ପୁରୀ,୨୮/୦୭: ଓଟ ହତ୍ୟା ମାମଲାରେ ଜଣେ ଜେଲ୍ ଫେରନ୍ତାକୁ ବାନ୍ଧିଲା ବଳିଆପଣ୍ଡା ଥାନା ପୁଲିସ । ସେ ହେଲା ବଳିଆପଣ୍ଡା ମହାରଣା ସାହି ସୌମ୍ୟ ରଞ୍ଜନ ବାରିକ ଓରଫ ବାଉଁ(୨୩) । ଦୀର୍ଘ ୧୦ ଦିନ ପରେ ଜେଲ୍ ଫେରନ୍ତା ବାଉଁକୁ ଗିରଫ କରାଯାଇଥିବାବେଳେ ମାମଲାରେ ଏକାଧିକ ଅଭିଯୁକ୍ତ ଫେରାର୍ ଥିବା ଜଣାପଡ଼ିଛି । ଶନିବାର ତାକୁ କୋର୍ଟ ଚାଳାଣ କରାଯାଇଛି । ଜାମିନ ନାମଞ୍ଜୁର ହେବାରୁ ତାକୁ ଜେଲ୍ ପଠାଇ ଦିଆଯାଇଥିବା ଏସ୍ଆଇ ନାରାୟଣ ପ୍ରଧାନ ସୂଚନା ଦେଇଛନ୍ତି । ତେବେ ମାମଲାରେ ବଗ, ପିଲା, ମାଧିଆ ଓ ଶିବ ନାମକ ଆଉ ୪ ଜଣ ଫେରାର୍ ଥିବା ସୂଚନା ମିଳିଛି ।
ବଳିଆପଣ୍ଡାରେ ରହୁଥିବା ଧନେଶ୍ୱର ଜେନାଙ୍କୁ ଦାଦାବଟି ମାଗିଥଲେ ଦୁର୍ବୃତ୍ତ । ବେଳାଭୂମିରେ ଓଟ ଚଳାଇ ପରିବାର ପୋଷୁଥିବା ଧନେଶ୍ୱର ବଟି ଦେବାକୁ ମନା କରିବାରୁ ତାଙ୍କ ଓଟକୁ ଗତ ୧୭ ତାରିଖ ଭୋର୍ରେ ଓଟକୁ ଅପହରଣ କରି ନେଇ ହତ୍ୟା କରିଥିଲେ । ଅପରାହ୍ନରେ ଓଟର ମୃତଦେହ ପାଇ ବଳିଆପଣ୍ଡାର ବାଲି ପଡ଼ିଆ ଖୋଳି ପୋତିଥିଲେ ଧନେଶ୍ୱର । ମାମଲା ରୁଜୁ ପରେ ୨୨ ତାରିଖରେ ବାଲି ଖୋଲି ଓଟକୁ ବ୍ୟବଚ୍ଛେଦ କରାଇଥିଲା ପୁଲିସ । ଏସ୍ପି ପିନାକ ମିଶ୍ର ମାମଲାରେ ହସ୍ତକ୍ଷେପ କରିଥିଲେ । ଦୀର୍ଘ ୧୦ ଦିନପରେ ବାଉଁକୁ ଗିରଫ କରିଛି । ବାଉଁ ଏକାଧିକ ମାମଲାରେ ଜଡ଼ିତ ଥିବାବେଳେ ଜେଲ୍ ଯାଇ ଜାମିନ୍ରେ ଫେରିଥିବା ପୁଲିସ କହିଛି । ମାମଲାରେ ଆହୁରି ଏକାଧିକ ଫେରାର୍ ଥିବା ପୁଲିସ କହିଛି । ଅଭିଯୁକ୍ତଙ୍କୁ ଖସାଇବା ପାଇଁ କିଛି ପ୍ରଭାବଶାଳୀ ବ୍ୟକ୍ତି ଦୀର୍ଘ ୧୦ ଦିନ ଧରି ଉଦ୍ୟମ ଜାରି ରଖିଥିବା ସୂଚନା ମିଳିଛି।
