ଭୁବନେଶ୍ୱର ୦୨/୦୭: ଲୋକପ୍ରିୟ ଓଲିଉଡ ଅଭିନେତ୍ରୀ ଅର୍ଚ୍ଚିତାଙ୍କ ମୁକ୍ତି ପ୍ରତୀକ୍ଷାରେ ଥିବା ନୂଆ ଓଡ଼ିଆ ଚଳଚ୍ଚିତ୍ର ‘ଡେଲିଭରି ବୟ ୨’ରେ ଡେଲିଭରି ଗର୍ଲ 'ପଲ୍ଲବୀ' ଚରିତ୍ରରେ ଅବତୀର୍ଣ୍ଣ ହୋଇଛନ୍ତି । ଏ ଫିଲ୍ମରେ ଦେଖିବାକୁ ମିଳିବ ଘର, ପରିବାର ଓ ସ୍ୱପ୍ନ ପାଇଁ ତାଙ୍କ ସଂଘର୍ଷର କଥା ।
ଅର୍ଚ୍ଚିତା କହିଛନ୍ତି, ଏ ଚରିତ୍ର ତାଙ୍କର ହୃଦୟ ସହ ଜଡ଼ିତ । ସେ କେବଳ ଗ୍ରାହକଙ୍କୁ ଖାଦ୍ୟ ଯୋଗାଉନାହାନ୍ତି, ଏ ପେସା ମାଧ୍ୟମରେ ସେ ନିଜ ପରିବାର ପାଇଁ ବୋହି ଆଣୁଛନ୍ତି ଆଶା ଓ ଭରସା । ଡେଲିଭରି ଗର୍ଲ ଭାବେ କାମ କରି ସେ ପରିବାର ଚଳାଇବା ସହ ବ୍ୟକ୍ତିଗତ ସ୍ୱପ୍ନକୁ ବଞ୍ଚାଇ ରଖିବା ପାଇଁ ସଂଘର୍ଷ କରୁଛନ୍ତି । ଏହି ଚରିତ୍ରରେ ତାଙ୍କର ଅଭିନୟ ମହିଳାଙ୍କ ଆତ୍ମବିଶ୍ୱାସ ଓ ମନୋବଳ ବଢ଼ାଇବ ବୋଲି କଥାବାର୍ତ୍ତାବେଳେ କହିଥିଲେ ଅର୍ଚ୍ଚିତା । ଫିଲ୍ମରେ ଅର୍ଚ୍ଚିତାଙ୍କ ସହ-ଅଭିନେତା ଭାବେ ଦେଖିବାକୁ ମିଳିବେ ଶୈଳେନ୍ଦ୍ର । ଏହି ଦୁଇଜଣ ଡେଲିଭରି ପର୍ସନ୍ଙ୍କ କାହାଣୀ ଦ୍ୱାରା ସମାଜରେ ଖାଦ୍ୟ ଡେଲିଭରି କରୁଥିବା ମହିଳାଙ୍କ ସମସ୍ୟା, ସଂଘର୍ଷ ଓ ଅଦୃଶ୍ୟ ଦୁଃଖକୁ ସମସ୍ତଙ୍କ ସାମ୍ନାକୁ ଆଣିବାକୁ ଚେଷ୍ଟା କରାଯାଇଛି । ହସ, ଲୁହ, ସଂଘର୍ଷ ଓ ସ୍ୱପ୍ନଭରା ଏହି କାହାଣୀ ପରିବାର ଓ ଦାୟିତ୍ୱକୁ ନେଇ ଦର୍ଶକଙ୍କୁ ଭାବୁକ କରିଦେବ । ଶୈଳେନ୍ଦ୍ର ଓ ଅର୍ଚ୍ଚିତାଙ୍କ ବ୍ୟତୀତ ଏ ଫିଲ୍ମର ଅନ୍ୟାନ୍ୟ ଚରିତ୍ରରେ ବୁଦ୍ଧାଦିତ୍ୟ, ଶ୍ରୀତମ ଦାସ, ପ୍ରିୟମ୍ବଦା, ପୁପିନ୍ଦର ଓ ସଣ୍ଟୁ ନିଜେ ପ୍ରମୁଖ ଅଭିନୟ କରିଛନ୍ତି । ଜ୍ୟୋତିରଞ୍ଜନ ମହାନ୍ତି ଏ ଫିଲ୍ମର ପ୍ରଯୋଜକ ଥିବାବେଳେ ନିର୍ଦ୍ଦେଶନା ଦେଇଛନ୍ତି ଅଶ୍ୱିନ ତ୍ରିପାଠୀ । ଫିଲ୍ମର ରିଲିଜ୍ ତାରିଖ ଶୀଘ୍ର ଘୋଷଣା କରାଯିବ ।
