ଫିରିଙ୍ଗିଆ,୩l୯ : ସରକାର  ଜନସାଧାରଣଙ୍କ ହିତ ପାଇଁ ବିଭିନ୍ନ ସୁବିଧା ସୁଯୋଗ ଯୋଗାଇ ଦେଉଛନ୍ତି । ତହିଁରୁ ସମସ୍ତ ଗରିବ ଖଟିଖିଆ ଶ୍ରେଣୀର ଲୋକମାନେ ଉପକୃତ ହେଉଛନ୍ତି । ହେଲେ ଆଉ କିଛି ଗ୍ରାମାଞ୍ଚଳ ଓ ଜଙ୍ଗଲରେ ବସବାସ କରୁଥିବା ଲୋକମାନେ ସେଥିରୁ ବାଦ୍ ପଢୁଛନ୍ତି । ଖାଲି ଏତିକି ନୁହେଁ, ସେମାନେ ମୌଳିକ ସୁବିଧାରୁ ବଂଚିତ ହେଉଛନ୍ତି । ଏମିତି ଏକ ଘଟଣା ଦେଖିବାକୁ ମିଳିଛି କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ପକାରି ପଂଚାୟତ ଅନ୍ତର୍ଗତ ଗଞ୍ଜୁ  ଗାଁ ରେ । ଗ୍ରାମର  ବାସୁଦେବ କହଁର (୪୦) ଆଧାର କାର୍ଡ, ଭୋଟ ପରିଚୟ ପତ୍ର, ରାସନ କାର୍ଡ ଭଳି ମୌଳିକ ସୁବିଧାରୁ ବଞ୍ଚିତ ରହିଛନ୍ତି |

ସ୍ତ୍ରୀ ଦର୍ଶନୀ କହଁର (୩୫) ଓ ପୁତ୍ର ମିଥୁନ କହଁର (୪)ଙ୍କୁ ନେଇ ବାସୁଦେବଙ୍କ ପରିବାର । ହେଲେ ବାସୁଦେବଙ୍କ ଆଧାର କାର୍ଡ,  ଭୋଟର୍ କାର୍ଡ ଓ ରାସନ କାର୍ଡ ନାହିଁ   ।  ଆଧାର କାର୍ଡ ନ ଥିବାରୁ ପ୍ରଧାନମନ୍ତ୍ରୀ ଆବାସ ଯୋଜନା ଓ ବିଦ୍ୟୁତ୍ ସଂଯୋଗରୁ ମଧ୍ୟ ବାସୁଦେବଙ୍କ ପରିବାର ବଞ୍ଚିତ ଅଛନ୍ତି । ବାସୁଦେବଙ୍କ କହିବା ଅନୁସାରେ  ସେ ଆଧାର କାର୍ଡ ଓ ଭୋଟର୍ କାର୍ଡ ପାଇଁ ବହୁବାର ଫୁଲବାଣୀ ଓ ଫିରିଙ୍ଗିଆ ଯାଇଛନ୍ତି । ହେଲେ କିଛିବି ସୁଫଳ ମିଳିନାହିଁ  । ଫୁଲବାଣୀ ଓ ଫିରିଙ୍ଗିଆକୁ ବାରମ୍ବାର ଯିବା ଆସିବା ପାଇଁ ତାଙ୍କ ପାଖରେ ପଇସା ନାହିଁ  । ତେଣୁ ନିରାଶ ହୋଇ ଆଉ ଯାଉ ନାହିଁ  । ବାସୁଙ୍କ ଆଧାର କାର୍ଡ ନ ଥିବାରୁ  ପାଇଁ ତାଙ୍କ ପୁଅର ଜନ୍ମ ସାର୍ଟିଫିକେଟ,  ଆଧାର କାର୍ଡ ହୋଇ ପାରୁ ନାହିଁ  ବୋଲି ସେ କହିଛନ୍ତି ।