ଭୁବନେଶ୍ୱର: ନୂଆ ଓ ନବୀକରଣଯୋଗ୍ୟ ଶକ୍ତି ମନ୍ତ୍ରଣାଳୟ (MNRE) ସଚିବ ଶ୍ରୀ ସନ୍ତୋଷ କୁମାର ସଡଙ୍ଗୀ ଓଡ଼ିଶାର ମୁଖ୍ୟ ସଚିବ ଶ୍ରୀ ମନୋଜ ଆହୁଜା ଏବଂ ରାଜ୍ୟର ବରିଷ୍ଠ ଅଧିକାରୀମାନଙ୍କ ସହ ଏକ ବୈଠକରେ ଭାରତ ସରକାରଙ୍କ ଦୁଇଟି ପ୍ରମୁଖ କାର୍ଯ୍ୟକ୍ରମ ନ୍ୟାସନାଲ ଗ୍ରୀନ ହାଇଡ୍ରୋଜେନ ମିଶନ (NGHM) ଏବଂ ପିଏମ ସୂର୍ଯ୍ୟ ଘର: ମୁଫତ ବିଜଳି ଯୋଜନା (PMSG: MBY) ଉପରେ ଆଲୋଚନା କରିଛନ୍ତି।

ସବୁଜ ହାଇଡ୍ରୋଜେନରେ ଓଡ଼ିଶାର ନେତୃତ୍ୱକୁ ନେଇ ମୁଖ୍ୟ ସଚିବ ଶ୍ରୀ ଆହୁଜା ଜୋର ଦେଇ କହିଛନ୍ତି ଯେ ଓଡ଼ିଶା ଭାରତର ସବୁଜ ହାଇଡ୍ରୋଜେନ ରୂପାନ୍ତରଣରେ ନେତୃତ୍ୱ ନେବା ପାଇଁ ଦୃଢ଼ ଅବସ୍ଥାନରେ ରହିଛି। ଜଳ ଉପଲବ୍ଧତା, ବଡ଼ ପରିମାଣର ନବୀକରଣଯୋଗ୍ୟ ଶକ୍ତି ସଂଯୋଗ ଏବଂ ସହାୟକ ଭିତ୍ତିଭୂମି ବିକାଶ ଭଳି ପ୍ରତିବନ୍ଧକ ସତ୍ତ୍ୱେ, ରାଜ୍ୟର କୌଶଳଗତ ଉପକୂଳୀୟ ଅବସ୍ଥାନ, ମଜବୁତ ଶିଳ୍ପ ଇକୋସିଷ୍ଟମ ଏବଂ ସକ୍ରିୟ ନୀତିଗତ କାର୍ଯ୍ୟପଞ୍ଜିକା ଓଡ଼ିଶାକୁ ସବୁଜ ହାଇଡ୍ରୋଜେନ ଡେରିଭେଟିଭ୍ସର ବିଶ୍ୱବ୍ୟାପୀ ରପ୍ତାନିକାରୀ ଭାବେ ଉଭା କରିବାରେ ସହାୟକ ହେବ। MNRE ସଚିବ ଉଲ୍ଲେଖ କରିଛନ୍ତି ଯେ ଓଡ଼ିଶା ଭାରତର ସବୁଜ ହାଇଡ୍ରୋଜେନ ବୃଦ୍ଧିରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବା ପାଇଁ ଅନନ୍ୟ ଅବସ୍ଥାନରେ ରହିଛି। ବିଶେଷକରି ପାରାଦୀପ ଓ ଗୋପାଳପୁର ବନ୍ଦର ନିକଟବର୍ତ୍ତୀ ଅଞ୍ଚଳରେ ସବୁଜ ଆମୋନିଆ/ସବୁଜ ମେଥାନଲ ଉତ୍ପାଦନ ପାଇଁ ଦେଶୀୟ ନିବେଶକଙ୍କ ମଧ୍ୟରେ ଉଲ୍ଲେଖନୀୟ ଆଗ୍ରହ ଦେଖାଦେଇଛି।

ବୈଠକରେ ଓଡ଼ିଶା ସରକାର, କେନ୍ଦ୍ରୀୟ ମନ୍ତ୍ରଣାଳୟ ଏବଂ ପ୍ରମୁଖ ସବୁଜ ହାଇଡ୍ରୋଜେନ ଡେଭେଲପରମାନେ ଯୋଗ ଦେଇ ଗୋପାଳପୁର SEZରେ ବଡ଼ ପରିମାଣର ସବୁଜ ହାଇଡ୍ରୋଜେନ/ସବୁଜ ଆମୋନିଆ ପ୍ରକଳ୍ପ ବିକାଶରେ ଥିବା ଗୁରୁତ୍ୱପୂର୍ଣ୍ଣ ଚ୍ୟାଲେଞ୍ଜଗୁଡ଼ିକ ଉପରେ ଆଲୋଚନା କରିଛନ୍ତି। ଏହି ଉଦ୍ୟମ ଭାରତର ଦ୍ରୁତ ବିକାଶଶୀଳ ସବୁଜ ହାଇଡ୍ରୋଜେନ ଇକୋସିଷ୍ଟମ ପାଇଁ ଏକ ସମଗ୍ର ରୋଡମ୍ୟାପ ପ୍ରସ୍ତୁତ କରିବାକୁ ଲକ୍ଷ୍ୟ ରଖିଛି। ଓଡ଼ିଶା ସରକାର ସବୁଜ ହାଇଡ୍ରୋଜେନ ଡେରିଭେଟିଭ୍ସର ଉତ୍ପାଦନ ଓ ରପ୍ତାନି ପାଇଁ ଏକ ସହଯୋଗୀ ଇକୋସିଷ୍ଟମ ଏବଂ ପସନ୍ଦଯୋଗ୍ୟ ନିବେଶ ଗନ୍ତବ୍ୟ ସ୍ଥାପନ ପାଇଁ ନିର୍ଦ୍ଦିଷ୍ଟ ସମୟସୀମାରେ ପ୍ରତିବଦ୍ଧତା ପୁନର୍ବାର ଜଣାଇଛନ୍ତି।

ପିଏମ ସୂର୍ଯ୍ୟ ଘର; ମୁଫତ ବିଜଳି ଯୋଜନା : ଏହି ଯୋଜନା ଦେଶବ୍ୟାପୀ ଛାତ ଉପରେ ସୌର ପ୍ୟାନେଲ ସ୍ଥାପନକୁ ପ୍ରୋତ୍ସାହିତ କରିବା ଲକ୍ଷ୍ୟ ରଖିଛି। MNRE ଓଡ଼ିଶାର କାର୍ଯ୍ୟଦକ୍ଷତା ସମୀକ୍ଷା କରି ଜିଲ୍ଲା କଲେକ୍ଟରମାନଙ୍କୁ ରାଜ୍ୟରେ ଛାତ ସୌର ସ୍ଥାପନକୁ ତ୍ୱରାନ୍ୱିତ କରିବାକୁ ନିର୍ଦ୍ଦେଶ ଦେଇଛନ୍ତି। ମୁଖ୍ୟ ସଚିବ ନିୟମିତ ରାଜ୍ୟ ସ୍ତରୀୟ ବ୍ୟାଙ୍କର କମିଟି (SLBC) ବୈଠକ, ବିକ୍ରେତା ଓ ବ୍ୟାଙ୍କ ସହ ସମ୍ପର୍କ ସ୍ଥାପନ ଏବଂ ଋଣ ମଞ୍ଜୁରୀ ଓ ବଣ୍ଟନରେ ତତ୍ପରତା ଆଣିବାକୁ ପରାମର୍ଶ ଦେଇଛନ୍ତି। ସେ ନିମ୍ନ ଆୟ ବର୍ଗର ପରିବାରଙ୍କ ପାଇଁ ୧ କିଲୋୱାଟରୁ କମ କ୍ଷମତାର ସୌର ସିଷ୍ଟମ ସ୍ଥାପନ ପାଇଁ ୟୁଟିଲିଟି-ଲେଡ ଆଗ୍ରିଗେସନ (ULA) ମଡେଲ କାର୍ଯ୍ୟକାରୀ କରିବାକୁ ନିର୍ଦ୍ଦେଶ ଦେଇଛନ୍ତି।

ପିଏମ କୁସୁମ ଯୋଜନା: MNRE ଅନ୍ୟ ରାଜ୍ୟମାନଙ୍କ ଦ୍ୱାରା ଗ୍ରହଣ କରାଯାଇଥିବା କୃଷି ସୌରୀକରଣ ପାଇଁ ଶ୍ରେଷ୍ଠ ଅଭ୍ୟାସଗୁଡ଼ିକ ଉପସ୍ଥାପନ କରିଛି। ଏହାକୁ ଦୃଷ୍ଟିରେ ରଖି ମୁଖ୍ୟ ସଚିବ ରାଜ୍ୟ ନୋଡାଲ ଏଜେନ୍ସିକୁ ଫିଡର ସ୍ତରୀୟ ସୌରୀକରଣ କାର୍ଯ୍ୟକାରୀ କରି କୃଷକ ସମୁଦାୟକୁ ପରିଷ୍କାର ଶକ୍ତିର ଲାଭ ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି।