ପୁରୀ,୦୯/୦୫ ଶ୍ରୀନଅର ସମ୍ମୁଖ ଖଳାରେ ଆଗେଇ ଚାଲିଛି ରଥତ୍ରୟର ୪୨ ଚକ ପ୍ରସ୍ତୁତି । ଖଳାରେ ବ୍ୟସ୍ତ ବିଶ୍ୱକର୍ମା, କରତି ଓ ଭୋଇ ସେବକ । ଦୋଳବେଦି ଶାଳରେ ନିୟୋଜିତ ହୋଇଛନ୍ତି ଓଝା ସେବକ । ଗୁରୁବାର ରଥର ପ୍ରଥମ ଦୁଇ ନାହାକା ଚକର ପନ୍ଦାରି ନିର୍ମାଣ ଶେଷ ହୋଇଛି । ତୁମ୍ବଗୁଡ଼ିକର ଭିତର ପାଶ୍ୱର୍ରେ ଲାଗିବ ପନ୍ଦାରି । ତାହାକୁ ମଜଭୁତ କରିବାକୁ ଚାବି ତିଆରି ହୋଇ ପନ୍ଦାରିରେ ପଡ଼ିବ । ଘୁ ଘୁ ଶବ୍ଦ କରି ରଥ ଗଡ଼ିଯାଉଥିବା ବେଳେ ପନ୍ଦାରିର ଗୁରୁତ୍ୱପୂର୍ଣ୍ଣ ଭୂମିକା ରହିଥାଏ । ପନ୍ଦାରି ଯୋଗୁ ଘର୍ଷଣ ନିୟନ୍ତ୍ରଣରେ ରହିବା ସହ ଅଖ ଓ ଚକର ସୁରକ୍ଷା ହୋଇଥାଏ ।
ରଥଖଳାରେ ତୁମ୍ବରେ ବିନ୍ଧ ଖୋଦେଇ ଶେଷ ହେବା ଉପରେ । ଗୁରୁବାରଠୁ ଅଗର ବିନ୍ଧ ଖୋଦେଇ ଆରମ୍ଭ ହୋଇଛି । ସିଙ୍ଗଡ଼ା ବାଡ଼ିଆ ଅବସରରେ ସେଥିରେ ଅରକଣ୍ଟା ଲାଗିବ କୁହନ୍ତି ଭୋଇ ସର୍ଦ୍ଦାର ରବି ଭୋଇ । ତୁମ୍ବରେ ଅର ପାଇଁ ଯେପରି ୧୬ ଯୋଡ଼ା ବିନ୍ଧ ହେଉଛି ଠିକ୍ ସେହି ସଂଖ୍ୟକ ଅଗର ବିନ୍ଧ ଖୋଦେଇ ହୁଏ । ଅର ବିନ୍ଧ ତୁଳନାରେ ଅଗର ବିନ୍ଧ ଛୋଟ । ତିନି ରଥର ମୁଖ୍ୟ ବିଶ୍ୱକର୍ମାଙ୍କ ତତ୍ତ୍ୱାବଧାନରେ ରଥ ନିର୍ମାଣ ଆଗେଇ ଚାଲିଛି ।
ରଥ ଖଳାକୁ ୧୨ ଫୁଟିଆ ଅରମୁଣ୍ଡି କାଠ ଯୋଗାଯାଇଛି । ରଥରେ ଗୁଜ ନିର୍ମାଣ ପାଇଁ ଅରମୁଣ୍ଡି କାଠ ଲାଗିବ । ଖଳାରେ ଚାଲିଥିବା ଚକ କାମକୁ ତାଳ ଦେଇ ଶାଳରେ ତିଆରି ହେଉଛି ଲୁହା ସାମଗ୍ରୀ । ପ୍ରଥମ ପର୍ଯ୍ୟାୟରେ ତୁମ୍ବ ପାଇଁ ଅରକଣ୍ଟା, ପନ୍ଦାରି ଓ ବଳା ନିର୍ମାଣ ଚାଲିଥିବା ନନ୍ଦିଘୋଷର ମୁଖ୍ୟ କମାର ସେବକ ଦାଶରଥି ମହାରଣା କହିଛନ୍ତି ।
