ପୁରୀ,୦୮/୦୮: ଭାରତ ପଡୋଶୀ ରାଜ୍ୟ ବାଂଲାଦେଶରେ ଦିନକୁ ଦିନ ହିଂସା ବୃଦ୍ଧି ପାଉଛି । ବାଂଲାଦେଶରୁ ଜଳପଥରେ ଭାରତକୁ ଅନୁପ୍ରବେଶ ବୃଦ୍ଧି ପାଇବା ଆଶଂକା ରହିଛି । ଏନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏକ ବୈଠକ ଏନେଇ ସମୀକ୍ଷା କରିଛନ୍ତି । ସମୁଦ୍ର ପଥରେ ବାଂଲାଦେଶୀ ପଶିଆସିବା ନେଇ ଗୁଇନ୍ଦା ବିଭାଗ ସୂଚନା ଦେବା ପରେ ହାଇଆଲର୍ଟ ଜାରି କରିଛନ୍ତି କେନ୍ଦ୍ର ସରକାର । ଦେଶର ପୂର୍ବ ଉପକୂଳ ରାଜ୍ୟଗୁଡ଼ିକୁ କେନ୍ଦ୍ର ସରକାର ସତର୍କ ରହିବାକୁ ନିର୍ଦ୍ଦେଶ ଦେଇଛନ୍ତି । ଏହିକ୍ରମରେ ପୁରୀ ଜିଲ୍ଲା ସମୁଦ୍ର ଉପକୂଳରେ ସୁରକ୍ଷା ଉପରେ ନଜର ରଖାଯାଇଥିବା ନେଇ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ୱାଇଁ ବୁଧବାର ଗଣମାଧ୍ୟମକୁ ସୂଚନା ଦେଇଛନ୍ତି ।
ସେ ଆହୁରି ମଧ୍ୟ କହିଛନ୍ତି, ସେଥିଲାଗି କୋଷ୍ଟଗାର୍ଡ ଓ ଭାରତୀୟ ନୌବାହିନୀ ସମ୍ପୂର୍ଣ୍ଣ ପ୍ରସ୍ତୁତ ରହିଛନ୍ତି । କୋଷ୍ଟଗାର୍ଡ ସହ ମେରାଇନ୍ ପୁଲିସ ଯୋଗାଯୋଗ ରଖି ସମୁଦ୍ର ପଥରେ ଅଧିକ ମାତ୍ରାରେ ପେଟ୍ରୋଲିଂ କରାଯାଉଛି । ବାଂଲାଦେଶୀ ଅନୁପ୍ରବେଶ ନେଇ ଏବେ ସେଭଳି କିଛି ସୂଚନା ଆସିନାହିଁ । ତଥାପି ପ୍ରଶାସନ ସଜାଗ ରହିଛି । ଏନେଇ ସାଧାରଣ ଲୋକଙ୍କୁ ସତର୍କ ସୂଚନା ଦେବା ଠିକ୍ ନୁହେଁ । ସମୟ ଆସିଲେ ଲୋକଙ୍କୁ ସୂଚନା ପ୍ରଦାନ କରାଯିବ ।
ସେହିଭଳି ଏସ୍ପି ପିନାକ ମିଶ୍ର କହିଛନ୍ତି, ଜଳପଥରେ ବାଂଲାଦେଶୀ ପଟୁ ଅନୁପ୍ରବେଶ ନେଇ କେନ୍ଦ୍ର ସରକାରଙ୍କ ପକ୍ଷରୁ ପୁରୀ ପୁଲିସକୁ କୌଣସି ସୂଚନା ଆସିନାହିଁ । କିନ୍ତୁ ପୁରୀ ପୁଲିସ ସତର୍କ ରହିଛି । ସର୍ବଦା ଅନୁପ୍ରବେଶକୁ ନଜରରେ ରଖି କୋଷ୍ଟଗାର୍ଡ ସହିତ ମେରାଇନ୍ ପୁଲିସ ନିୟମିତ ପାଟ୍ରୋଲିଂ କରୁଛି । ସମୟ ସମୟରେ କିଛି ସାମ୍ପ୍ରତିକ ଘଟଣାକୁ ଦୃଷ୍ଟିରେ ରଖି ସଙ୍ଗେ ସଙ୍ଗେ ସୁରକ୍ଷା ବଢାଇ ଦିଆଯାଇଥାଏ । ବିଶେଷ ଭାବେ ଅସ୍ତରଙ୍ଗ, ଅରଖକୁଦା ମେରାଇନ୍ ଥାନାକୁ କଡ଼ା ନଜର ରଖିବାକୁ ନିର୍ଦ୍ଦେଶ ଦିଆଯାଇଛି । ଏସମ୍ପର୍କରେ ଯୁବ ସମାଜସେବୀ ହେକ୍ଟର ମିଶ୍ର କହିଛନ୍ତି, ପୁରୀ ଏକ ସମ୍ବେଦନଶୀଳ ସ୍ଥାନ ଏଠାକୁ ଅଧିକାଂଶ ସମୟରେ ପର୍ଯ୍ୟଟକମାନେ ଆସିଥାନ୍ତି । ତେଣୁ ଏଠାରେ ଅନୁପ୍ରବେଶକାରୀ ସହଜରେ ସାଧାରଣ ଲୋକଙ୍କ ମେଳରେ ଆତ୍ମଗୋପନ କରିବା ସହଜ ହେବ । ତେଣୁ ଜଳ ପଥରେ ବାଂଲାଦେଶୀ ଅନୁପ୍ରବେଶ ଆଶଙ୍କା ଅଧିକ । ଏସବୁ ଦୃଷ୍ଟିରୁ ଜିଲ୍ଲାର ମେରାଇନ ଥାନାଗୁଡ଼ିକରେ ପର୍ଯ୍ୟାପ୍ତ କର୍ମଚାରୀ ରହିବା ଜରୁରୀ । ହେଲେ ବର୍ତ୍ତମାନ ଏଠାରେ ସବୁ କିଛି ଠାକୁରଙ୍କ ଭରସାରେ ଚାଲିଛି । ତେବେ ଏହା ଉପରେ ଜିଲ୍ଲା ଓ ପୁଲିସ ପ୍ରଶାସନ ଅଧିକ ସଜାଗ ରହିବା ଆବଶ୍ୟକ । ସେହିପରି ସାଧାରଣ ଲୋକଙ୍କୁ ଜିଲ୍ଲା ପୁଲିସ ପକ୍ଷରୁ ବ୍ୟାପକ ସଚେତନ କରାଯାଉ । ସ୍ଥାନୀୟ ଅଞ୍ଚଳରେ କୌଣସି ଅଜଣା ବ୍ୟକ୍ତି ନଜରକୁ ଆସିଲେ ସଙ୍ଗେ ସଙ୍ଗେ ନିକଟସ୍ଥ ଥାନାକୁ ଖବର ଦେବେ । ନଚେତ୍ ପୁଲିସ ତରଫରୁ ଏକ ହେଲପ ଲାଇନ୍ ନମ୍ବର ମଧ୍ୟ ଜାରି କରିବା ଜରୁରୀ ।
