ନୂଆଦିଲ୍ଲୀ, ୧୧।୫: କଂଗ୍ରେସ ସାଂସଦ ଏବଂ ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀ ରବିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚିଠି ଲେଖିଛନ୍ତି । ପହଲଗାମ ଆତଙ୍କବାଦୀ ଆକ୍ରମଣ, ଅପରେସନ ସିନ୍ଦୂର ଏବଂ ଅସ୍ତ୍ରବିରତି ଉପରେ ତୁରନ୍ତ ସଂସଦର ଏକ ସ୍ୱତନ୍ତ୍ର ଅଧିବେଶନ ଡକାଇବା ପାଇଁ ସମ୍ମତି ଦେବାକୁ ବିରୋଧୀ ଦଳକୁ ଅନୁରୋଧ କରିଛନ୍ତି । ଚିଠିରେ ରାହୁଲ ଗାନ୍ଧୀ ଉଲ୍ଲେଖ କରିଛନ୍ତି ଯେ "ଉପରୋକ୍ତ ପ୍ରସଙ୍ଗଗୁଡ଼ିକ ଉପରେ ଆଲୋଚନା କରିବା ଜନସାଧାରଣ ଏବଂ ସେମାନଙ୍କ ପ୍ରତିନିଧିମାନଙ୍କ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ" । "ପ୍ରିୟ ପ୍ରଧାନମନ୍ତ୍ରୀ, ମୁଁ ତୁରନ୍ତ ସଂସଦର ଏକ ସ୍ୱତନ୍ତ୍ର ଅଧିବେଶନ ଡାକିବା ପାଇଁ ବିରୋଧୀ ଦଳର ସର୍ବସମ୍ମତ ଅନୁରୋଧକୁ ଦୋହରାଉଛି," ଚିଠିରେ ଲେଖାଯାଇଛି ।
ସେ କହିଛନ୍ତି ଯେ, “ପହଲଗାମ ଆତଙ୍କବାଦୀ ଆକ୍ରମଣ, ଅପରେସନ ସିନ୍ଦୁର ଏବଂ ଆଜିର ଅସ୍ତ୍ରବିରତି ଉପରେ ଆଲୋଚନା କରିବା ଜନସାଧାରଣ ଏବଂ ସେମାନଙ୍କ ପ୍ରତିନିଧିମାନଙ୍କ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଏହା ଆଗାମୀ ଚ୍ୟାଲେଞ୍ଜଗୁଡ଼ିକର ମୁକାବିଲା କରିବା ପାଇଁ ଆମର ସାମୂହିକ ସଂକଳ୍ପ ପ୍ରଦର୍ଶନ କରିବାର ଏକ ସୁଯୋଗ ହେବ । ମୁଁ ବିଶ୍ୱାସ କରୁଛି ଯେ, ଆପଣ ଏହି ଦାବିକୁ ଗମ୍ଭୀରତା ଏବଂ ଶୀଘ୍ର ବିଚାର କରିବେ," । ରାଜ୍ୟସଭାରେ ବିରୋଧୀ ଦଳ ନେତା ତଥା କଂଗ୍ରେସ ସାଂସଦ ମଲ୍ଲିକାର୍ଜୁନ ଖଡ଼ଗେ ମଧ୍ୟ ଅନୁରୋଧ କରିଥିଲେ ଏବଂ ପହଲଗାମରେ ଅମାନବୀୟ ଆତଙ୍କବାଦୀ ଆକ୍ରମଣ ପରେ ସଂସଦର ଉଭୟ ଗୃହର ଏକ ସ୍ୱତନ୍ତ୍ର ଅଧିବେଶନ ଡକାଇବା ପାଇଁ ୨୮ ଏପ୍ରିଲ୍ ୨୦୨୫ ତାରିଖରେ ଏକ ଚିଠିରେ ଲେଖିଥିଲେ ।
୩ ଦିନରୁ ଅଧିକ ସମୟ ଧରି ପ୍ରବଳ ଗୁଳି ବିନିମୟ ପରେ, ଭାରତ ଓ ପାକିସ୍ତାନ ଶନିବାର ସ୍ଥଳ, ଆକାଶ ଏବଂ ସମୁଦ୍ରଭାଗରେ ଗୁଳି ବିନିମୟ ଏବଂ ସାମରିକ କାର୍ଯ୍ୟାନୁଷ୍ଠାନ ତୁରନ୍ତ ବନ୍ଦ କରିବା ପାଇଁ ଏକ ବୁଝାମଣାରେ ପହଞ୍ଚିଛନ୍ତି । ମେ ୭ ତାରିଖରେ ପାକିସ୍ତାନ ଏବଂ ପାକ୍ ଅଧିକୃତ କାଶ୍ମୀରରେ ୯ଟି ଆତଙ୍କବାଦୀ ଭିତ୍ତିଭୂମି ଉପରେ ଅପରେସନ୍ ସିନ୍ଦୁର ସାମରିକ ଆକ୍ରମଣର ଜବାବରେ ଇସଲାମାବାଦ ଭାରତୀୟ ଅଞ୍ଚଳ ଆଡ଼କୁ ଡ୍ରୋନ୍ ଏବଂ କ୍ଷେପଣାସ୍ତ୍ର ନିକ୍ଷେପ କରିବା ପରେ ସାମରିକ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା । ୨୨ ଏପ୍ରିଲରେ ଜମ୍ମୁ ଏବଂ କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣର ପ୍ରତିଶୋଧ ସ୍ୱରୂପ ଅପରେସନ ସିନ୍ଦୂର ଆରମ୍ଭ କରାଯାଇଥିଲା । ଯେଉଁଥିରେ ପାକିସ୍ତାନ ସହିତ ସମ୍ପର୍କ ଥିବା ଆତଙ୍କବାଦୀମାନେ ୨୬ ଜଣ ସାଧାରଣ ନାଗରିକଙ୍କୁ ହତ୍ୟା କରିଥିଲେ ।
