ଭୁବନେଶ୍ୱର,୦୯/୦୫: ବଢ଼ିଲା ବିଶ୍ୱବିଦ୍ୟାଳୟ ଅନୁଦାନ ଆୟୋଗ ନେଟ୍ ଜୁନ୍ ୨୦୨୫ ଆବେଦନ ଶେଷ ତାରିଖ । ଗତକାଲି (ବୁଧବାର) ଦିନ ଆବେଦନ ପ୍ରକ୍ରିୟା ଶେଷ ହୋଇଥିବା ବେଳେ ଛାତ୍ରଛାତ୍ରୀଙ୍କ ଆଗ୍ରହକୁ ଦୃଷ୍ଟିରେ ରଖି ଆବେଦନ ସୀମାକୁ ଆସନ୍ତା ୧୨ ତାରିଖ ଯାଏ ବୃଦ୍ଧି କରାଯାଇଛି । ଏନେଇ ନ୍ୟାସନାଲ୍ ଟେଷ୍ଟିଂ ଏଜେନ୍ସି ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି ।
ଏନ୍ଟିଏର ବିଜ୍ଞପ୍ତି ଅନୁଯାୟୀ, ୧୩ ତାରିଖ ମଧ୍ୟରେ ଆବେଦନ ଫି ଅନ୍ଲାଇନ ମାଧ୍ୟମରେ ଦାଖଲ କରିବାର ସୁଯୋଗ ମିଳିବ । ୧୪ ଓ ୧୫ରେ ଆବଦେନ ଫର୍ମର ସଂଶୋଧନ ସୁଯୋଗ ମିଳିବ । ଜୁନ୍ ୨୧ରୁ ଜୁନ୍ ୩୦ ମଧ୍ୟରେ ପରୀକ୍ଷା କରିବାକୁ ଲକ୍ଷ୍ୟ ରଖାଯାଇଛି । ସାଧାରଣ ବର୍ଗର ପ୍ରାର୍ଥୀଙ୍କ ପାଇଁ ୧୧୫୦ ଟଙ୍କା, ସାଧାରଣ ବର୍ଗ (ଆର୍ଥିକ ଅନଗ୍ରସର ଶ୍ରେଣୀ)/ଓବିସି/ ଏନ୍ସିଏଲ୍ ପ୍ରାର୍ଥୀଙ୍କ ପାଇଁ ୬୦୦ ଟଙ୍କା, ଏସ୍ସି, ଏସ୍ଟି, ତୃତୀୟ ଲିଙ୍ଗି ପ୍ରାର୍ଥୀଙ୍କ ପାଇଁ ୩୨୫ ଟଙ୍କା ଆବେଦନ ଫି ରହିଛି ।
ସୂଚନାଯୋଗ୍ୟ, କଲେଜ ଓ ବିଶ୍ୱବିଦ୍ୟାଳୟରେ ଜୁନିଅର ରିସର୍ଚ୍ଚ ଫେଲୋସିପ୍ ଓ ଆସିଷ୍ଟାଣ୍ଟ ପ୍ରଫେସର ନିଯୁକ୍ତି ଓ ପିଏଚ୍ଡି ନାମଲେଖା ପାଇଁ ୟୁଜିସି ନେଟ୍ ପରୀକ୍ଷାର ଆବଶ୍ୟକତା ରହିଛି । ଏନେଇ ସମସ୍ତ ସୂଚନା ଏନ୍ଟିଏ ୱେବ୍ସାଇଟ୍ www.nta.ac.inରେ ରହିଛି ।
