ଚନ୍ଦ୍ରଶେଖରପୁର, ୨୨।୫: ମୁଖ୍ୟମନ୍ତ୍ରୀଙ୍କ ନେତୃତ୍ୱରେ ବିକାଶ ଧାରା ନିରନ୍ତର ଜାରି ରହିଛି । ଲକ୍ଷ୍ୟ ରହିଛି, ଉତ୍ତର ଭୁବନେଶ୍ୱରକୁ ଏକ ମଡେଲ ନିର୍ବାଚନ ମଣ୍ଡଳୀ ଭାବେ ଗଢ଼ି ତୋଳିବି । ଆମ ନିର୍ବାଚନମଣ୍ଡଳୀ ହେବ ବିକାଶର ମଡେଲ୍‌ । ଏହା କହିଛନ୍ତି ଉତ୍ତର ଭୁବନେଶ୍ୱର ବିଧାୟକ ସୁଶାନ୍ତ ରାଉତ । ‘ପ୍ରମେୟ’କୁ ସାକ୍ଷାତକାର ଦେଇ ସୁଶାନ୍ତ କହିଛନ୍ତି, ଫାଇଲରେ ବନ୍ଧା ପଡିଥିବା ମା' ଶିଖରଚଣ୍ଡୀ ମନ୍ଦିରର ଉନ୍ନତିକରଣ କାମ ଆଗେଇଛି । ୫-ଟି କାର୍ଯ୍ୟକ୍ରମ ଅଧୀନରେ ଆଗକୁ ଶିଖରଚଣ୍ଡୀ ପୀଠ ହେବ ଭୁବନେଶ୍ୱରର ପ୍ରମୁଖ ପର୍ଯ୍ୟଟନ ହବ୍‌ । ରାଜଧାନୀରେ ପରିବହନ କ୍ଷେତ୍ରରେ ଆସିବ ଅତ୍ୟାଧୁନିକ ପରିବର୍ତ୍ତନ । ୨୦୨୮ ବେଳକୁ ଉତ୍ତର ଭୁବନେଶ୍ୱର ଦେଇ ଗଡ଼ିବ ମେଟ୍ରୋ ରେଳ । ଏହାର କାମ ଆରମ୍ଭ ହୋଇଛି । ମେଟ୍ରୋ ଗଡ଼ିଲେ ସହରବାସୀ ତ୍ୱରିତ ଯାତ୍ରୀ ପରିବହନ ସେବା ପାଇବେ । ଟ୍ରାଫିକ୍ ଭିଡ଼ ବି କମିବ । 

ଜୟଦେବ ବିହାର-ନନ୍ଦନକାନନ ଭିଡ଼ ନିୟନ୍ତ୍ରଣ ପାଇଁ ବାମ ଓ ଡାହାଣ ପାଶ୍ୱର୍ରେ ଦୁଇଟି ସମାନ୍ତରାଳ ରାସ୍ତା ନିର୍ମାଣ କରାଯାଇଛି । ବାକି ଥିବା ଅଂଶ କାମ ବି ନିର୍ବାଚନ ପରେ ଆଗେଇବ । ଏହି ଦୁଇଟି ଯାକ ରାସ୍ତା ନିର୍ମାଣ ସରିଲେ ଟ୍ରାଫିକ ସମସ୍ୟାର ସମାଧାନ ହୋଇଯିବ । ଆଉ ଲୋକଙ୍କୁ ଭିଡ଼ରେ ହଇରାଣ ହେବାକୁ ପଡ଼ିବ ନାହିଁ । ସେହିପରି କଳାରାହାଙ୍ଗ, ଭିଏସ୍‌ଏସ୍‌ ନଗର ଓ ପଟିଆରେ ରେଲୱେ ଓଭରବ୍ରିଜ୍‌ କାମ ତ୍ୱରାନନ୍ୱିତ ହୋଇଛି । ୫ ପଞ୍ଚାୟତର ମରିଚିଆ ଘେରିବନ୍ଧ ରାସ୍ତା, ଶିଙ୍ଗଡା-କୃଷ୍ଣଶରଣପୁରରୁ ହାଇଟେକ୍‌ ଗଡ଼ା, ଜରିପାଟଣାରୁ ବରିମୁଣ୍ଡ ମଲ୍ଲିକ ସାହି ପର୍ଯ୍ୟନ୍ତ ରାସ୍ତା, ମରିଚିଆ-ଝିଙ୍କରଢ଼ିହି ରାସ୍ତା କେନ୍ଦୁପାଟଣା କଲେଜ ଛକରୁ ଦାଢ଼ାପାଟଣା ରାସ୍ତା ଓ ମ୍ୟାଗନେଟିକ୍‌ ଛକରୁ ପଟିଆ ଷ୍ଟେସନ ରାସ୍ତା ସମ୍ପ୍ରସାରଣ ହୋଇଛି । 

ସୁଶାନ୍ତ କହିଛନ୍ତି, ପଟିଆରୁ ଜରିପାଟଣା ରାସ୍ତାର ସମ୍ପ୍ରସାରଣ କରାଯିବ । ଆଗକୁ ବଡ଼ କଥା ହେଲାଉତ୍ତର ଭୁବନେଶ୍ୱରରୁ କୁଆଖାଇ ଉପରେ ଆଉ ଏକ ବ୍ରିଜ୍‌ ନିର୍ମାଣ ଯୋଜନା ରହିଛି । ଏହି ବ୍ରିଜ୍‌ ନିର୍ମାଣ ହେଲେ ପାହାଳ ଓ ହଂସପାଳକୁ ଆଉ ଏକ ରାସ୍ତା ଫିଟିଯିବ । ସୁଶାନ୍ତ କହିଛନ୍ତି, ବସ୍ତି ବାସିନ୍ଦାଙ୍କ ବିକାଶ ବିଜେଡିର ସଂକଳ୍ପ । ସାଲିଆସାହିରେ ୨୪ ଘଣ୍ଟିଆ ପାନୀୟ ଜଳ, ରାସ୍ତା, ଡ୍ରେନ୍‌ ଓ ଆଲୋକୀକରଣ କରାଯାଇଛି । ଆଗାମୀ ଦିନରେ ସଭିଙ୍କୁ ସ୍ଥାୟୀ ପଟ୍ଟା ଦେବା ପାଇଁ ମୁଁ ପ୍ରତିଶ୍ରୁତିବଦ୍ଧ । ପ୍ରାୟ ୩ ହଜାର ବସ୍ତି ବାସିନ୍ଦାଙ୍କୁ ମୁଖ୍ୟମନ୍ତ୍ରୀଙ୍କ ଡ୍ରିମ୍‌ ପ୍ରକଳ୍ପ ବୁଦ୍ଧବିହାର ଓ ନୀଳମାଧବ ଆବାସରେ କୋଠା ଘର ଦିଆଯାଇଛି । ଈଶାନେଶ୍ୱର ଓ ମା’ ମଙ୍ଗଳା ବସ୍ତିକୁ ଆଦର୍ଶ ବସ୍ତି କରାଯାଇଛି, ଯାହାକୁ ଦେଖିବାକୁ ମାଇକ୍ରୋସଫ୍ଟର ପ୍ରତିଷ୍ଠାତା ବିଲ୍‌ ଗେଟ୍ସ ଓ ତାମିଲନାଡ଼ୁ ମନ୍ତ୍ରୀ ବି ଆସିଛନ୍ତି । ଯୁବପିଢ଼ିଙ୍କ ପାଇଁ କ୍ରୀଡ଼ା ଭିତ୍ତିଭୂମିରେ ବିରାଟ ପରିବର୍ତ୍ତନ ଆଣିବାକୁ ମୁଖ୍ୟମନ୍ତ୍ରୀ ବ୍ୟାପକ ପଦକ୍ଷେପ ନେଇଛନ୍ତି । ନିଳାଦ୍ରି ବିହାର ବହୁମୁଖୀ ଇନେ୍‌ଡାର ଷ୍ଟାଡିୟମ୍‌ ନିର୍ମାଣ ହେବା ପରେ ଏହା ପାଲଟିଛି ଯୁବପିଢ଼ିଙ୍କ ପ୍ରଥମ ପସନ୍ଦ ।