ନୂଆଦିଲ୍ଲୀ,୧୩।୯: ଦେଶରେ ଥିବା ମୋଟ୍ ୭୬୩ ସାଂସଦଙ୍କ ମଧ୍ୟରୁ ୩୦୬ ଜଣ ବା ୪୦%ଙ୍କ ବିରୋଧରେ ଅଛି ଫୌଜଦାରୀ ମାମଲା । ଏମାନଙ୍କ ମଧ୍ୟରୁ ପ୍ରାୟ ୧୯୪ (୨୫%) ଜଣଙ୍କ ବିରୋଧରେ ସଙ୍ଗିନ ମାମଲା ରହିଛି । ଏମାନେ ହତ୍ୟା, ହତ୍ୟା ଉଦ୍ୟମ, ଅପହରଣ ଏବଂ ମହିଳା ବିରୋଧୀ ଭଳି ସଙ୍ଗିନ ଅପରାଧରେ ଅଭିଯୁକ୍ତ ରହିଛନ୍ତି । ଆସୋସିଏସନ୍ ଫର୍ ଡେମୋକ୍ରାଟିକ୍ ରିଫର୍ମସ (ଏଡିଆର୍) ଓ ନ୍ୟାସନାଲ ଇଲେକ୍ସନ୍ ୱାଚ୍ (ଏନ୍ଇଡବ୍ଲ୍ୟୁ) ଦ୍ୱାରା ଜାରି ସଦ୍ୟ ରିପୋର୍ଟରୁ ଏହା ଜଣାପଡ଼ିଛି । ରିପୋର୍ଟ ମୁତାବକ କେରଳର ସର୍ବାଧିକ ୭୩% ସାଂସଦ ନିଜ ସତ୍ୟପାଠରେ ସେମାନଙ୍କ ବିରୋଧରେ ଆପରାଧିକ ମାମଲା ରହିଥିବା ଦର୍ଶାଇଛନ୍ତି । କେରଳରେ ମୋଟ ୨୯ ସାଂସଦଙ୍କ ମଧ୍ୟରୁ ୨୩ ଜଣ ବା ୭୯%ଙ୍କ ବିରୋଧରେ ଆପରାଧିକ ମାମଲା ରହିଛି । ଦ୍ୱିତୀୟ ସ୍ଥାନରେ ଥିବା ବିହାରରେ ୫୬ ସାଂସଦଙ୍କ ମଧ୍ୟରୁ ୪୧ ଜଣ ବା ୭୩%ଙ୍କ ବିରୋଧରେ ଫୌଜଦାରୀ ମାମଲା ଅଛି ।
ସେହିଭଳି ମହାରାଷ୍ଟ୍ରରେ ୬୫ ସାଂସଦଙ୍କ ମଧ୍ୟରୁ ୫୭% ବା ୩୭ ଜଣଙ୍କ ବିରୋଧରେ ମାମଲା ରହିଥିବା ବେଳେ ତେଲଙ୍ଗାନାରେ ୫୪% ବା ୨୪ରୁ ୧୩ ଜଣ ସାଂସଦଙ୍କ ବିରୋଧରେ ଫୌଜଦାରୀ ମାମଲା ଅଛି । ସଙ୍ଗିନ ଫୌଜଦାରୀ ମାମଲା କ୍ଷେତ୍ରରେ ବିହାର ସର୍ବାଗ୍ରେ ରହିଛି । ରାଜ୍ୟରେ ସର୍ବାଧିକ ୫୦% ସାଂସଦଙ୍କ ବିରୋଧରେ ସଙ୍ଗିନ ମାମଲା ରହିଥିବା ବେଳେ ଏହା ପଛକୁ ତେଲଙ୍ଗାନା (୩୮%), କେରଳ (୩୪%), ମହାରାଷ୍ଟ୍ର (୩୪%) ଓ ଉତ୍ତର ପ୍ରଦେଶ (୩୪%) ରହିଛି । ଲାକ୍ଷାଦ୍ୱୀପର ଜଣେ ସାଂସଦଙ୍କ ବିରୋଧରେ ଗମ୍ଭୀର ମାମଲା ରହିଥିବା ବେଳେ ବିହାରର ୨୮, ତେଲଙ୍ଗାନାର ୨୪ରୁ ୯, କେରଳର ୨୯ରୁ ୧୦, ମହାରାଷ୍ଟ୍ରର ୬୫ରୁ ୨୨ ଏବଂ ୟୁପିର ୧୦୮ ସାଂସଦଙ୍କ ମଧ୍ୟରୁ ୩୭ ଜଣଙ୍କ ବିରୋଧରେ ସଙ୍ଗିନ ଫୌଜଦାରୀ ମାମଲା ରହିଛି । ଏଡିଆର୍ ରିପୋର୍ଟ ଦର୍ଶାଇଛି ଯେ ଓଡ଼ିଶାରେ ଥିବା ମୋଟ୍ ୩୧ ସାଂସଦ (ଉଭୟ ଲୋକସଭା ଓ ରାଜ୍ୟସଭା)ଙ୍କ ମଧ୍ୟରୁ ୯ ଜଣ ବା ୨୯%ଙ୍କ ବିରୋଧରେ ଫୌଜଦାରୀ ମାମଲା ରହିଛି । ଏମାନଙ୍କ ମଧ୍ୟରୁ ମାତ୍ର ୨ ବା ୧୦%ଙ୍କ ବିରୋଧରେ ସଙ୍ଗିନ ମାମଲା ରହିଛି । ରାଜସ୍ଥାନର ୩୫ ସାଂସଦଙ୍କ ମଧ୍ୟରୁ ୨୩% ବା ୮ ଜଣଙ୍କ ବିରୋଧରେ ମାମଲା ରହିଥିବା ବେଳେ ୬% ବା ୨ ଜଣଙ୍କ ବିରୋଧରେ ଗୁରୁତର ମାମଲା ରହିଛି । ହରିଆଣାର ମୋଟ ୧୪ ସାଂସଦଙ୍କ ମଧ୍ୟରୁ ମାତ୍ର ଜଣଙ୍କ ବିରୋଧରେ ମାମଲା ରହିଛି । ତାଙ୍କ ବିରୋଧରେ କୌଣସି ସଙ୍ଗିନ ମାମଲା ନାହିଁ । ଦଳ ଦୃଷ୍ଟିରୁ ଦେଖିଲେ ବିଜେପିର ମୋଟ ୩୮୫ ସାଂସଦଙ୍କ ମଧ୍ୟରୁ ୧୩୯ ଜଣ ବା ୩୬%ଙ୍କ ବିରୋଧରେ ଫୌଜଦାରୀ ମାମଲା ରହିଥିବା ବେଳେ ସେମାନଙ୍କ ମଧ୍ୟରୁ ୯୮ ଜଣ ବା ୨୫%ଙ୍କ ବିରୋଧରେ ଗୁରୁତର ମାମଲା ରହିଛି ।
କଂଗ୍ରେସର ୮୧ ସାଂସଦଙ୍କ ମଧ୍ୟରୁ ୪୩ ଜଣ (୫୩%)ଙ୍କ ବିରୋଧରେ ମାମଲା ରହିଥିବା ବେଳେ ୨୬ (୩୨%) ଜଣଙ୍କ ବିରୋଧରେ ସଙ୍ଗିନ ମାମଲା ରହିଛି । ଆମ୍ ଆଦ୍ମି ପାର୍ଟି (ଆପ୍) ର ୧୧ ସାଂସଦଙ୍କ ମଧ୍ୟରୁ ୩ ଜଣ ବା ୨୭%ଙ୍କ ବିରୋଧରେ ମାମଲା ରହିଥିବା ବେଳେ ମାତ୍ର ଜଣଙ୍କ ବିରୋଧରେ ସଙ୍ଗିନ ମାମଲା ରହିଛି । ସେହିଭଳି ଟିଏମ୍ସିର ୩୬ ସାଂସଦଙ୍କ ମଧ୍ୟରୁ ୩୯% ବା ୧୪ ଜଣଙ୍କ ବିରୋଧରେ ମାମଲା ରହିଥିବା ବେଳେ ୧୯% ବା ୭ ଜଣଙ୍କ ବିରୋଧରେ ସଙ୍ଗିନ ମାମଲା ରହିଛି । ଶିବସେନା (ଉଦ୍ଧବ ଗୋଷ୍ଠୀ)ର ୯ ଜଣ ସାଂସଦଙ୍କ ମଧ୍ୟରୁ ୭ ଜଣ ବା ୭୮%ଙ୍କ ବିରୋଧରେ ଫୌଜଦାରୀ ମାମଲା ରହିଥିବା ବେଳେ ୪୪% ବା ୪ ଜଣଙ୍କ ବିରୋଧରେ ଗୁରୁତର ମାମଲା ରହିଛି । ଏନ୍ସିପିର ମୋଟ ୮ ସାଂସଦଙ୍କ ମଧ୍ୟରୁ ୩୮% ବା ୩ ଜଣଙ୍କ ବିରୋଧରେ ମାମଲା ରହିଥିବା ବେଳେ ୨ ଜଣଙ୍କ ବିରୋଧରେ ସଙ୍ଗିନ ମାମଲା ରହିଛି । ରାଜ୍ୟସଭାର ୨୨୫ ସାଂସଦଙ୍କ ମଧ୍ୟରୁ ୨୭ ଜଣ (୨୭%) ଅରବପତି (ବିଲିୟନେୟାର) ରହିଥିବା ଏଡିଆର୍ ରିପୋର୍ଟ ଦର୍ଶାଇଛି ।
ମୋଟ୍ ୨୨୫ ସାଂସଦଙ୍କ ମଧ୍ୟରୁ ବିଜେପିର ସର୍ବାଧିକ ୮୫ ସଦସ୍ୟ ରହିଛନ୍ତି । ଏମାନଙ୍କ ମଧ୍ୟରୁ ୬ ଜଣ ବା ୭% ସାଂସଦ ଅରବପତି ଅଛନ୍ତି । କଂଗ୍ରେସର ୩୦ ସାଂସଦଙ୍କ ମଧ୍ୟରୁ ୪ ଜଣ ବା ୧୩% ଅରବପତି ରହିଛନ୍ତି । ୱାଇଏସ୍ଆର କଂଗ୍ରେସର ୯ରୁ ୪ ଜଣ (୪୪%) ଅରବପତି ହୋଇଥିବା ବେଳେ ଆପ୍ର ୧୦ରୁ ୩ (୩୦%) ଜଣ, ବିଆର୍ଏସ୍ର ୭ରୁ ୩ ଜଣ (୪୩%) ସାଂସଦ ଅରବପତି । ଯଦି ରାଜ୍ୟ ଦୃଷ୍ଟିରୁ ଦେଖାଯାଏ ତେବେ ଆନ୍ଧ୍ରପ୍ରଦେଶର ୪୫% ସାଂସଦ ଓ ତେଲଙ୍ଗାନାର ୪୩% ସାଂସଦ ଅରବପତି ଥିବା ଜଣାପଡ଼ିଛି । ରାଜ୍ୟସଭା ସାଂସଦମାନଙ୍କର ହାରାହାରି ସମ୍ପତ୍ତି ମୂଲ୍ୟ ୮୦.୯୩ କୋଟି ଟଙ୍କା । ବିଜେପି ସାଂସଦଙ୍କର ହାରାହାରି ସମ୍ପତ୍ତି ୩୦.୩୪ କୋଟି ଟଙ୍କା ହୋଇଥିବା ବେଳେ କଂଗ୍ରେସର ୩୦ ସାଂସଦଙ୍କ ହାରାହାରି ସମ୍ପତ୍ତି ୫୧.୬୫ କୋଟି, ଟିଏମ୍ସିର ୧୩ ସଦସ୍ୟଙ୍କ ହାରାହାରି ସମ୍ପତ୍ତି ୩.୫୫ କୋଟି, ୱାଇଏସ୍ଆର୍ କଂଗ୍ରେସର ୯ ରାଜ୍ୟସଭା ସାଂସଦଙ୍କର ହାରାହାରି ସମ୍ପତ୍ତି ମୂଲ୍ୟ ୩୯୫.୬୮ କୋଟି ଟଙ୍କା ରହିଛି । ଅନ୍ୟପକ୍ଷରେ ଦେଶର ୪,୦୦୧ ବିଧାୟକଙ୍କ ମୋଟ ସମ୍ପତ୍ତି ମୂଲ୍ୟ ୫୪,୫୪୫ କୋଟି ଟଙ୍କା ବୋଲି ଏଡିଆର୍ ରିପୋର୍ଟ କହିଛି ।