କୋଲକାତା ୦୮/୦୭: ପଶ୍ଚିମବଙ୍ଗ ରାଜ୍ୟପାଳ ସି ଭି ଆନନ୍ଦ ବୋଷଙ୍କ କାର୍ଯ୍ୟାଳୟକୁ ‘ବଦନାମ’ କରିବା ଅଭିଯୋଗକୁ ନେଇ ଆକ୍ସନ୍କୁ ଆସିଛି ସ୍ୱରାଷ୍ଟ୍ର ମନ୍ତ୍ରଣାଳୟ । ରାଜ୍ୟପାଳଙ୍କ ଅଭିଯୋଗକୁ ଭିତ୍ତିକରି ମନ୍ତ୍ରଣାଳୟ କୋଲକାତା ପୁଲିସ କମିଶନର ବିନୀତ ଗୋୟଲ ଓ ଡିସିପି (କେନ୍ଦ୍ରୀୟ) ଇନ୍ଦିରା ମୁଖାର୍ଜୀଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନେଇଛି । ଏମାନଙ୍କୁ ପଦରୁ ହଟାଇବା ପାଇଁ ବୋଷଙ୍କ ପକ୍ଷରୁ କାର୍ମିକ ଓ ତାଲିମ ବିଭାଗକୁ ଚିଠି ଲେଖାଯାଇଥିଲା । ଏମିତି କି ରାଜ୍ୟପାଳ ବୋଷ ଅନ୍ୟ କେତେକ ପୁଲିସ ଅଧିକାରୀଙ୍କ ବିରୋଧରେ ମଧ୍ୟ ଅଭିଯୋଗ ଆଣିଥିଲେ ।
ଚଳିତବର୍ଷ ଏପ୍ରିଲ-ମେ’ରେ ରାଜଭବନର ଜଣେ ପୂର୍ବତନ ମହିଳା କର୍ମଚାରୀଙ୍କ ପକ୍ଷରୁ ଅସଦାଚରଣ ଅଭିଯୋଗ ଅଣାଯିବା ପରେ ବିବାଦର ସୂତ୍ରପାତ ହୋଇଥିଲା । ଏ ନେଇ ହାରେ ଷ୍ଟ୍ରିଟ୍ ଥାନାରେ ମାମଲା ରୁଜୁ ହୋଇଥିଲା । ସାମ୍ବିଧାନିକ ପଦରେ ଥିବା ଦୃଷ୍ଟିରୁ ଏଥିରେ ରାଜ୍ୟପାଳଙ୍କ ନାମ ନ ଥିଲା । ତେବେ ଅପରାଧିକ ଷଡ଼ଯନ୍ତ୍ର ପାଇଁ ରାଜଭବନର ଅନେକ କର୍ମଚାରୀଙ୍କ ନାମ ଏଥିରେ ରହିଥିଲା । ମୁଖ୍ୟମନ୍ତ୍ରୀ ମମତା ବାନାର୍ଜୀ ଏହାକୁ ନେଇ ବିବାଦୀୟ ଟିପ୍ପଣୀ ଦେବା ପରେ ରାଜ୍ୟପାଳ ବୋଷ ତାଙ୍କ ବିରୋଧରେ ମାନହାନି ଅଭିଯୋଗ ଆଣିଥିଲେ । ସଦ୍ୟ ଘଟଣା ଯୋଗୁ ମହିଳାମାନେ ରାଜଭବନ ଯିବାକୁ ଭୟ କରୁଥିବା ମମତା ନିଜ ବୟାନରେ କହିଥିଲେ ।
ଏହାପରେ ମାମଲାର ତଦନ୍ତ ଲାଗି ଏକ ସ୍ୱତନ୍ତ୍ର ତଦନ୍ତକାରୀ ଟିମ୍ ଗଠିତ ହୋଇଥିଲା, ଯାହାର ମୁଖ୍ୟ ଇନ୍ଦିରା ମୁଖାର୍ଜୀ ରହିଥିଲେ । ରାଜଭବନ କର୍ମଚାରୀମାନେ କୋଲକାତା ହାଇକୋର୍ଟଙ୍କ ଦ୍ୱାରସ୍ଥ ହୋଇ ଏଫ୍ଆଇଆର୍କୁ ବାତିଲ ପାଇଁ ଅପିଲ୍ କରିଥିଲେ । ରାଜ୍ୟପାଳ ବୋଷ ମଧ୍ୟ ପୁଲିସ କମିଶନର, ଡିସିପିଙ୍କ ସମେତ ବିଭିନ୍ନ ପୁଲିସ ଅଧିକାରୀଙ୍କ ବିରୋଧରେ ଅଭିଯୋଗ ଆଣିଥିଲେ । ବୋଷ କହିଥିଲେ, ରାଜ୍ୟର ଏହି ଆଇପିଏସ୍ ଅଧିକାରୀମାନେ ରାଜ୍ୟପାଳଙ୍କ କାର୍ଯ୍ୟାଳୟକୁ ବଦନାମ କରିଛନ୍ତି । ସେମାନଙ୍କ କାର୍ଯ୍ୟ ଯୋଗୁ ରାଜଭବନରେ କାମ କରିବା କର୍ମଚାରୀଙ୍କ ପକ୍ଷେ କଷ୍ଟକର ହୋଇପଡ଼ିଛି । ସେମାନେ ଜାଣିଶୁଣି ଆଚରଣ ବିଧି ଉଲ୍ଲଂଘନ କରୁଛନ୍ତି । ତେଣୁ ସେମାନଙ୍କୁ ପଦରୁ ବହିଷ୍କାର କରାଯିବା ଉଚିତ । ଏହାପରେ ସ୍ୱରାଷ୍ଟ୍ର ମନ୍ତ୍ରଣାଳୟ କାର୍ଯ୍ୟାନୁଷ୍ଠାନ ନେବା ଆରମ୍ଭ କରିଛି ।
କାର୍ଯ୍ୟାନୁଷ୍ଠାନକୁ ବିରୋଧ କରି ଟିଏମ୍ସି ସାଂସଦ ମହୁଆ ମୋଇତ୍ର ସ୍ୱରାଷ୍ଟ୍ର ମନ୍ତ୍ରଣାଳୟକୁ ଟାର୍ଗେଟ୍ କରିଛନ୍ତି । ଏହାକୁ ସେ ହାସ୍ୟାସ୍ପଦ ଦର୍ଶାଇ କହିଛନ୍ତି, ବେଙ୍ଗଲ ରାଜ୍ୟପାଳ ନିଜେ ନିଜ କାର୍ଯ୍ୟାଳୟକୁ ବଦନାମ କରିଛନ୍ତି । କେନ୍ଦ୍ର ସରକାର ନିଜ ରାଜ୍ୟପାଳଙ୍କୁ ଆୟତ୍ତ କରିବା ଉଚିତ, କାରଣ ସେମାନେ ନିଜକୁ ଆୟତ୍ତ କରିପାରୁ ନ ଥିବା ଜଣାପଡ଼ୁଛି । ଏହା ଲଜ୍ଜାଜନକ ଘଟଣା । ଏଭଳି ମନ୍ତବ୍ୟ ପାଇଁ ରାଜ୍ୟପାଳ ।ବୋଷ ତାଙ୍କୁ ସମାଲୋଚନା କରିଛନ୍ତି । ଏଥିସହ କେତେକ ଟିଏମ୍ସି ନେତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନେବା ଆରମ୍ଭ କରିଛନ୍ତି ।
