ନୂଆଦିଲ୍ଲୀ: କରୋନା ମହାମାରୀର ଦାରୁଣ ଦୁଃଖ ଏଯାଏଁ ଜନମାନସରୁ ଲିଭିନଥିବା ବେଳେ ଏହାର ସବ୍ ଭାରିଆଣ୍ଟ ପୁଣି ଚିନ୍ତା ବଢ଼ାଇଛି । ଜେଏନ.୧ କରୋନା ଭୂତାଣୁ ସଂକ୍ରମଣ ବଢ଼ି ବଢ଼ି ଚାଲିଛି । ଏହାରି ମଧ୍ୟରେ କୋଭିଡ-୧୯ ଭଳି ଅନ୍ୟ ଏକ ଘାତକ ଭୂତାଣୁର ପରୀକ୍ଷା କରିବା ସହ ପ୍ରୟୋଗ କରିବା ଆରମ୍ଭ କରିଦେଇଛି ଚୀନ୍ । ଏନେଇ ବିଦେଶୀ ଜର୍ଣ୍ଣାଲରେ ପ୍ରକାଶିତ ରିପୋର୍ଟକୁ ନେଇ ଚର୍ଚ୍ଚା ଜୋର ଧରିଛି । ଚୀନ୍ ପରୀକ୍ଷା କରୁଥିବା ଏହି ଭୂତାଣୁ ମୂଷା ଶରୀରରେ ଘାତକ ପ୍ରତିକ୍ରିୟା ଦେଖାଉଥିବା ବେଳେ ମଣିଷଙ୍କୁ ମାରିବାରେ ସକ୍ଷମ ବୋଲି କୁହାଯାଉଛି । କାରଣ ଏହି ଭୂତାଣୁ ପ୍ରୟୋଗ କରାଯାଇଥିବା ମୂଷାଗୁଡ଼ିକର ମୃତ୍ୟୁ ହୋଇଯାଇଛି । କେବଳ ଯେ ମୂଷା ଶରୀରକୁ ଏହି ଭୂତାଣୁ ଆକ୍ରାନ୍ତ କରୁଛି ତା ନୁହେଁ ଫୁସଫୁସ୍ ଏବଂ ମସ୍ତିଷ୍କକୁ ସଂପୂର୍ଣ୍ଣ ଅକାମୀ କରିପକାଉଛି ବୋଲି ରିପୋର୍ଟରେ ଦର୍ଶାଯାଇଛି ।
ଏହି ଗବେଷଣାତ୍ମକ ପେପର ବାୟୋରିକ୍ସିଭ୍ (bioRxiv) ଓ୍ବେବସାଇଟ୍ରେ ପ୍ରକାଶ ପାଇଛି । ଜାନୁଆରୀ ୩ରେ ପ୍ରକାଶିତ ଏହି ରିପୋର୍ଟରେ ଦାବି ହୋଇଛି ଯେ, ଚୀନ୍ ସେନା ପାଖରୁ ପ୍ରଶିକ୍ଷଣ ପାଇଥିବା କେତେକ ଡାକ୍ତର ‘ପାଙ୍ଗୋଲିନ୍ କରୋନା ଭାଇରସ୍’ ତିଆରି କରିଛନ୍ତି । କେତେକ ମୂଷା ଶରୀରରେ ଏହି ଭୂତାଣୁକୁ ଛାଡ଼ି ଏହାର ଭୟାବହତା ପରୀକ୍ଷା କରିଥିଲେ ଡାକ୍ତର । ୪ଟି ମୂଷା ଶରୀରରେ ନିଷ୍କ୍ରିୟ ଭୂତାଣୁ ଇଞ୍ଜେକ୍ଟ କରାଯାଇଥିଲା । ଅନ୍ୟ ୪ଟି ସୁସ୍ଥ ମୂଷାକୁ ସେଠାରେ ରଖିଦିଆଯାଇଥିଲା । ଆଶ୍ଚର୍ଯ୍ୟର କଥା, ସଂକ୍ରିମତ ମୂଷାଗୁଡ଼ିକ ୭-୮ ଦିନ ଭିତରେ ମରିଗଲେ । ଭୂତାଣୁ ଦିଆଯାଇଥିବା ମୂଷାଗୁଡ଼ିକର ଓଜନ ୫ ଦିନ ଭିତରେ ହ୍ରାସ ପାଇଥିଲା । ସପ୍ତମ ଦିନରେ ମୂଷାଗୁଡ଼ିକର ଗତି ଧିମା ହୋଇଯାଇଥିଲା ଏବଂ ଆଖି ଧଳା ହୋଇଯାଇଥିଲା । ଷଷ୍ଠ ଦିନରେ ମୂଷାଗୁଡ଼ିକର ଫୁସଫୁସର କାର୍ଯ୍ୟକାରିତା ହଠାତ କମିଥିଲା । ମସ୍ତିଷ୍କର କାର୍ଯ୍ୟକାରିତା ତୃତୀୟ ଦିନରେ ହ୍ରାସ ପାଇଥିଲେ ହେଁ ଷଷ୍ଠ ଦିନରେ ହଠାତ ବୃଦ୍ଧି ପାଇଥିଲା ।
ଏଥିରୁ ଜଣାପଡ଼ିଥିଲା ଯେ, ଗୁରୁତର ମସ୍ତିଷ୍କ ସଂକ୍ରମଣ ଯୋଗୁଁ ମୂଷାଗୁଡ଼ିକର ମୃତ୍ୟୁ ହୋଇଥାଇପାରେ । ବିଳମ୍ବରେ ହେଉଥିବା ବ୍ରେନ୍ ଇନଫେକ୍ସନ (ମସ୍ତିଷ୍କ ସଂକ୍ରମଣ) ଯୋଗୁଁ ମୂଷାଗୁଡ଼ିକର ମୃତ୍ୟୁ ହୋଇଥିଲା ବୋଲି ବିଶେଷଜ୍ଞ ବିଶ୍ବାସ କରୁଥିବା ରିପୋର୍ଟରେ ଦାବି ହୋଇଛି । ସେପଟେ ଭୂତାଣୁ ଯେ କେବଳ ମୂଷା ଶରୀରକୁ ସଂକ୍ରମିତ କରୁଛି ତାନୁହେଁ ବରଂ ଏହା ମସ୍ତିଷ୍କ, ଆଖି ଓ ଫୁସଫୁସ୍କୁ ଅକାମୀ କରିପକାଉଛି। କୋଭିଡ ଭଳି ଏହି ଭୂତାଣୁ ବା ‘ପାଙ୍ଗୋଲିନ୍ କରୋନା ଭାଇରସ୍’ରେ ସଂକ୍ରମିତ ଦ୍ବାରା ସମସ୍ତ ମୂଷାର ମୃତ୍ୟୁ ହୋଇଥିଲା। ଆଉ ଏହି ଭୂତାଣୁ ମଣିଷ ଶରୀରରେ ବି ଗୁରୁତର ପ୍ରଭାବ ପକାଇପାରେ ବୋଲି ଗବେଷକମାନେ ଦାବି କରିଛନ୍ତି ।