ନୂଆଦିଲ୍ଲୀ,୧୧।୫: ଭାରତର ‘ଅପରେସନ ସିନ୍ଦୂର’ ଏବେ ବି ଜାରି ରହିଛି, ଯାହା ଅଧୀନରେ ଭାରତୀୟ ସେନା ପାକିସ୍ତାନ ପ୍ରାୟୋଜିତ ଆତଙ୍କବାଦ ବିରୁଦ୍ଧରେ ଏକ ନିର୍ଣ୍ଣାୟକ ଯୁଦ୍ଧ ଲଢ଼ୁଛନ୍ତି। ମେ ୭ ତାରିଖରୁ ପାକିସ୍ତାନରେ ଆତଙ୍କବାଦ ବିରୋଧରେ ଭାରତ ଯେଉଁ କାର୍ଯ୍ୟାନୁଷ୍ଠାନ ଗ୍ରହଣ କରିଛି, ତାହା ପରେ ପଡ଼ୋଶୀ ଦେଶ ଚିନ୍ତାରେ ପଡିଯାଇଛି। ସୀମା ଆରପଟୁ ଗୁଳିମାଡ଼ କରି ପାକିସ୍ତାନ ନିରୀହ ସାଧାରଣ ଲୋକଙ୍କୁ ଟାର୍ଗେଟ କରୁଛି। କିନ୍ତୁ ଭାରତୀୟ ସେନା ପାକିସ୍ତାନରେ ଏୟାରଷ୍ଟ୍ରାଇକ୍ କରିଛି ଏବଂ ଏହାର ସାମରିକ ଘାଟିଗୁଡ଼ିକୁ କ୍ଷତି ପହଞ୍ଚାଇଛି, ଯାହା ଯୋଗୁଁ ପଡ଼ୋଶୀ ଦେଶର ମେରୁଦଣ୍ଡ ଭାଙ୍ଗି ଯାଇଛି।
ଭାରତ ନିଜ ସର୍ତ୍ତରେ ପାକିସ୍ତାନ ସହିତ ଅସ୍ତ୍ରବିରତି ଲାଗୁ କରିଛି ।ଏହା ସହ ସ୍ପଷ୍ଟ କରିଛି ଯେ ଯେକୌଣସି ଉତ୍ତେଜନାମୂଳକ କାର୍ଯ୍ୟର ଜବାବ ପାକିସ୍ତାନକୁ ତା’ର ଭାଷାରେ ଦିଆଯିବ।’ସେପଟେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ଦୁଇ ଦେଶ ମଧ୍ୟରେ ଅସ୍ତ୍ରବିରତି ଉପରେ ଖୁସି ପ୍ରକାଶ କରିଛନ୍ତି। ଆମେରିକାର ଉପରାଷ୍ଟ୍ରପତି ଜେଡି ଭାନ୍ସ ଏବଂ ବୈଦେଶିକ ସଚିବ ମାର୍କୋ ରୁବିଓ ଭାରତ ଏବଂ ପାକିସ୍ତାନର ଶୀର୍ଷ ନେତୃତ୍ୱଙ୍କ ସହ ଆଲୋଚନା କରିଛନ୍ତି। ଏହା ପରେ, ଭାରତ ନିଜ ସର୍ତ୍ତରେ ପାକିସ୍ତାନ ସହିତ ଅସ୍ତ୍ରବିରତି ପାଇଁ ରାଜି ହୋଇଛି।
ଅନ୍ୟପକ୍ଷେ ପାକିସ୍ତାନ ରବିବାର କାଶ୍ମୀର ପ୍ରସଙ୍ଗରେ ଭାରତ ଏବଂ ପାକିସ୍ତାନ ମଧ୍ୟରେ ମଧ୍ୟସ୍ଥତା କରିବାକୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରସ୍ତାବକୁ ସ୍ୱାଗତ କରିଛି। ଇସଲାମାବାଦ ଏହାକୁ ଏକ ଦୀର୍ଘକାଳୀନ ବିବାଦ ଭାବରେ ବର୍ଣ୍ଣନା କରିଛି , ଯାହାକି ଦକ୍ଷିଣ ଏସିଆ ଏବଂ ବାହାରେ ଶାନ୍ତି ଏବଂ ସୁରକ୍ଷା ଉପରେ ଗମ୍ଭୀର ପ୍ରଭାବ ପକାଇପାରେ। ତଥାପି, ଭାରତ କାଶ୍ମୀର ପ୍ରସଙ୍ଗରେ କୌଣସି ପ୍ରକାରର ମଧ୍ୟସ୍ଥତା ଗ୍ରହଣ ନକରିବାର ପୁରୁଣା ମନୋଭାବରେ ଅଟଳ ରହିଛି। ଭାରତ ସ୍ପଷ୍ଟ ଭାବରେ କହିଛି ଏହା ଦୁଇ ଦେଶ ମଧ୍ୟରେ ଏକ ପ୍ରସଙ୍ଗ ଏବଂ ଏହି ମାମଲାରେ କୌଣସି ତୃତୀୟ ପକ୍ଷର ହସ୍ତକ୍ଷେପ ଗ୍ରହଣୀୟ ନୁହେଁ।
ପୂର୍ବରୁ, ରାଷ୍ଟ୍ରପତି ଟ୍ରମ୍ପ କହିଥିଲେ ଯେ ସେ କାଶ୍ମୀର ବିବାଦର ସମାଧାନ ଖୋଜିବା ପାଇଁ ଉଭୟ ଦେଶ ସହିତ କାମ କରିବାକୁ ଅପେକ୍ଷା କରିଛନ୍ତି, ଯାହାକୁ ସେ "ହଜାର ବର୍ଷ ଧରି" ଚାଲିଥିବା ଏକ ସମସ୍ୟା ଭାବରେ ବର୍ଣ୍ଣନା କରିଥିଲେ। ଟ୍ରମ୍ପଙ୍କ ଏହି ମନ୍ତବ୍ୟ ତାଙ୍କର ସେହି ବୟାନର ଗୋଟିଏ ଦିନ ପରେ ଆସିଛି ଯେଉଁଥିରେ ସେ ଦାବି କରିଥିଲେ ଯେ ଭାରତ ଏବଂ ପାକିସ୍ତାନ ମଧ୍ୟରେ ଏକ ଅସ୍ତ୍ରବିରତି ଚୁକ୍ତିନାମା ପାଇଁ ଆମେରିକା ମଧ୍ୟସ୍ଥତା କରିଛି। ଅସ୍ତ୍ରବିରତି ଆଲୋଚନାରେ ‘ଆମେରିକାର ଭୂମିକା"କୁ ପ୍ରଶଂସା କରି ପାକିସ୍ତାନ ସରକାର କହିଛନ୍ତି, ଆମେ ରାଷ୍ଟ୍ରପତି ଟ୍ରମ୍ପଙ୍କ ଜମ୍ମୁ ଏବଂ କାଶ୍ମୀର ବିବାଦର ସମାଧାନ ପାଇଁ ଚେଷ୍ଟାକୁ ସମର୍ଥନ କରୁଛୁ।
