ପ୍ୟାରିସ୍,୦୨/୦୮: ଆଜି ଆଥ୍ଲେଟିକ୍ସରେ ମୋଟ୍ ୧୩ଟି ଇଭେଣ୍ଟ ଆୟେଜିତ ହେବ । ଏଗୁଡ଼ିକ ମଧ୍ୟରେ କେବଳ ପୁରୁଷ ବର୍ଗ ୧୦,୦୦୦ ମିଟର ଇଭେଣ୍ଟରେ ପଦକ ପାଇଁ ପ୍ରତିଦ୍ୱନ୍ଦ୍ୱିତା ହେବ । ବାକି ସବୁ ଇଭେଣ୍ଟର ପ୍ରାଥମିକ ତଥା ଯୋଗ୍ୟତା ରାଉଣ୍ଡ ଆୟେିଜତ ହେବ । ତଥାପି ଆଥ୍ଲେଟକ୍ସର ବହୁ ପ୍ରସିଦ୍ଧ ତାରକା ଟ୍ରାକ୍କୁ ଓହ୍ଲାଇବେ ।
ଶୁକ୍ରବାର ମହିଳା ବର୍ଗ ୧୦୦ମିଟର ଦୌଡରେ ପ୍ରାଥମିକ ଓ ହିଟ୍ ରାଉଣ୍ଡ ରହିଛି । ଜାମାଇକା ଷ୍ଟାର୍ ସେଲି ଆନ୍ ଫ୍ରେଜର- ପ୍ରାଇସ ଓ ଆମେରିକାର ସା’କାରି ରିଚାର୍ଡସନ୍ ପ୍ରତିଦ୍ୱନ୍ଦ୍ୱିତା କରିବେ । ଏଲାନି ଥମ୍ପସନ ହେରା ଓ ସେରିକା ଜାକସନ ଏହି ଇଭେଣ୍ଟରୁ ଓହରି ଯାଇଥିବାରୁ ଫ୍ରେଜର-ପ୍ରାଇସ ଓ ରିଚାର୍ଡସନଙ୍କ ମଧ୍ୟରେ ଏଥର ସ୍ୱର୍ଣ୍ଣ ପଦକ ପାଇଁ କଡ଼ା ଟକ୍କର ହେବା ଆଶା କରାଯାଉଛି ।
ପୁରୁଷ ବର୍ଗ ୧୦,୦୦୦ ମିଟର ଦୌଡ଼ରେ ପଦକ ଇଭେଣ୍ଟ ରହିଛି । ୨ଥର ବିଶ୍ୱ ଚାମ୍ପିଅନ୍ ଜୋଶୁଆ ଚେପଟେଗି ପ୍ରଥମ ଅଲିମ୍ପିକ୍ସ ଟାଇଟଲ ପାଇଁ ପ୍ରୟାସ କରିବେ । ଡିଫେଣ୍ଡିଂ ଅଲିମ୍ପିକ୍ସ ଚାମ୍ପିଅନ୍ ସେଲେମନ ବରେଗା ତାଙ୍କୁ କଡ଼ା ଟକ୍କର ଦେବାକୁ ପ୍ରସ୍ତୁତ। ଅନ୍ୟମାନଙ୍କ ମଧ୍ୟରେ ୟୋମିଫ କେଚେଲଚା ଓ ବେରିହୁ ଆରେଗାୱି, ଜାକବ କିପଲିମୋ ଓ ଆମେରିକାର ଗ୍ରାଣ୍ଟ ଫିସର ମଧ୍ୟ ପଦକ ଦାବିଦାର ରହିବେ। ଡେକାଥଲନ୍ରେ ଫ୍ରାନ୍ସର କେଭିନ ମେୟର ଓହରି ଯାଇଥିବାରୁ ଡିଫେଣ୍ଡିଂ ଚାମ୍ପିଅନ୍ ଡାମିଆନ ୱାର୍ଣ୍ଣର ଓ ଲିଡର ବୋର୍ଡର ଶୀର୍ଷରେ ରହିଥିବା ଜର୍ମାନୀର ଲିଓ ନ୍ୟୁଗେବ୍ୟୁୟରଙ୍କ ମଧ୍ୟରେ ସ୍ୱର୍ଣ୍ଣ ପଦକ ପାଇଁ ପ୍ରତିଦ୍ୱନ୍ଦ୍ୱିତା ହେବ ।
ମହିଳା ବର୍ଗ ୫୦୦୦ ମିଟର ଦୌଡର ହିଟ୍ ରାଉଣ୍ଡ ସପ୍ତମ ଦିବସର ପ୍ରମୁଖ ଆକର୍ଷଣ ରହିବ । ବିଶ୍ୱର ପ୍ରମୁଖ ୪ପ୍ରତିଯୋଗୀ ସିଫାନ ହାସାନ, ଫେଥ କିପେଗନ, ଗୁଡ଼ାଫ ସେଗେ ଓ ବିଟ୍ରିସ ଚେବେତ ଟ୍ରାକ୍ରେ ଲଢେଇ କରିବେ । କିପେଗନ ୧୫୦୦ମିଟର ଓ ୫୦୦୦ ମିଟର ଦୌଡରେ ବିଶ୍ୱ ଚାମ୍ପିଅନ୍ । ସିଫାନ ହାସାନ ଗତ ଟୋକିଓ ଅଲିମ୍ପିକ୍ସରେ ୫୦୦୦ ମିଟର ଓ ୧୦,୦୦୦ ମିଟର ଦୌଡରେ ସ୍ୱର୍ଣ୍ଣ ଜିତିଥିଲେ । ୧୦,୦୦୦ ମିଟରରେ ସେଗେ ବିଶ୍ୱ ଟାଇଟଲ ହାସଲ କରିଛନ୍ତି । ସେହିପରି ଚେବେତ କ୍ରସ୍ କଣ୍ଟ୍ରି ଓ ୫କିଲୋ ମିଟର ଦୌଡରେ ବିଶ୍ୱ ଚାମ୍ପିଅନ୍ ରହିଛନ୍ତି । ଏହି ଇଭେଣ୍ଟର ଫାଇନାଲ୍ ୫ତାରିଖରେ ଅନୁଷ୍ଠିତ ହେବ ।
ଶୁକ୍ରବାର ଫ୍ରାନ୍ସର ମେଲିନା ରୋବୋର୍ଟ-ମିଚନ ମହିଳା ବର୍ଗ ଡିସ୍କସ ଥ୍ରୋ ଇଭେଣ୍ଟରେ ଷ୍ଟେଡ ଡି ଫ୍ରାନ୍ସକୁ ଓହ୍ଲାଇବେ । ଏଥିସହ ତାଙ୍କ ନାମରେ ଏକ ବିରଳ ରେକର୍ଡ ସ୍ଥାପନ ହେବ । ସେ ସପ୍ତମ ଅଲିମ୍ପିକ୍ସ ଖେଳିବାକୁ ଯାଉଛନ୍ତି । ଆଥିଲେଟିକ୍ସରେ କୌଣସି ମହିଳା ଏପର୍ଯ୍ୟନ୍ତ ଏତେ ସଂଖ୍ୟକ ଅଲିମ୍ପିକ୍ସ ଖେଳି ନାହାନ୍ତି । ବର୍ତ୍ତମାନ ତାଙ୍କ ବୟସ ୪୫ ବର୍ଷ । ଏହି ବୟସରେ ଅଲିମ୍ପିକ୍ସକୁ ଯୋଗ୍ୟତା ଅର୍ଜନ କରିବା ଅସମ୍ଭବ ମନେ ହେଉଛି ।
