ଭୁବନେଶ୍ୱର,୦୨/୦୭: ସ୍ୱତନ୍ତ୍ର ଏନ୍କ୍ଲୋଜରରୁ ମୁକୁଳିବା ପରେ ଯମୁନାଗଡ଼ରେ ଜିନ୍ନତ ସହ ପ୍ରଥମେ ମହାବଳ ବାଘ ‘ଟି-୩୧’ ର ଭେଟଘାଟ ହେଲା । ମରାଠା ସୁନ୍ଦରୀ ଚେହେରା ଦେଖି ପ୍ରେମରେ ପଡିଗଲା ଟି-୩୧ । ଢେର ଦିନ ପଛରେ ଗୋଡ଼ାଇଲା । ହେଲେ ଏହି ମହାବଳର ଯୌବନକୁ ପସନ୍ଦ କଲାନି ଜିନ୍ନତ । ଶେଷରେ ହତାଶ ହୋଇ ଶିମିଳିପାଳର କୋର ଏରିଆକୁ ପଳାଇଲା ଟି-୩୧ ।
ସପ୍ତାହେ ବିତିଗଲା । ପୁଅ ‘ଟି-୩୧’ ଜାଗାରେ ଏଣ୍ଟ୍ରି ମାରିଲା ଶିମିଳିପାଳର ଜଣାଶୁଣା ମେଲାନିଷ୍ଟିକ୍ ପ୍ରଜାତିର ମହାବଳ ‘ଟି-୧୨’ । ବୟସ ୧୧ ଟପିବା ସତ୍ତେ୍ୱ ଟି-୧୨ର ହୃଷ୍ଟପୃଷ୍ଟ ବଳିଷ୍ଠ ଚେହେରା ସାଢ଼େ ୩ ବର୍ଷୀୟା ଚୁଲବୁଲି ଜିନ୍ନତକୁ ବେଶ୍ ଆକୃଷ୍ଟ କଲା । ଦୁହେଁ ଢେର୍ କିଛି ଦିନ ଜଙ୍ଗଲରେ ଏକାଠି ଘୁରି ବୁଲିଲେ । ପୁଅକୁ ଛାଡି ବାପା ପ୍ରେମର ଫସିଲା ଜିନ୍ନତ । ଆଉ ଏହି ମରାଠା ବାଘୁଣୀ ଆସନ୍ତା ସେପ୍ଟେମ୍ବରରେ ମା’ ହେବାକୁ ଯାଉଛି ।
ବାଘୁଣୀର ଗର୍ଭବତୀ ଖବର ପରେ ଦେଖାଶୁଣା ପାଇଁ ଯତ୍ନଶୀଳ ହୋଇଉଠିଛି ବନ ବିଭାଗ । ପ୍ରତି ମୁହୂର୍ତ୍ତର ଗତିବିଧି ଉପରେ ନିରନ୍ତର ନଜର ରଖାଯାଉଛି । ଟି-୧୨ର ପ୍ରାୟ ୮ରୁ ଅଧିକ ଛୁଆ ଶିମିଳିପାଳ ଜଙ୍ଗଲରେ ବୁଲୁଛନ୍ତି । ଟି-୩୧ ହେଉଛି ଏହି ହୃଷ୍ଟପୃଷ୍ଟ ମହାବଳର ପ୍ରଥମ ପିଲା । ବୟସ ୬ ଟପିଯିବ । ପୁଅକୁ ଛାଡି ବାପା ପ୍ରେମରେ ଜିନ୍ନତ ଫସିବା ଏବେ ଚର୍ଚ୍ଚାର ବିଷୟ ପାଲଟିଛି ।
ବନ ବିଭାଗର ଜଣେ ବରିଷ୍ଠ ଅଧିକାରୀଙ୍କ କହିବା ମୁତାବକ, ଏପ୍ରିଲ ମାସ ଅଧାରେ ଯମୁନାଗଡ଼ସ୍ଥିତ ଏନ୍କ୍ଲୋଜରରୁ ମୁକୁଳିଥିଲା ଜିନ୍ନତ । ତା’ ବେକରେ ଏକ ସ୍ୱତନ୍ତ୍ର ରେଡିଓ କଲାର ବନ୍ଧାଯାଇଥିଲା । ଏହି ରେଡିଓ କଲାରରେ ସାଟେଲାଇଟ୍ ଟ୍ରାକିଂ ସହ ଏକ ମିନି ଭିଏଚ୍ଏଫ୍ ମେସିନ୍ ଖଞ୍ଜାଯାଇଛି ।
ଅଭୟାରଣ୍ୟର ଘଞ୍ଚ ଜଙ୍ଗଲ ଭିତରେ ବେଳେ ବେଳେ ସାଟେଲାଇଟ୍ ସିଗନାଲ ମିଳିନଥାଏ । ସେତେବେଳେ ବାଘୁଣୀର ଠିକଣା ଜଣାପଡୁନାହିଁ । ଭିଏଚ୍ଏଫ୍ରେ ଜିନ୍ନତର ଗିତିବିଧି ଉପରେ ନଜର ରଖାଯାଉଛି । ଅତି ବେଶିରେ ୧ କିମି ବର୍ଗ କିମି ଯାଏଁ ଭିଏଚ୍ଏଫ୍ ସିଗନାଲ୍ ଦେଇଥାଏ । ସେଥିପାଇଁ ବନ ବିଭାଗର ଗୋଟିଏ ଟିମ୍ ଅତି ନିକଟରୁ ଜିନ୍ନତ ଉପରେ ନଜର ରଖୁଛି । ଭିଏଚ୍ଏଫ୍ ସିଗନାଲ୍କୁ ଟ୍ରାକ୍ ପାଇଁ ୧ କିମି ପଛରେ ହିଁ ଜଗି ରହୁଛି । ଜିନ୍ନତର ସ୍ୱାସ୍ଥ୍ୟାବସ୍ଥା ପରୀକ୍ଷା କରିବାକୁ ଏକ ଡାକ୍ତରୀ ଦଳ ନିୟୋଜିତ ହୋଇଛନ୍ତି । ଜିନ୍ନତ ଯମୁନାଗଡ଼ଠାରୁ ଗୁଡୁଗୁଡି଼ଆ ଜଙ୍ଗଲରେ ହିଁ ଘୁରି ବୁଲୁଛି । ଭୋକ ମେଣ୍ଟାଇବା ପାଇଁ ହରିଣ, ବାରହା ଶିକାର କରୁଛି । ବର୍ତ୍ତମାନ ବାଘୁଣୀର ସ୍ୱାସ୍ଥ୍ୟାବସ୍ଥା ସ୍ଥିର ଥିବା ବନ ବିଭାଗ ସୂଚାଇଛି ।
