ନୀଳଗିରି,୧୮/୭ : ଫକୀରମୋହନ କଲେଜରେ ଦିଲ୍ଲୀରୁ ୟୁଜିସିର ୫ଜଣିଆ ଫ୍ୟାକ୍ଟ ଫାଇଣ୍ଡିଂ ଟିମ୍ ଦୀର୍ଘ ୫ ଘଣ୍ଟା ତଦନ୍ତ କରି ଫେରିଛି । ଏଥିରେ ୫ଜଣ ଛାତ୍ର ଓ ୨ ଜଣ ଛାତ୍ରୀଙ୍କୁ ତଦନ୍ତ ପରିସରଭୁକ୍ତ କରିଛି ଏହି ଟିମ୍ । ବହୁ ସମୟ ଧରି ତଦନ୍ତ କରିବା ପରେ ଆଜି ନିଷ୍କର୍ଷ ବାହାରି ପାରିନଥିବା ଜଣାପଡିଛି । ପୁଣି ଆସନ୍ତାକାଲି ଏହି ଟିମ୍ ଆଇସିସି ସଦସ୍ୟଙ୍କୁ ପଚରାଉଚରା କରିବ ବୋଲି ୟୁଜିସିର ତଦନ୍ତକାରୀ ଅଧିକାରୀ ରାଜକୁମାର ମିତ୍ତଲ, ସୁଷମା ଯାଦବ ପ୍ରକାଶ କରିଛନ୍ତି।
ସୂଚନାଯୋଗ୍ୟ ଯେ, ଏଫଏମ କଲେଜ ଛାତ୍ରୀ ସୌମ୍ୟାଶ୍ରୀ ବିଶି ଗତ ୧୨ ତାରିଖରେ କଲେଜ ପରିସରରେ ଆତ୍ମାହୁତି ଉଦ୍ୟମ କରିଥିଲେ। ଗୁରୁତର ଅବସ୍ଥାରେ ତାଙ୍କୁ ଭୁବନେଶ୍ବର ଏମ୍ସରେ ଭର୍ତ୍ତି କରାଯାଇଥିଲା। ଶରୀରର ୯୫ ପ୍ରତିଶତ ଅଂଶ ପୋଡ଼ି ଯାଇଥିବାବେଳେ ସ୍ବାସ୍ଥ୍ୟାବସ୍ଥା ଅତ୍ୟନ୍ତ ସଙ୍କଟାପନ୍ନ ହୋଇଥିଲା। ସୋମବାର ରାତିରେ ସେ ଆଖି ବୁଜିଥିଲେ। ବାଲେଶ୍ବର ଜିଲ୍ଲା ଭୋଗରାଇ ଅଞ୍ଚଳରେ ଥିବା ତାଙ୍କ ଜନ୍ମମାଟିରେ ମଙ୍ଗଳବାର ତାଙ୍କର ଅନ୍ତିମ ସଂସ୍କାର କରାଯାଇଥିଲା। ଏହି ଘଟଣାରେ ଏଫ୍ଏମ୍ କଲେଜ ଅଧ୍ୟକ୍ଷ ଓ ଏଚଓଡିଙ୍କୁ ଉଚ୍ଚଶିକ୍ଷା ବିଭାଗ ନିଲମ୍ବିତ କରିଥିଲା। ଏଥିସହ ପୁଲିସ ଏଚଓଡି ସମୀର ସାହୁ ଓ କଲେଜ ଅଧ୍ୟକ୍ଷଙ୍କୁ ଗିରଫ କରିଥିଲା।
