ମୁମ୍ବାଇ ୦୨/୦୭: ଜୁଲାଇ ୨୮, ୨୦୦୮ରେ ସୋନି ସବ୍ ଚ୍ୟାନେଲରେ ଆରମ୍ଭ ହୋଇଥିଲା ‘ତାରକ ମେହତା କା ଉଲ୍ଟା ଚଷମା’ର ପ୍ରସାରଣ । ସେହିଦିନଠୁ ନିରବଚ୍ଛିନ୍ନ ଭାବେ ଏ ଧାରାବାହିକ ଲୋକଙ୍କୁ ମନୋରଞ୍ଜନ ଯୋଗାଇ ଆସିଛି । ଦିଲ୍ଲୀପ ଯୋଶୀ ଏ ସିରିଏଲର ଜେଠାଲାଲ ଚରିତ୍ର ନିର୍ବାହ କରୁଛନ୍ତି । କିନ୍ତୁ ଦିଲ୍ଲୀପଙ୍କ ପୂର୍ବରୁ ଏ ଚରିତ୍ର ପାଇଁ ନିର୍ମାତା ରାଜପାଲ ଯାଦବ, ଅଲ୍ଲୀ ଅସଗର, କିକୁ ସାରଦା, ଏହସାନ କୁରେଶି ଓ ଯୋଗେଶ ତ୍ରିପାଠୀଙ୍କୁ ଯୋଗାଯୋଗ କରିଥିଲେ ହେଁ ବିଭିନ୍ନ କାରଣରୁ ସେମାନେ ମନା କରିଦେଇଥିଲେ।
ସୋନି ସବ୍ ଚ୍ୟାନେଲରେ ଗତ ସତର ବର୍ଷରୁ ଅଧିକ ସମୟ ଧରି ପ୍ରସାରିତ ହୋଇଆସୁଛି ହାସ୍ୟରସ ଆଧାରିତ ଧାରାବାହିକ ‘ତାରକ ମେହତା କା ଉଲ୍ଟା ଚଷମା’ । ଗୁଜରାତି ନାଟ୍ୟକାର ତାରକ ଜାନୁଭାଇ ମେହତାଙ୍କ ଲିଖିତ ‘ଦୁନିଆ ନେ ଉନ୍ଧା ଚଷମା’ ଆଧାରରେ ହିନ୍ଦୀ ଭାଷାରେ ପ୍ରସ୍ତୁତ ହୋଇଛି ଏହି ଧାରାବାହିକ । ଏହାରି ମଧ୍ୟରେ ଏହି ସିରିଏଲର ୪୪୩୧ରୁ ଅଧିକ ଏପିସୋଡ ପ୍ରସାରିତ ହୋଇ ଖୁବ୍ ଲୋକପ୍ରିୟତା ସାଉଁଟିଛି । ଏଥିରେ ଅଭିନୟ କରିଥିବା ସମସ୍ତ କଳାକାର ମଧ୍ୟ ଘରେ ଘରେ ପରିଚିତି ହାସଲ କରିଛନ୍ତି । ଏହି ଧାରାବାହିକର ମୁଖ୍ୟ ଚରିତ୍ରଗୁଡ଼ିକ ମଧ୍ୟରୁ ଜେଠାଲାଲ ଚମ୍ପକଲାଲ ଘଡ଼ା ଅନ୍ୟତମ । ଅଭିନେତା ଦିଲ୍ଲୀପ ଯୋଶୀ ଏହି ଚରିତ୍ରରେ ଅଭିନୟ କରୁଛନ୍ତି ।
ଦିଲ୍ଲୀପ ଏହା ପୂର୍ବରୁ କିଛି ହିନ୍ଦୀ ସିନେମା ଓ ସିରିଏଲରେ ଅଭିନୟ କରିଥିଲେ ହେଁ ଜେଠାଲାଲ ଚରିତ୍ର ହିଁ ତାଙ୍କୁ ସର୍ବାଧିକ ସଫଳତା ଓ ଦର୍ଶକୀୟ ସମର୍ଥନ ଦେଇଛି । ଏହି ଚରିତ୍ର ତାଙ୍କର ଜୀବନ ବଦଳାଇ ଦେଇଛି । ଦିଲ୍ଲୀପ ନିଜର ଏକ୍ସପ୍ରେସନ, କମିକ୍ ଟାଇମିଙ୍ଗ୍ ଓ ନିଆରା ଅଭିନୟ ବଳରେ ଏହି ଚରିତ୍ରକୁ ଏଭଳି ଲୋକପ୍ରିୟ କରିପାରିଛନ୍ତି । ତେବେ ଦିଲ୍ଲୀପ ଏ ଚରିତ୍ରରେ ଅବତୀର୍ଣ୍ଣ ହେବା ପୂର୍ବରୁ ସୋ’ର ନିର୍ମାତା ୫ ଜଣ ନାଁକରା କଳାକାରଙ୍କୁ ଏହି ଚରିତ୍ରରେ ନେବାକୁ ଚାହିଁଥିଲେ । କିନ୍ତୁ ସେମାନେ କେହି ଏଥିପାଇଁ ରାଜି ହୋଇନଥିଲେ । ଜେଠାଲାଲ ଚରିତ୍ର ପାଇଁ ନିର୍ମାତା ସର୍ବପ୍ରଥମେ କମେଡିଆନ ରାଜପାଲ ଯାଦବଙ୍କ ସହ ଯୋଗାଯୋଗ କରିଥିଲେ । ରାଜପାଲଙ୍କ କମିକ୍ ଟାଇମିଙ୍ଗ୍ ପାଇଁ ଏ ଅଫର୍ ମିଳିଥିଲା । କିନ୍ତୁ ରାଜପାଲ ଏଥିରେ ରାଜି ହୋଇନଥିଲେ ।
ରାଜପାଲଙ୍କ ନାସ୍ତିବାଣୀ ଶୁଣି ଅଲ୍ଲୀ ଅସଗରଙ୍କୁ ନେବା ପାଇଁ ନିର୍ମାତା ଆଗ୍ରହ ଦେଖାଇଥିଲେ । କିନ୍ତୁ ଅଲ୍ଲୀ ଅସଗର ସେହି ସମୟରେ ସିନେମା, ସିରିଏଲ ଅଭିନୟରେ ଏତେ ବ୍ୟସ୍ତ ଥିଲେ ଯେ, ‘ତାରକ ମେହତା କା ଉଲ୍ଟା ଚଷମା’ ପାଇଁ ସମୟ ଦେଇପାରିବେ ନାହିଁ କହି ଅନିଚ୍ଛା ପ୍ରକାଶ କରିଥିଲେ । ଉପରୋକ୍ତ ଦୁଇ କଳାକାର ଅନାଗ୍ରହୀ ହେବା ପରେ ‘କପିଲ ଶର୍ମା ସୋ’ର ଅନ୍ୟତମ କଳାକାର କିକୁ ସାରଦାଙ୍କୁ ଏ ରୋଲ୍ ଯାଚିଥିଲେ ନିର୍ମାତା ଲଳିତ ମୋଦି । କିନ୍ତୁ ଦୀର୍ଘଦିନ ଧରି ପ୍ରସାରିତ ହେବାକୁ ଥିବା କୌଣସି ଧାରାବାହିକରେ ଅଭିନୟ କରିବାକୁ ଇଚ୍ଛା ନଥିବାରୁ କିକୁ ମଧ୍ୟ ଜେଠାଲାଲ ହେବାକୁ ଚାହିଁଲେ ନାହିଁ । କିକୁ ରାଜି ନ ହେବା ପରେ ପ୍ରଯୋଜକ ଷ୍ଟାଣ୍ଡଅପ୍ କମେଡିଆନ୍ ଏହସାନ କୁରେଶୀଙ୍କୁ ଭେଟି ସବୁ କଥା କହିଥିଲେ । କିନ୍ତୁ ଜେଠାଲାଲ ଚରିତ୍ର ଏହସାନଙ୍କ ମନକୁ ପାଇନଥିଲା ଓ ସେ ଏଥିରେ ଅଭିନୟ କରିବେ ନାହିଁ ବୋଲି ଜଣାଇ ଦେଇଥିଲେ ।
ଚାରି ଚାରି ଜଣ ମନା କରିବା ପରେ ‘ଭାବିଜୀ ଘର ପର ହେ’ରେ ହପ୍ପୁ ସିଂହ ଚରିତ୍ର ନିର୍ବାହ କରୁଥିବା ଯୋଗେଶ ତ୍ରିପାଠୀଙ୍କୁ ସୁଯୋଗ ଦେବାକୁ ଚାହିଁଥିଲେ ଲଳିତ । କିନ୍ତୁ ଅନ୍ୟାନ୍ୟ କାର୍ଯ୍ୟକ୍ରମରେ ବ୍ୟସ୍ତ ଯୋଗେଶ ମଧ୍ୟ ‘ତାରକ ମେହତା କା ଉଲ୍ଟା ଚଷମା’ ପାଇଁ ସମୟ ଦେଇପାରିବେ ନାହିଁ କହି ଲଳିତଙ୍କୁ ଫେରାଇ ଦେଇଥିଲେ । ଶେଷରେ ଦିଲ୍ଲୀପ ଯୋଶୀ ଏହି ଚରିତ୍ର ପାଇଁ ରାଜି ହୋଇଥିଲେ ଓ କେବଳ ଦିଲ୍ଲୀପ ନୁହନ୍ତି, ସୋ’ର ପ୍ରତିଟି କଳାକାର ଚମତ୍କାର ଅଭିନୟ କରି ସୋ’କୁ ସଫଳତା ପ୍ରଦାନ କରିଛନ୍ତି ।
