ନୂଆଦିଲ୍ଲୀ,୧୦/୦୨: ଚୀନ୍ର ହାଲ ବେହାଲ । ଅର୍ଥନୈତିକ ମୋର୍ଚ୍ଚାରେ ଏହାର ସ୍ଥିତି ଆହୁରି ବିକୃତ ପାଲଟିଛି । ଭାରତୀୟ ଅର୍ଥନୀତି ଦ୍ରୁତ ବେଗରେ ମାଡ଼ିଚାଲିଥିବାବେଳେ ଚୀନ୍ ଅର୍ଥବ୍ୟବସ୍ଥା ସଂଘର୍ଷ କରୁଛି । ଏବେ ବିଶ୍ୱର ବିଭିନ୍ନ ପ୍ରାନ୍ତର ନିବେଶକ ଚୀନ୍କୁ ଛାଡ଼ି ଭାରତରେ ଟଙ୍କା ଲଗାଉଛନ୍ତି । ଭାରତୀୟ ସେୟାର ବଜାରର ଏମ୍କ୍ୟାପ୍ ବା ବଜାର ମୂଲ୍ୟ ହଂକଂକୁ ପଛରେ ପକାଇଦେଇଛି । ହଂକଂକୁ ଟପି ଭାରତ ବିଶ୍ୱର ଚତୁର୍ଥ ବୃହତ୍ ଷ୍ଟକ ବଜାର ପାଲଟିଛି । ଏବେ ଭାରତ ଟ୍ରେଡିଂ ଭଲ୍ୟୁମ୍ କ୍ଷେତ୍ରରେ ବି ଚୀନ୍କୁ ମାତ୍ ଦେଇଛି । ଭାରତୀୟ ବଜାର ସୂଚକାଙ୍କ ବିଏସ୍ଇ ଏବଂ ଏନ୍ଏସ୍ଇ ଏବେ ଟ୍ରେଡିଂ ଭଲ୍ୟୁମ୍ କ୍ଷେତ୍ରରେ ହଂକଂକୁ ଟପିଗଲେଣି ।
ଏକ ମାସରେ ବିଏସ୍ଇ ଏବଂଏନ୍ଏସ୍ଇର ହାରାହାରି ଟ୍ରେଡିଂ ଭଲ୍ୟୁମ୍ ଦୈନିକ ୧୬୫୦ କୋଟି ଡଲାରରେ ପହଞ୍ଚିଛି । ତୁଳନାତ୍ମକ ହିସାବ କଲେ ହଂକଂ ସେୟାର ବଜାରର ହାରାହାରି ଟ୍ରେଡିଂ ଭଲ୍ୟୁମ୍ ଦୈନିକ ୧୩୧୦ କୋଟି ଡଲାର ରହିଛି । ଲଗାତର ଅଷ୍ଟମ ବର୍ଷ ପାଇଁ ଭାରତୀୟ ଇକ୍ୱିଟି ବଜାରରେ ଅଭିବୃଦ୍ଧି ଘଟିଛି । ଅନ୍ୟପକ୍ଷରେ, ହଂକଂର ହାଙ୍ଗ୍ସେଙ୍ଗ୍ରେ ଲଗାତର ଚତୁର୍ଥ ବର୍ଷ ପାଇଁ ହ୍ରାସ ଦେଖାଦେଇଛି । ସେହିଭଳି ଚୀନ୍ର ସାଂଘାଇ ଷ୍ଟକ୍ ଏକ୍ସଚେଞ୍ଜରେ ଲଗାତର ଦ୍ୱିତୀୟ ବର୍ଷ ହ୍ରାସ ଦେଖାଦେଇଛି ।
ବଜାର ତଥ୍ୟ ଅନୁସାରେ, ଗତ ୨ରୁ୩ ମାସରେ ହଂକଂର ଟ୍ରେଡିଂ ଭଲ୍ୟୁମ୍ କମୁଛି । ତେବେ ଭାରତରେ ଏଥିରେ ବୃଦ୍ଧି ଦେଖିବାକୁ ମିଳୁଛି । ରିପୋର୍ଟ ଅନୁସାରେ, ଭାରତର ସେନ୍ସେକ୍ସ ଗତବର୍ଷ ପ୍ରାୟ ୧୭% ବଢ଼ିଛି । ଅନ୍ୟପକ୍ଷରେ ହଂକଂର ହ୍ୟାଙ୍ଗ୍ସେଙ୍ଗ୍ ପ୍ରାୟ ୨୭% ଖସିଛି । ଗତମାସ ଭାରତ ବିଶ୍ୱର ଚତୁର୍ଥ ବୃହତ୍ ଇକ୍ୱିଟି ବଜାର ଭାବେ ହଂକଂକୁ ଟପିଯାଇଛି ।
ଚୀନ୍ର ମନ୍ଥର ଅର୍ଥବ୍ୟବସ୍ଥାକୁ ଦେଖି ଏବେ ନିବେଶକ ଏଠାରୁ ମୁହଁ ଫେରାଇବାକୁ ଲାଗିଲେଣି । ନିବେଶକ ‘ବାୟ ଇଣ୍ଡିଆ ସେଲ୍ ଚାଇନା’ ରଣନୀତି ନେଇ ଚାଲୁଛନ୍ତି । ଚୀନ୍ ସରକାରଙ୍କ ଉପରୁ ନିବେଶକ ଆସ୍ଥା ହରାଉଥିବା ଜଣାପଡ଼ିଛି।
