ରାଉରକେଲା, ୨୯।୧: ଆଉ କେଇଟା ମାସ ପରେ ନିର୍ବାଚନ । ସୁନ୍ଦରଗଡ଼ ଜିଲ୍ଲାରେ ଆଶାୟୀ ପ୍ରାର୍ଥୀଙ୍କଠାରୁ ଆରମ୍ଭ କରି ବିଧାୟକ, ମନ୍ତ୍ରୀ ଓ ଦଳୀୟ କର୍ମୀମାନେ ବିଭିନ୍ନ ଖେଳପଡ଼ିଆ ଆଡ଼କୁ ମୁହାଁଉଛନ୍ତି । ମନ୍ତ୍ରୀ ତଥା ରାଉରକେଲା ବିଧାୟକ ସାରଦା ପ୍ରସାଦ ନାୟକ ବିଭିନ୍ନ ସମୟରେ ଖେଳୁଆଡ଼ ମନୋଭାବ ରଖି ଖେଳ ଓ ଖେଳାଳିଙ୍କ ମଧ୍ୟରେ ନିଜର ସ୍ୱତନ୍ତ୍ର ଛାପ ଛାଡ଼ିଛନ୍ତି । ବିଭିନ୍ନ ଖେଳ ପଡ଼ିଆରେ ଚାଲୁଥିବା ଭିନ୍ନଭିନ୍ନ ଟୁର୍ଣ୍ଣାମେଣ୍ଟରେ ଖେଳାଳି ହୁଅନ୍ତୁ ଅବା ଆୟୋଜକ ସେମାନଙ୍କ ଗହଣରେ ମନ୍ତ୍ରୀ ଶ୍ରୀ ନାୟକଙ୍କୁ ଦେଖିବାକୁ ମିଳୁଛି । କେବଳ ଖୋଲା ପଡ଼ିଆ ନୁହେଁ ବରଂ ବିଭିନ୍ନ ଇନ୍ଡୋର ଷ୍ଟାଡିୟମରେ ମନ୍ତ୍ରୀ ଶ୍ରୀ ନାୟକ ତାଙ୍କ ଉପସ୍ଥିତି ଜାହିର କରିବା ବେଶ ନଜରକୁ ଆସୁଛି ।
ସେହିପରି ସୁନ୍ଦରଗଡ଼ ଜିଲ୍ଲା ରାଜନୀତିରେ ସକ୍ରିୟ ରହୁଥିବା ପୂର୍ବତନ କେନ୍ଦ୍ରମନ୍ତ୍ରୀ ତଥା ପ୍ରାକ୍ତନ ବିଧାୟକ ଦିଲୀପ ରାୟ ନିଜ ରାଜନୈତିକ ଯୋଜନାକୁ ନେଇ ଯଦିଓ ମୁହଁ ଖୋଲୁନାହାନ୍ତି, ହେଲେ ସେ ବିଭିନ୍ନ କାର୍ଯ୍ୟକ୍ରମରେ ଦେଖାଯାଉଛନ୍ତି । ତାରି ଭିତରେ କିଛି ସମୟ ବାହାର କରି ଫୁଟବଲ ଟୁର୍ଣ୍ଣାମେଣ୍ଟରେ ବେଶ କିଛି ସମୟ ଖେଳଖେଳାଳି ଓ ଆୟୋକଙ୍କ ମଧ୍ୟରେ କାଟିବା ସହ ସମସ୍ତଙ୍କୁ ବେଶ ଉତ୍ସାହିତ କରୁଛନ୍ତି । ବିଧାୟକ ସୁବ୍ରତ ତରାଇ ମଧ୍ୟ ଦୀର୍ଘ ଦିନର ନୀରବତା ପରେ ତାଙ୍କ ରଘୁନାଥପାଲି ନିର୍ବାଚନ ମଣ୍ଡଳୀରେ ବେଶ ସକ୍ରିୟ ରହୁଥିବା ଦେଖାଯାଉଛି । ସଭା, ସମିତି ହେଉ ଅବା ବିଭିନ୍ନ କାର୍ଯ୍ୟକ୍ରମ, ଏପରିକି ଖବରଦାତା ସମ୍ମିଳନୀରେ ମଧ୍ୟ ତାଙ୍କୁ ଦେଖିବାକୁ ମିଳୁଛି । ଏସବୁ ବ୍ୟତୀତ ଖେଳ ପଡ଼ିଆରେ ମଧ୍ୟ ସେ ତାଙ୍କ ସମର୍ଥକଙ୍କ ଗହଣରେ ଟୁର୍ଣ୍ଣାମେଣ୍ଟ ଆୟୋଜକଙ୍କ ନିମନ୍ତ୍ରଣ ରକ୍ଷା କରି ବ୍ୟାଟ ଧରିବାକୁ ଭୁଲୁନାହାନ୍ତି ।
କେବଳ ସେତିକି ନୁହେଁ ତାରି ଭିତରେ ସେ ଖେଳ ଓ ଖେଳାଳିମାନଙ୍କୁ ଉତ୍ସାହିତ କରୁଛନ୍ତି । ଜିଲ୍ଲାର ବୀରମିତ୍ରପୁର ନିର୍ବାଚନ ମଣ୍ଡଳୀର ଯୁବ ବିଧାୟକ ଶଙ୍କର ଓରାମ ନିଜ ଦଳୀୟ ଓ ସାମାଜିକ କାର୍ଯ୍ୟକ୍ରମ ମଧ୍ୟରେ ବେଶ କିଛି ସମୟ କାଟୁଥିବା ବେଳେ ଖେଳ ପଡ଼ିଆ ପ୍ରତି ତାଙ୍କର ମଧ୍ୟ ରହୁଛି ଦୁର୍ବଳତା । ନିଜର ନିର୍ବାଚନ ମଣ୍ଡଳୀ ହେଉ ଅବା ତାଙ୍କ ପଡ଼ୋଶୀ ନିର୍ବାଚନ ମଣ୍ଡଳୀ³ ତାଙ୍କ ଦଳକୁ ମଜବୁତ କରିବାକୁ ଲାଗି ପଡ଼ିଛନ୍ତି ବିଧାୟକ ଶ୍ରୀ ଓରାମ । କିଛି ଦିନ ତଳେ ନିଜ ସମର୍ଥକଙ୍କ ଗହଣରେ ଫୁଟବଲ ଟୁର୍ଣ୍ଣାମେଣ୍ଟରେ ସେ ଆୟୋଜକମାନଙ୍କ ନିମନ୍ତ୍ରଣ ରକ୍ଷା କରି ଖେଳାଳିମାନଙ୍କ ସହ କରମର୍ଦ୍ଦନ ପରେ ଖେଳର ଆରମ୍ଭ ଘୋଷଣା କରିଥିଲେ । ସେତିକି ନୁହେଁ ଅନେକ ପ୍ରାକ୍ତନ ବିଧାୟକ ହୁଅନ୍ତୁ କି ଆଶାୟୀ ପ୍ରାର୍ଥୀ³ ନିଜ ଭାଗ୍ୟ ପରୀକ୍ଷା ପାଇଁ ଖେଳ-ଖେଳାଳି ଓ ଆୟୋଜକଙ୍କୁ ନିଜ ସପକ୍ଷରେ ଆଣିବାକୁ ଚେଷ୍ଟା କରୁଛନ୍ତି ।
