ଜେରୁଜେଲମ୍, ୧୩/୧୧: ହମାସ୍ ସହ ଇସ୍ରାଏଲ୍ ଯୁଦ୍ଧ ଲଢ଼ୁଛି । ଯୁଦ୍ଧ ଭିତରେ ବଡ଼ ସଂକେତ ଦେଇଛନ୍ତି ନେତନ୍ୟାହୁ । ଆମେରିକୀୟ ଗଣମାଧ୍ୟମକୁ ଇସ୍ରାଏଲ୍ ପ୍ରଧାନମନ୍ତ୍ରୀ ନେତନ୍ୟାହୁ କହିଛନ୍ତି, ଗାଜାରେ ହମାସ ବନ୍ଧକଙ୍କୁ ମୁକ୍ତ କଲେ ବୁଝାମଣା କରାଯାଇ ପାରେ । ତେବେ ଇସ୍ରାଏଲ୍ ଆଗାମୀ ଯୋଜନା କଣ ରହିଛି ସେନେଇ ନେତନ୍ୟାହୁ କିଛି ସ୍ପଷ୍ଟ କରି ନାହାନ୍ତି ।
ନେତନ୍ୟାହୁ କହିଛନ୍ତି, ବନ୍ଧକଙ୍କୁ ମୁକ୍ତ କଲେ ବୁଝାମଣା ହେବ । କିନ୍ତୁ ଆମେ ଗ୍ରାଉଣ୍ଡ ଅପରେସନ୍ ଆରମ୍ଭ କରିବା ପରେ ବହୁତ କିଛି ବଦଳି ଯାଇଛି । ଏବେ ହମାସ୍ ଆତଙ୍କୀ ଇସ୍ରାଏଲର ୨୩୯ ଜଣଙ୍କୁ ବନ୍ଧକ ରଖିଛନ୍ତି । ବନ୍ଧକଙ୍କୁ ଉଦ୍ଧାର ପାଇଁ ଇସ୍ରାଏଲରେ ମଧ୍ୟ ଦାବି ଉଠିଲାଣି । ଲୋକେ ଦାବି କହିଛନ୍ତି, ଅସ୍ତ୍ରବିରତି କରି ବନ୍ଧକଙ୍କୁ ସରକାର ମୁକୁଳାଇ ଆଣନ୍ତୁ ।
କାର୍ ସଜାଡ଼ିବା ବେଳେ କେମିକାଲରୁ କୋଠାକୁ ବ୍ୟାପିଲା ନିଆଁ, ୬ ଜଣଙ୍କ ମୃତ୍ୟୁ
ପୂର୍ବରୁ ଅସ୍ତ୍ରବିରତି ପାଇଁ ନେତନ୍ୟାହୁ ମନା କରୁଥିବା ବେଳେ ବନ୍ଧକଙ୍କୁ ଛାଡ଼ିଲେ ଅସ୍ତ୍ରବିରତି ପାଇଁ ସଂକେତ ଦେଇଛନ୍ତି । ଅନ୍ୟପଟେ ନେତନ୍ୟାହୁଙ୍କ ମନ୍ତବ୍ୟକୁ କାଉଣ୍ଟର କରି ଗାଜାର ଅଧିକାରୀ କହିଛନ୍ତି, ବିଳମ୍ବ ପାଇଁ ଇସ୍ରାଏଲ୍ ପ୍ରଧାନମନ୍ତ୍ରୀ ଦାୟୀ । ବନ୍ଧକଙ୍କୁ ମୁକ୍ତ କରିବା ଲାଗି ବୁଝାମଣା ପୂର୍ବରୁ ବି ହୋଇପାରି ଥାନ୍ତା । ନେତନ୍ୟାହୁ ବନ୍ଧକଙ୍କୁ ଜୀବିତ ଉଦ୍ଧାର ପରିବର୍ତ୍ତେ ନିଜ ରାଜନୈତିକ ଜୀବନ ପାଇଁ ବ୍ୟସ୍ତ ହୋଇ ପଡ଼ିଛନ୍ତି ।
ଆମେରିକା ପକ୍ଷରୁ କୁହାଯାଇଛି, ବନ୍ଧକଙ୍କୁ ମୁକ୍ତ କରିବା ଲାଗି ଆଲୋଚନା ଜାରି ରହିଛି । ଗାଜାର ହସ୍ପିଟାଲ୍ ସ୍ଥିତିକୁ ନେଇ ନେତନ୍ୟାହୁ କହିଛନ୍ତି, ରୋଗୀଙ୍କ ପାଇଁ ନିରାପଦ କରିଡର କରାଯାଇଛି । ସେମାନେ ଦକ୍ଷିଣ ଗାଜାକୁ ଯାଇ ପାରିବେ । ବନ୍ଦ ହୋଇଥିବା ଅଲ୍-ଶିଫା ହସ୍ପିଟାଲରୁ ୧୦୦ ଜଣଙ୍କୁ ସ୍ଥାନାନ୍ତର କରାଯାଇଥିବା ସୂଚନା ଦେଇଛନ୍ତି ନେତନ୍ୟାହୁ ।
ଗାଜାରେ ହସ୍ପିଟାଲକୁ ବନ୍ଦ କରି ହମାସ୍ ଆତଙ୍କବାଦୀକୁ ଖୋଜୁଛି ଇସ୍ରାଏଲ୍
ଜାତିସଂଘ ସୂଚନା ଅନୁସାରେ, ଗାଜାର ୩୬ ହସ୍ପିଟାଲ୍ ମଧ୍ୟରୁ ୨୦ଟି ବନ୍ଦ ହୋଇ ଯାଇଛି । ହସ୍ପିଟାଲ୍ ଗୁଡ଼ିକରେ ୩ ଦିନ ହେଲା ବିଜୁଳି କି ପାଣି ନାହିଁ । ହସ୍ପିଟାଲ୍ ନିକଟରେ ଏବେ ବି ବୋମାମାଡ଼ ଜାରି ରହିଥିବା କହିଛି ବିଶ୍ୱ ସ୍ୱାସ୍ଥ୍ୟ ସଂଗଠନ ।