ନୂଆଦିଲ୍ଲୀ, ୦୬/୦୯: ଚୀନ ରାଷ୍ଟ୍ରପତି ସି ଜିନପିଙ୍ଗ ନୂଆଦିଲ୍ଲୀରେ ଆୟୋଜିତ ହେବାକୁ ଥିବା ଜି୨୦ ସମ୍ମିଳନୀରେ ସାମିଲ୍ ହେବେ ନାହିଁ । ତେବେ ଭାରତ ଜି୨୦ର ଅଧ୍ୟକ୍ଷତା କରୁଥିବାରୁ ତାକୁ ଚୀନ୍ ରାଷ୍ଟ୍ରପତି ସମର୍ଥନ କରୁଥିବା କହିଛି ବୈଦେଶିକ ମନ୍ତ୍ରଣାଳୟ । ଏଥିସହ ଏହାକୁ ସଫଳ କରିବା ଲାଗି ସମସ୍ତ ପକ୍ଷ ସହ କାମ କରିବାକୁ ବେଜିଂ ପ୍ରସ୍ତୁତ ଥିବା କହିଛି ।
ସୋମବାର ଚୀନ୍ କହିଥିଲା, ନୂଆଦିଲ୍ଲୀରେ ଆୟୋଜିତ ହେବାକୁ ଥିବା ଜି୨୦ ଶିଖର ସମ୍ମିଳନୀରେ ସି ଜିନପିଙ୍ଗ ସାମିଲ୍ ହେବେ ନାହିଁ । ତାଙ୍କ ବଦଳରେ ଚୀନ୍ ପ୍ରଧାନମନ୍ତ୍ରୀ ସେପ୍ଟେମ୍ବର ୯ ଓ ୧୦ରେ ହେବାକୁ ଥିବା ଶିଖର ସମ୍ମିଳନୀରେ ଚୀନର ପ୍ରତିନିଧିତ୍ୱ କରିବେ ।
ତେବେ ଜି୨୦ ସମ୍ମିଳନୀକୁ ସି ଜିନପିଙ୍ଗ ନ ଆସିବା ତାଙ୍କ ବଦଳରେ ପ୍ରଧାନମନ୍ତ୍ରୀଙ୍କୁ ଭାରତ ପଠାଇବା ଉଭୟ ଦେଶ ମଧ୍ୟରେ ଥିବା ତିକ୍ତତାକୁ ଦର୍ଶାଉଛି କି ? ସାମ୍ବାଦିକଙ୍କ ଏ ପ୍ରଶ୍ନର ଉତ୍ତରରେ ଚୀନ୍ ବିଦେଶ ମନ୍ତ୍ରଣାଳୟର ମୁଖପାତ୍ର ମାଔ ନିଙ୍ଗ କହିଛନ୍ତି, ଚୀନ-ଭାରତର ସମ୍ବନ୍ଧ ସ୍ଥିର ଅଛି । ଉଭୟ ଦେଶ ବିଭିନ୍ନ ସ୍ତରରେ ଆଲୋଚନା ଜାରି ରଖିଛନ୍ତି ।
ସୀମା ବିବାଦ ପ୍ରସଙ୍ଗକୁ ନ ଉଠାଇ ଚୀନ୍ କହିଛି, ଉଭୟ ଦେଶ ମଧ୍ୟରେ ସମ୍ପର୍କରେ ସୁଧାର ଆସୁଛି । ଦ୍ୱିପାକ୍ଷିକ ସମ୍ପର୍କ ଆହୁରି ମଜଭୁତ୍ କରିବାକୁ ଭାରତ ସହ କାମ କରିବାକୁ ପ୍ରସ୍ତୁତ ରହିଛୁ । ଜି୨୦ ଶିଖର ସମ୍ମିଳନୀକୁ ନେଇ କହିଛନ୍ତି, ଚୀନ୍ ସବୁବେଳେ ଏହି ସମ୍ମିଳନୀକୁ ମହତ୍ତ୍ୱ ଦେବା ସହ ଅଂଶଗ୍ରହଣ କରୁଛି ।
ଅକ୍ଟୋବର ୧ରୁ ସିମ୍ ଜାରି ନିୟମ କଡ଼ାକଡ଼ି, ଉଲ୍ଲଂଘନ କଲେ ୧୦ ଲକ୍ଷ ପର୍ଯ୍ୟନ୍ତ ଜରିମାନା
୨୦୨୦ ଜୁନରେ ପୂର୍ବ ଲଦାଖର ଗଲୱାନ ଘାଟିରେ ଭାରତ-ଚୀନ ଯବାନ ମୁହାଁମୁହିଁ ହୋଇଥିଲେ । ସେବେଠୁ ଉଭୟ ଦେଶ ସମ୍ପର୍କରେ ତିକ୍ତତା ଲାଗି ରିହିଛି । ଏପରିକି ଲଦାଖର କିଛି ପଏଣ୍ଟକୁ ନେଇ ଉଭୟ ପକ୍ଷ ୩ ବର୍ଷରୁ ଅଧିକ ସମୟ ଧରି ଆଲୋଚନା କରୁଛନ୍ତି ।
