଧ୍ୱଜ ରଥର ୧୪ ଚକ ପାଇଁ ୪୪୮ ଅରକଣ୍ଟା, ଦେବଦଳନ ରଥର ୧୨ଟି ଚକ ପାଇଁ ୩୮୪ ଓ ନନ୍ଦିଘୋଷର ୧୬ଟି ଚକ ପାଇଁ ୫୧୨ ଅର କଣ୍ଟା ଆବଶ୍ୟକ ବୋଲି ସୂଚନା ରହିଛି ।
ନୃସିଂହ ଚତୁର୍ଦ୍ଦଶୀ ପାଇଁ ଖଳାରେ ପ୍ରସ୍ତୁତି ଆରମ୍ଭ ହୋଇଛି । ଭୋଇ ସେବକମାନେ ୧୨ଫୁଟିଆ ଅରମୁଣ୍ଡି ଧଉରା କାଠ ଯୋଗାଇଛନ୍ତି । ରଥ ନିର୍ମାଣ ପରମ୍ପରାରେ ସେଦିନ ହେବ ଗୁଜ ଅନୁକୂଳ । ରୂପକାର ସେବକମାନେ ରଥ ନିର୍ମାଣ କାର୍ଯ୍ୟରେ ଯୋଗଦେବେ । ଅରମୁଣ୍ଡି ଚଉପଟ ହେଲେ ସେଥିରେ କାମ କରିବେ ରୂପକାର । ଏଥିସହ ରଥ ଚକ ପ୍ରସ୍ତୁତି ପାଇଁ ଭୋଇସେବକମାନେ ଯନ୍ତା ଗାଡ଼ ଖୋଳିବେ ।
ଚର୍ଚ୍ଚିକା ଠାକୁରାଣୀଙ୍କ ସମ୍ମୁଖ ବଡ଼ଦାଣ୍ଡରେ ଖୋଳାହେବ ଯନ୍ତାଗାଡ଼ । ସେଠାରେ ସିଙ୍ଗଡ଼ା ବାଡ଼ିଆ ପଦ୍ଧତି ରଥ ଚକ ପ୍ରସ୍ତୁତ ହେବ । ଶ୍ରୀମନ୍ଦିର ବରିଷ୍ଠ ତତ୍ତ୍ୱାବଧାରକ ସୁଦର୍ଶନ ମେକାପ ରଥ ଖଳାରେ ନିର୍ମାଣ ଅଗ୍ରଗତି ଦେଖିବା ସହ ନିର୍ମାଣକାରୀଙ୍କ ଆବଶ୍ୟକତା ବୁଝି ମହାପ୍ରଭୁଙ୍କ କାର୍ଯ୍ୟକୁ ଆଗେଇ ନେଉଛନ୍ତି । ରାତିରେ ୬୦ ଖଣ୍ଡ ପହି କାଠ ରଥଖଳାରେ ପହଞ୍ଚିଥିବା ଜଣାଯାଇଛି ।
