ଭୁବନେଶ୍ୱର, ୦୩।୦୮ : ଷ୍ଟାର ବକ୍ସରେ କାମ କରୁଥିଲେ... ହେଲେ ଝିଅମାନଙ୍କୁ କହୁଥିଲେ ମୁଁ ଦୁବାଇ ରିଟର୍ଣ୍ଣ। ଏମିତି ଅନେକ ମିଛ କହି ଝିଅମାନଙ୍କୁ ନିଜ ଜାଲରେ ଫଶାଉଥିଲେ। ବିବାହ କରିବା ପରେ ସେମାନଙ୍କ ଠାରୁ ଟଙ୍କା ଲୁଟୁଥିଲା। ହେଲେ ଏହି ରସିକିଆ ପ୍ରେମିକକୁ ନିଜ ଜାଲରେ ଫଶେଇଦେଲେ ପୋଲିସ ପ୍ରେମିକା। ଲଙ୍ଗ୍ ଡ୍ରାଇଭର୍ରେ ଯାଉଥିବା ବେଳେ ବାନ୍ଧିଲା କ୍ୟାପିଟାଲ ଥାନା ପୋଲିସ।
ସୂଚନାନୁଯାୟୀ, ଯାଜପୁରର ସତ୍ୟଜିତ ସାମଲ ନାମକ ଜଣେ ଯୁବକଙ୍କ ନାମରେ ଏଭଳି ସାଙ୍ଘାତିକ ଅଭିଯୋଗ ଆସିଛି। ସେ ଝିଅମାନଙ୍କୁ ଦୁବାଇରୁ ଆସିଛି କହି ପ୍ରେମ କରୁଥିଲେ। ଏହାପରେ ସେମାନଙ୍କୁ ବିବାହ ବି କରୁଥିଲେ। ମହିଳାମାନଙ୍କୁ ନିଜ ସହ ଶାରିରୀକ ସମ୍ପର୍କ ରଖିବାକୁ ବାଧ୍ୟ କରୁଥିଲେ। ସେମାନଙ୍କ ଠାରୁ ବିଭିନ୍ନ ଉପାୟରେ ଟଙ୍କା ନେଉଥିଲେ। ଆଉ ନିଜର କାମ ସରିବା ପରେ ସେମାନଙ୍କୁ ଧମକ ଚମକ ଦେଇ ଡିଭୋର୍ସ ନେଉଯାଉଥିଲେ। ଏହିଭଳି ଭାବେ ଏକାଧିକ ମହିଳାଙ୍କୁ ଠକି ଦୁବାଇ ଚାଲି ଯାଉଥିଲେ।
ଏନେଇ କ୍ୟାପିଟାଲ ଥାନାରେ ଏକାଧିକ ଅଭିଯୋଗ ହୋଇଥିଲା। ଏହା ପରେ ଆକ୍ସନକୁ ଆସିଥିଲା କ୍ୟାପିଟାଲ ଥାନା ପୋଲିସ। ରସିକିଆ ଠକକୁ ଧରିବା ଲାଗି ପ୍ରେମିକା ସାଜିଥିଲେ ମହିଳା ପୋଲିସ। ଆଉ କାର୍ରେ ଲଙ୍ଗ୍ ଡ୍ରାଇଭ୍ରେ ଯିବାବେଳେ ତାଙ୍କୁ ଗିରଫ କରିବାରେ ପୋଲିସ ସଫଳ ହୋଇଛି। ତାଙ୍କ ନିକଟରୁ ବିଭିନ୍ନ ବ୍ୟାଙ୍କ୍ କାଗଜପତ୍ର ଓ ନଗଦ ଟଙ୍କା ଜବତ କରାଯାଇଛି। ପୋଲିସ ଏବେ ସତ୍ୟଜିତଙ୍କୁ ଅଟକ ରଖି ପଚରାଉଚୁରା କରୁଛି।
