ସାନଖେମୁଣ୍ଡି, ୨।୧୨ : ଶୋକାକୁଳ ପରିବେଶରେ ଶେଷ ହେଲା ଘଟଗାଁ ଦୁର୍ଘଟଣାରେ ପ୍ରାଣ ହରାଇଥିବା ୮ ଜଣଙ୍କ ଶବଦାହ। ଶୁକ୍ରବାର ସକାଳେ ଦୁର୍ଘଟଣାରେ ମୃତ ୮ ଜଣଙ୍କ ଶବ ପ୍ରାୟ ରାତି ଦୁଇଟା ବେଳେ ଗଞ୍ଜାମ ଜିଲ୍ଲା ସାନଖେମୁଣ୍ଡି ବ୍ଲକ ପୋଡ଼ାମାରିରେ ପହଞ୍ଚିଥିଲା। ଚାରିଟି ସ୍ବତନ୍ତ୍ର ଆମ୍ବୁଲାନ୍ସ ରେ ଶବ ଗୁଡ଼ିକ ଆସି ପହଞ୍ଚିଥିଲା। ପୋଡ଼ାମାରିରେ ଗଜେନ୍ଦ୍ର ପ୍ରଧାନଙ୍କ ପରିବାରକୁ ଗଜେନ୍ଦ୍ରଙ୍କ ସ୍ତ୍ରୀ ମିତା ପ୍ରଧାନ, ପୁଅ ଆକାଶ ପ୍ରଧାନ, ବୋହୂ ଲିଲି ପ୍ରଧାନଙ୍କ ଶବକୁ ହସ୍ତାନ୍ତର କରାଯାଇଥିଲା। ଶବ ଆସିବା ପରେ କାନ୍ଦ ବୋବାଳିରେ ଫାଟି ପଡ଼ିଥିଲା ସାରା ଗାଆଁ। ତିନୋଟି କୋକେଇ ସଜେଇ ହୋଇ ଶବକୁ ନିଆ ଯାଇଥିବା ବେଳେ ଗଜେନ୍ଦ୍ର ନିଜ ସ୍ତ୍ରୀ, ପୁଅ ଓ ବୋହୂଙ୍କ ଶବ ଦେଖି ନିର୍ବିକାର ହୋଇ ପଡ଼ିଥିଲେ। 

ଶ୍ମଶାନରେ ଗୋଟିଏ ଜୁଇରେ ମାଆ ଆଉ ଅନ୍ୟ ଗୋଟେ ଜୁଇରେ ପୁଅ ବୋହୂଙ୍କ ଶବ ସତ୍କାର କରାଯାଇଥିଲା। ସେହିପରି ବତାଗଡ଼ ଗାଁରେ ଗୋଟିଏ ଜୁଇରେ ବାପା ବାୟାଘନ ଗୌଡ, ଅନ୍ୟ ଏକ ଜୁଇରେ ପୁଅ ମଦନ ଗୌଡ ଓ ନାତି ରୁଦ୍ର ଗୌଡର ଶବ ସତ୍କାର କରାଯାଇଥିଲା। ବାୟା ଗୌଡଙ୍କ ଜ୍ବାଇଁ ବାବୁଲା ଗୌଡଙ୍କ ଶବ ଆମ୍ବୁଲାନ୍ସ ଯୋଗେ ଦେଖାଳୀ ପଠାଯାଇଥିଲା। ସେହିଭଳି ଝିଅ ପାପିନି ଗୌଡଙ୍କ ଶବକୁ ପାଳଝାଡି ପଠା ଯାଇଥିଲା। 

ଏହି ଦୁଇ ସଙ୍ଗାତଙ୍କ ପରିବାର ଗୁରୁବାର ରାତିରେ ଗାଁରୁ ଘଟଗାଁ ତାରିଣୀ ଦର୍ଶନ ପାଇଁ ବାହାରିଥିଲେ। ଘଟଗାଁ ନିକଟରେ ଦୁର୍ଘଟଣାରେ ଆଠ ଜଣଙ୍କ ଜୀବନ ଚାଲି ଯାଇଥିଲା। କେନ୍ଦୁଝରରେ ଶବ ବ୍ୟବଚ୍ଛେଦ ପରେ ଜିଲ୍ଲା ପ୍ରଶାସନ ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ ଆମ୍ବୁଲାନ୍ସରେ ଶବଗୁଡିକୁ ନିଜ ଗାଁକୁ ପଠାଇଥିଲେ। ଆମ୍ବୁଲାନ୍ସ ଆସିବା ପରେ ଗଞ୍ଜାମ ଜିଲ୍ଲା ପ୍ରଶାସନ, ପୁଲିସ ପ୍ରଶାସନ, ବ୍ଲକ୍ ଅଧ୍ୟକ୍ଷ, ସରପଞ୍ଚ ଉପସ୍ଥିତ ରହି ଅନ୍ତିମ ସଂସ୍କାରରେ ସହଯୋଗ କରିଥିଲେ। ପୂର୍ବତନ ସାଂସଦ ରେଣୁବାଳା ପ୍ରଧାନ ପରିବାର ସହିତ ଗଜେନ୍ଦ୍ରଙ୍କ ପାରିବାରିକ ସମ୍ପର୍କ ରହିଥିବା ବେଳେ ଛଅ ମାସ ବ୍ୟବଧାନରେ ଦୁଇ ଦୁଇଟି ଦୁର୍ଘଟଣା ପ୍ରଧାନ ପରିବାରକୁ ଦାରୁଣ ଆଘାତ ଦେଇଥିବା କହିଛନ୍ତି ରେଣୁବାଳା।

Also Read :-

ଟ୍ରକ୍‌କୁ ଜୋରଦାର୍ ଧକ୍କା ଦେଲା କାର୍, ଡ୍ରାଇଭର ସମେତ ୩ ମୃତ