ଅହମ୍ମଦାବାଦ: ୨୦୨୩ ବିଶ୍ବକପ ଫାଇନାଲ୍ ମୁକାବିଲା ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଖେଳାଯାଉଛି। ଆଜିର ଏହି ହାଇଭୋଲଟେଜ୍ ମ୍ୟାଚ୍ରେ ଟିମ୍ ଇଣ୍ଡିଆକୁ ବହୁ ଆହ୍ବାନର ସାମ୍ନା କରିବାକୁ ପଡ଼ିଛି । ଅଷ୍ଟ୍ରେଲିଆ ଟିମ୍ ଉଭୟ ବୋଲିଂ ଏବଂ ଫିଲ୍ଡିଂରେ ବହୁତ ଭଲ ପ୍ରଦର୍ଶନ କରିଛି । ତେବେ ନରେନ୍ଦ୍ର ମୋଦୀ ଷ୍ଟାଡିୟମରେ ଦର୍ଶକଙ୍କ ଭିଡ ବହୁ ଅଧିକ ରହିଥିବା ବେଳେ ବହୁ ବିଶିଷ୍ଟ ବ୍ୟକ୍ତି ମ୍ୟାଚ୍ ଦେଖିବାକୁ ଆସିଛନ୍ତି ।
ଆଜିର ଏହି ମ୍ୟାଚ୍ରେ ବିରାଟ କୋହଲି ଏବଂ କେଏଲ ରାହୁଲ ବ୍ୟାଟିଂ କରୁଥିବା ବେଳେ ଜଣେ ଯୁବକ ପଡ଼ିଆକୁ ପଶିଆସିଥିଲେ ଏବଂ ବିରାଟ କୋହଲିଙ୍କୁ ଧରିବାକୁ ଚେଷ୍ଟା କରିଥିଲେ । ଏହି ସମୟରେ ଜଣେ ଯୁବକ ଲାଲ ରଙ୍ଗର ସର୍ଟ ପ୍ୟାଣ୍ଟ ପିନ୍ଧିଥିବା ବେଳେ ଧଳା ରଙ୍ଗର ଟି-ଶାର୍ଟ ପିନ୍ଧିଥିଲେ । ଆଉ ତାଙ୍କର ଶାର୍ଟରେ ‘ପାଲଷ୍ଟାଇନ୍କୁ ମୁକ୍ତ କର’ ବୋଲି ଇଂରାଜୀରେ (ଫ୍ରି ପାଲେଷ୍ଟାଇନ୍) ଲେଖାଥିଲା । ଶାର୍ଟର ଆଗ ପଟେ ‘ପାଲେଷ୍ଟାଇନ୍ରେ ବୋମାମାଡ ବନ୍ଦ କର ବୋଲି ଲେଖା ହୋଇଥିଲା ।
ଆଉ ଯୁବକଜଣଙ୍କ ମୁହଁରେ ପାଲେଷ୍ଟାଇନ୍ ପତାକା ରଙ୍ଗର ଏକ ମାସ୍କ ପିନ୍ଧିଥିବାର ନଜର ଆସିଥିଲେ । କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ଏମାନେ କିଭଳି ପଡ଼ିଆକୁ ଆସିଲେ ଏବଂ ଖେଳାଳିଙ୍କୁ ଧରିବାକୁ ଚେଷ୍ଟା କଲେ ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ତେବେ ଉକ୍ତ ଯୁବକଙ୍କୁ ସାଙ୍ଗେ ସାଙ୍ଗେ ପଡ଼ିଆରୁ କାବୁ କରାଯାଇଥିଲା। ଯୁବକଜଣଙ୍କ ପଡ଼ିଆକୁ ପଶିଆସିବା ପରେ କିଛି ସମୟ ଖେଳ ବନ୍ଦ ହୋଇଥିଲା। ସୁରକ୍ଷା କର୍ମୀ ତାଙ୍କୁ କାବୁ କରିନେବା ପରେ ପୁଣି ଖେଳ ଆରମ୍ଭ ହୋଇଥିଲା ।
ଆଜି ଗିଲ ଏବଂ ରୋହିତ ଶର୍ମା ଆଉଟ ହେବା ପରେ କୋହଲି ଏବଂ କେଏଲ ରାହୁଲ ଭାରତର ମଙ୍ଗ ଧରିଥିଲେ । ହେଲେ କ୍ରିଜ୍ରେ କୋହଲି ଜମିଆସୁଥିବା ବେଳେ ଆଉଟ ହୋଇଯାଇଥିଲେ । ପାଟ କମିନ୍ସଙ୍କ ବଲରେ ଆଉଟ ହୋଇ ପାଭିଲିୟନ୍ ଫେରିଥିଲେ କୋହଲି । ଆଜିର ମ୍ୟାଚ୍ରେ ଟସ୍ ଜିତି ବୋଲିଂ ନିଷ୍ପିତ୍ତି ନେଇଥିଲା ଅଷ୍ଟ୍ରେଲିଆ କ୍ରିକେଟ ଟିମ୍ ।