କୋରାପୁଟ,୦୧/୦୯: କୋରାପୁଟ ଜିଲ୍ଲା ପଟ୍ଟାଙ୍ଗି ବ୍ଲକ୍ କୋଟିଆରେ ଅନୁପ୍ରବେଶ ଜାରି ରଖିଛି ଆନ୍ଧ୍ର । ସ୍ଥାନୀୟ ଜିଲ୍ଲା ପ୍ରଶାସନର ବାରମ୍ବାର ବିରୋଧ ସତ୍ତେ୍ୱ ଅମାନିଆ ହେଉଛି । ଆନ୍ଧ୍ର ଅଧିକାରୀମାନେ ଆସି ଗତ ୨୩ ତାରିଖରେ ପଞ୍ଚାୟତର ୩ଟି ଗାଁରେ ଗ୍ରାମସଭା କରିଛନ୍ତି । ସ୍ୱାଧୀନତା ଦିବସରେ ବିଭିନ୍ନ ଗାଁରେ ସ୍ୱାଧୀନତା ଦିବସ ମଧ୍ୟ ପାଳନ କରାଯାଇଛି । ଆଗକୁ ଏହି ପଞ୍ଚାୟତର ବିଭିନ୍ନ ସ୍ଥାନରେ ମେଗା ହେଲ୍ଥ କ୍ୟାମ୍ପ୍ କରିବାକୁ ଯୋଜନା କରୁଛି ଆନ୍ଧ୍ର ।
କୋଟିଆ ସୀମା ବିବାଦକୁ ନେଇ ରଜ୍ୟ ରାଜନୀତିରେ ତୁମ୍ଭି ତୋଫାନ ଲାଗି ରହିଛି । ଗତବର୍ଷ ଉତ୍କଳ ଦିବସ ପାଳନ ଅବସରରେ କୋଟିଆ ଗସ୍ତରେ ଥିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କେତେକ ଆନ୍ଧ୍ର ଅଧିକାରୀଙ୍କୁ ଏଠାରୁ ତଡ଼ିଥିଲେ । ଯାହା ସେହି ସମୟରେ ଚର୍ଚ୍ଚାର ବିଷୟ ପାଲଟିଥିଲା । ସୀମାନ୍ତ ଜିଲ୍ଲା ଗୁଡ଼ିକର ସାମ୍ପ୍ରତିକ ସ୍ଥିତି ସମ୍ପର୍କରେ ଜାଣିବାକୁ ୧୫ ଦିନିଆ ଗୋପନୀୟ ରିପୋର୍ଟ ଏବଂ ବାର୍ଷିକ ସୀମାପଥ ଯାଞ୍ଚ ତଥ୍ୟ ରାଜ୍ୟ ସରକାରଙ୍କ ପକ୍ଷରୁ ସମସ୍ତ ଜିଲ୍ଲାକୁ ମଗାଯାଉଛି । ହେଲେ କୋରାପୁଟ ଜିଲ୍ଲା ପ୍ରଶାସନ ପକ୍ଷରୁ ବାସ୍ତବ ତଥ୍ୟ ସଂଗ୍ରହ ହେଉନଥିବା ମନେ ହେଉଛି । ଉପରୋକ୍ତ ଘଟଣା ସମ୍ପର୍କରେ ଜିଲ୍ଲା ପ୍ରଶାସନ ଜାଣିନପାରିବା ଏହା ପ୍ରମାଣିତ କରିଛି । ପ୍ରଶାସନ ପକ୍ଷରୁ କୌଣସି କଟକଣା କିମ୍ବା କୌଣସି ତାଗିଦ୍ ହେଉନଥିବାରୁ ଏଭଳି ବାରମ୍ବାର ଅନୁପ୍ରବେଶ ହେଉଥିବା ବୁଦ୍ଧିଜୀବୀମାନେ କହିଛନ୍ତି ।
ସୂଚନା ଅନୁଯାୟୀ, ଆନ୍ଧ୍ରର ପ୍ରତି ଗାଁରେ ସରକାରଙ୍କ ଯୋଜନାର କାର୍ଯ୍ୟକାରିତା ନେଇ ଗ୍ରାମସଭା କରାଯାଉଛି । ଏହି ପରିପ୍ରେକ୍ଷୀରେ ଆନ୍ଧ୍ର ପକ୍ଷରୁ କୋଟିଆ ପଞ୍ଚାୟତର ଫାଟୁସିନେରୀ, ଫଗୁଣ ସିନେରୀ ଓ ଗଞ୍ଜେଇପଦରଠାରେ ଗତ ୨୩ ତାରିଖରେ ଗ୍ରାମସଭାର ଆୟୋଜନ କରାଯାଇଥିଲା । ଏହି ଗାଁ ଗୁଡ଼ିକ ପାଇଁ ସ୍ୱତନ୍ତ୍ର ଭାବେ ୩ଜଣ ପଞ୍ଚାୟତ ଅଧିକାରୀଙ୍କୁ ମଧ୍ୟ ନିଯୁକ୍ତି ଦିଆଯାଇଥିଲା । ଏହି ଅଧିକାରୀମାନେ ଗ୍ରାମବାସୀଙ୍କ ସହ ମନରେଗା ଯୋଜନା ସମ୍ପର୍କରେ ଆଲୋଚନା କରିଥିଲେ । ଏହି ତିନି ଅଧିକାରୀ ହେଲେ ଶ୍ରୀନିବାସ ରାଓ, ସୁରେଶ ଓ ସୁରିନା ରୟାନା । ସେହିପରି ଗତ ମେ’ ମାସରେ ଆନ୍ଧ୍ରର ଏପିଜିଭିବି ସରକାରୀ ବ୍ୟାଙ୍କ ତରଫରୁ କୋଟିଆ ପଞ୍ଚାୟତର ନେରେଡ଼ିବାଳସାଠାରେ ଏକ କ୍ୟାମ୍ପ୍ କରାଯାଇଥିଲା । ଲୋକଙ୍କୁ ଅର୍ଥନୈତିକ ସାକ୍ଷରତା ଓ ଆର୍ଥିକ ଅଭିବୃଦ୍ଧି ସମ୍ପର୍କରେ ସଚେତନ କରାଯାଇଥିଲା । ଏଥିରେ ବ୍ୟାଙ୍କ ଅଧିକାରୀ ଓ ସାଲୁର ବ୍ଲକ୍ର କେତେକ କର୍ମଚାରୀ ସାମିଲ୍ ହୋଇଥିଲେ । ଆନ୍ଧ୍ରରେ ସରକାର ବଦଳିବା ପରେ ମଧ୍ୟ ଅନୁପ୍ରବେଶ ଜାରିରହିଛି ।
ଅନ୍ୟପକ୍ଷରେ ବର୍ତ୍ତମାନ ଆନ୍ଧ୍ରରେ ବିଜେପିର ମେଣ୍ଟ ସରକାର ଚାଳିଛି । ଓଡ଼ିଶାରେ ବିଜେପି ସରକାର ଶାସନ କରୁଛି । ତେଣୁ ଓଡ଼ିଶା ସରକାର ନିଜଆଡୁ ଉଦ୍ୟମ କଲେ ଦୀର୍ଘବର୍ଷର ଏହି ବିବାଦ ସମାଧାନ ହୋଇପାରିବ ବୋଲି ବୁଦ୍ଧିଜୀବୀମାନେ କହିଛନ୍ତି । ଏ ସମ୍ପର୍କରେ ପଚାରିବାକୁ କୋରାପୁଟ ଉପଜିଲ୍ଲାପାଳ ବେଣୁଧର ଶବରଙ୍କୁ ଯୋଗାଯୋଗ କରାଯାଇଥିଲା । କୌଣସି କାର୍ଯ୍ୟରେ ବ୍ୟସ୍ତ ଅଛନ୍ତି, ପରେ କଥାହେବେ କହି ଫୋନ୍ କାଟିଦେଇଥିଲେ । ତେଣୁ ତାଙ୍କ ପ୍ରତିକ୍ରିୟା ମିଳିପାରିନାହିଁ ।