ପୁରୀ,୧୯/୦୬ : ସ୍ନାନଯାତ୍ରା ଓ ରଥଯାତ୍ରାକୁ ଶୃଙ୍ଖଳିତ କରିବା ପାଇଁ ପୁଲିସ ପକ୍ଷରୁ ଉଦ୍ୟମ ଜାରି ରହିଛି । ଏଥିପାଇଁ ବିଭିନ୍ନ ବିଭାଗ ସହ ପୁଲିସ ପ୍ରଶାସନ ପକ୍ଷରୁ ପ୍ରସ୍ତୁତି ବୈଠକ ଆୟୋଜନ କରାଯାଇଛି । ବିଭାଗୀୟ ଅଧିକାରୀ ଏବଂ ଦଇତାପତି ସେବାୟତ ଓ ଛତିଶା ନିଯୋଗ ସହ ବୈଠକ କରିବା ପରେ ମଙ୍ଗଳବାର ଗଣମାଧ୍ୟମ ପ୍ରତିନିଧିମାନଙ୍କ ସହ ଆଲୋଚନା କରିଛନ୍ତି ଏସ୍ପି ପିନାକ ମିଶ୍ର । ଡିପିଓ ସ୍ଥିତ କନ୍ଫରେନ୍ସ ହଲ୍ରେ ସାମ୍ବାଦିକଙ୍କ ସହ ସମନ୍ୱୟ ବୈଠକ କରି ଶୃଙ୍ଖଳିତ ସ୍ନାନଯାତ୍ରା ଓ ରଥଯାତ୍ରା ପାଇଁ ବିଭିନ୍ନ ସମସ୍ୟା ଦିଗରେ ଆଲୋଚନା କରିଛନ୍ତି ଏସ୍ପି।
ରଜ ଉତ୍ସବରେ ପୁରୀର ଭିଡ଼କୁ ଦୃଷ୍ଟିରେ ରଖି ସ୍ନାନଯାତ୍ରାରେ ଶ୍ରଦ୍ଧାଳୁଙ୍କ ଗହଳିକୁ ଆକଳନ କରିଛି ପୁଲିସ । ପୂର୍ବ ବର୍ଷ ଅପେକ୍ଷା ଏଥର ସ୍ନାନଯାତ୍ରାରେ ଦୁଇ ଗୁଣା ଶ୍ରଦ୍ଧାଳୁଙ୍କ ଭିଡ଼ ହେବ ବୋଲି ଆକଳନ କରିଛନ୍ତି ଏସ୍ପି । ଏଥିପାଇଁ ପୁଲିସ ସ୍ୱତନ୍ତ୍ର ଯୋଜନା ପ୍ରସ୍ତୁତ କରିଛି । ସ୍ନାନଯାତ୍ରା ଦିନ ପହଣ୍ଡି, ଜଳ ଲାଗି, ହାତୀ ବେଶ ତଥା ସାହାଣମେଲା ଦର୍ଶନ ସମୟରେ ସ୍ନାନ ମଣ୍ଡପ ଉପରେ ଗହଳି ନିୟନ୍ତ୍ରଣ କରାଯିବ । ଶ୍ରଦ୍ଧାଳୁମାନେ ସିଂହଦ୍ୱାର ଦେଇ ପ୍ରବେଶ କରିବା ପରେ ବାରିକେଡ୍ ଦେଇ ସ୍ନାନ ମଣ୍ଡପ ତଳେ ଏକ ପାଖିଆ ଦର୍ଶନ କରିବେ । ପରେ ଶ୍ରଦ୍ଧାଳୁ ଉତ୍ତର ଦ୍ୱାର ଦେଇ ବାହାରିବେ । ଖରା ଓ ଗୁଳୁଗୁଳିକୁ ଦୃଷ୍ଟିରେ ରଖି ପର୍ଯ୍ୟାପ୍ତ ପାନୀୟ ଜଳ, ସେଡ଼, ଜଳ ସିଞ୍ଚନର ବ୍ୟବସ୍ଥା କରାଯିବ । ଗହଳିକୁ ଦେଖି ବାରିକେଡ ମାଧ୍ୟମରେ ଦଫା ଦଫାରେ ଶ୍ରଦ୍ଧାଳୁଙ୍କୁ ଛଡ଼ାଯିବ । ଶ୍ରୀମନ୍ଦିର ଭିତରେ ଓ ବାହାରେ କଡ଼ା ସୁରକ୍ଷା ବ୍ୟବସ୍ଥା ରହିବ ବୋଲି ଗଣମାଧ୍ୟମକୁ ସୂଚନା ଦେଇଛନ୍ତି ଏସ୍ପି । ସ୍ନାନଯାତ୍ରାରେ ଶୃଙ୍ଖଳିତ ନୀତି କାନ୍ତି, ଶ୍ରଦ୍ଧାଳୁଙ୍କ ଶୃଙ୍ଖଳିତ ଦର୍ଶନ, ଭିଡ଼ ନିୟନ୍ତ୍ରଣ, ଟ୍ରାଫିକ ସୁପରିଚାଳନା, ଭିଆଇପିଙ୍କ ସୁରକ୍ଷା, ସୁରକ୍ଷିତ ସମୁଦ୍ର ସ୍ନାନ ପାଇଁ ୪ ଜଣ ଏସ୍ପି, ୧୨ ଜଣ ଅତିରିକ୍ତ ଏସ୍ପି, ୩୫ ଜଣ ଇନ୍ସପେକ୍ଟର ସହ ୭୦ ପ୍ଲାଟୁନ୍ଫୋର୍ସ ନିୟାଜିତ ହେବେ ବୋଲି ପୁଲିସ ପକ୍ଷରୁ ଆଲୋଚନା କରାଯାଇଛି । କିନ୍ତୁ ଏଥିନେଇ ଆଲୋଚନା ଜାରି ରହିଥିବା ଯୋଗୁଁ ଆବଶ୍ୟକ ପଡ଼ିଲେ ଫୋର୍ସ ଓ ଅଧିକାରୀଙ୍କ ସଂଖ୍ୟା ବଢ଼ିପାରେ ବୋଲି ଏସ୍ପି କହିଛନ୍ତି ।
ପ୍ରଥମ ଥର ପାଇଁ ସ୍ନାନଯାତ୍ରା ଓ ରଥଯାତ୍ରା ନିୟନ୍ତ୍ରଣ କରିବେ ଏସ୍ପି ଶ୍ରୀ ମିଶ୍ର । ଅନେକ ବର୍ଷ ଧରି ସ୍ନାନଯାତ୍ରା ଓ ରଥଯାତ୍ରାର ଅଭିଜ୍ଞତା ଥିବା ପୁରୀର ସାମ୍ବାଦିକମାନଙ୍କ ସହ ଏସ୍ପି ଆଲୋଚନା କରିଛନ୍ତି । ସ୍ନାନଯାତ୍ରା ଓ ରଥଯାତ୍ରାକୁ ସୁରୁଖୁରୁରେ ସମ୍ପାଦନ କରିବା ପୁଲିସ ପ୍ରଶାସନ ପାଇଁ ଏକ ପ୍ରମୁଖ ଚ୍ୟାଲେଞ୍ଜ ହେବ ବୋଲି କୁହାଯାଉଥିବାବେଳେ ସାମ୍ବାଦିକଙ୍କ ସହଯୋଗ ଲୋଡ଼ିଛନ୍ତି ଏସ୍ପି । ବୈଠକରେ ଏସ୍ପି ଶ୍ରୀ ମିଶ୍ରଙ୍କ ସହ ଅତିରିକ୍ତ ଏସ୍ପି ସୁଶୀଲ ମିଶ୍ର, ବିଷ୍ଣୁପ୍ରସାଦ ପତି, ସିଟି ଡିଏସ୍ପି ପ୍ରଶାନ୍ତ କୁମାର ସାହୁ, ଟ୍ରାଫିକ୍ ଡିଏସ୍ପି ଚନ୍ଦନ ଘଡ଼େଇଙ୍କ ସହ ଗଣମାଧ୍ୟମ ପ୍ରତିନିଧିମାନେ ଉପସ୍ଥିତ ଥିଲେ ।
