ଫିରିଙ୍ଗିଆ, ୦୯/୦୯ : କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକର ଲୋଇସିଂ ଓ ବାଲନ୍ଦାପଡ଼ା ଅଞ୍ଚଳରେ ଗାଈଗୋରୁ ଏବଂ ଛେଳିମେଣ୍ଢାମାନଙ୍କୁ ବସନ୍ତ ରୋଗ ବ୍ୟାପିବା ଓ ଚିକିତ୍ସା ନପାଇ ଛେଳିମେଣ୍ଢାମାନଙ୍କର ମୃତ୍ୟ ଘଟଣା ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପାଇଥିଲା। ଏହା ପରେ ପଶୁସମ୍ପଦ ବିଭାଗ ତତ୍ପରତା ପ୍ରକାଶ କରିଛି। ଦୁଇଦିନ ହେଲା ଲଗାଣ ବର୍ଷା ଲାଗି ରହିଥିବା ସତ୍ୱେ ପଶୁସମ୍ପଦ ବିଭାଗର ଏକ ଚାରି ଜଣିଆ ଡାକ୍ତରୀ ଟିମ୍ ଏହି ଅଞ୍ଚଳରେ ପହଞ୍ଚିଛି।

ସୂଚନା ଅନୁସାରେ, ଫିରିଙ୍ଗିଆ ବ୍ଲକରେ ପଶୁସମ୍ପଦ ବିଭାଗର କର୍ମଚାରୀ ଅଭାବ ରହିଥିବାରୁ ପଶୁମାନେ ସ୍ୱାସ୍ଥ୍ୟ ସେବାରୁ ବଞ୍ଚିତ ହୋଇ ଆକାରଣରେ ମରୁଛନ୍ତି। ଏହାକୁ ନେଇ ଅଞ୍ଚଳବାସୀ ବାରମ୍ବାର ଅଭଯୋଗ କରି ଆସୁଥିଲେ ମଧ୍ୟ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉ ନଥିବାରୁ ଅଞ୍ଚଳରେ ଅସନ୍ତୋଷ ଦେଖାଦେଇଛି। ଏହି ପରିପ୍ରେକ୍ଷୀରେ କିଛିଦିନ ତଳେ ଲୋଇସିଂ ଅଞ୍ଚଳର ଯୁବ ସମାଜ ଶେବି ଆଲୋକ କହଁର ସମସ୍ୟାକୁ ନେଇ ବିଭିନ୍ନ ଗଣମାଧ୍ୟମକୁ ଖବର ଦେଇଥିଲେ। ଗଣମାଧ୍ୟମରେ ଖବର ପ୍ରକାଶ ହେବାପରେ ସୋମବାର ଅଞ୍ଚଳରେ ଡାକ୍ତରୀ ଟିମ୍ ପହଞ୍ଚି ପଶୁମାନଙ୍କ ଚିକିତ୍ସା ଆରମ୍ଭ କରିଛନ୍ତି। ଫୁଲବାଣୀର ବରିଷ୍ଠ ପଶୁ ଡାକ୍ତର ଆୟୁଷ୍ମାନ ସାହୁଙ୍କ ନେତୃତ୍ୱରେ ଏହି ଟିମ୍ ଅଞ୍ଚଳରେ ପଶୁମାନଙ୍କ ଚିକିତ୍ସା ଆରମ୍ଭ କରିଥିବା ବେଳେ ଟିମ୍‌ରେ ବାଳନ୍ଦାପଡ଼ା ଏଲାଇ ଅଶୋକ ପାତ୍ର ଓ କ୍ରାଣ୍ଡିବାଲି ପଶୁ ସହାୟକ ସହ ଗୋଛାପଡାର ପଶୁ ସହାୟକ ମଧ୍ୟ୍ୟ ଉପସ୍ଥିତ ଅଛନ୍ତି।