- ୟୁନିଫର୍ମ ପଲିସି ପାଇଁ କ୍ରିୟାନ୍ୱୟନ କମିଟି ଗଠନ ପ୍ରସ୍ତାବ
- ବିଚାରାଧୀନ ଦରଖାସ୍ତ ବର୍ଷେ ଭିତରେ ଫଇସଲା ହେବ
- ପୁରୀ ସହରାଞ୍ଚଳ ୨୬ଟି ମୌଜାରୁ ୪୩୨୭ ଦରଖାସ୍ତ
- ୮୭୫ ଦରଖାସ୍ତକାରୀଙ୍କୁ ୨୪ ଏକର ଜମି ବିକ
ପୁରୀ,୦୫/୦୯: ଜବରଦଖଲକାରୀଙ୍କ କବ୍ଜାକୁ ଚାଲି ଯାଇଥିବା ମହାପ୍ରଭୁଙ୍କ ଜମିକୁ ବିକ୍ରି କରିବାକୁ ନିଷ୍ପତ୍ତି ନେଇଛି ଶ୍ରୀଜଗନ୍ନାଥ ମନ୍ଦିର ପରିଚାଳନା କମିଟି । ଏହା ଜାଣିବା ପରେ ମହାପ୍ରଭୁଙ୍କ ସମ୍ପତ୍ତି ସୁରକ୍ଷା ନିମନ୍ତେ ଆଶାୟୀ ଅଗଣିତ ଶ୍ରୀଜଗନ୍ନାଥ ପ୍ରେମୀ ଖୁବ୍ଧ ହୋଇଛନ୍ତି । ମହାପ୍ରଭୁଙ୍କ ଜମିକୁ ଜମି ମାଫିଆଙ୍କ କବଳରୁ ଉଦ୍ଧାର କରିବାକୁ ପ୍ରଶାସନ କୁନ୍ଥକୁନ୍ଥ ହେଉଛି । ଏହାକୁ ସେମାନଙ୍କୁ ଅଳ୍ପ କେଇଟା ଟଙ୍କାରେ ଟେକିଦେବା ପାଇଁ ପ୍ରଶାସନ ସଜବାଜ ହେଉଛି । ଗତ ପରିଚାଳନା କମିଟିରେ ନିଆଯାଇଥିବା ନିଷ୍ପତ୍ତି ଏହି ଆଲୋଚନାକୁ ଖୋରାକ ଯୋଗାଇଛି ।
ସେପଟେ ଚଳିତ ବିଧାନସଭାର ଏକ ପ୍ରଶ୍ନ-ଉତ୍ତରରୁ ଜଣାପଡ଼ିଛି ଶ୍ରୀଜଗନ୍ନାଥ ମହାପ୍ରଭୁଙ୍କ ନାମରେ ରେକର୍ଡ ହୋଇଥିବା ଜମିକୁ ଦଖଲକାରୀ ବ୍ୟକ୍ତିମାନଙ୍କୁ ବିକ୍ରୟ କରାଯିବା ବାବଦରେ ରାଜ୍ୟ ସରକାରଙ୍କ ଅନୁମୋଦିତ ସମାନ ନୀତିକୁ ପାଳନ କରାଯିବ । ବ୍ୟବସ୍ଥା ଅନୁଯାୟୀ ପୁରୀ ସହରାଞ୍ଚଳ ଅନ୍ତର୍ଗତ ୨୬ଟି ମୌଜାରୁ ଶ୍ରୀଜଗନ୍ନାଥ ମହାପ୍ରଭୁଙ୍କ ଜମି ବିକ୍ରୟ ନିମନ୍ତେ ୪୩୨୭ ଗୋଟି ଦରଖାସ୍ତ ଶ୍ରୀମନ୍ଦିର କାର୍ଯ୍ୟାଳୟ ପାଇଛି । ତାହା ଭିତରୁ ୮୭୫ ଦରଖାସ୍ତକାରୀଙ୍କୁ ୨୪ ଏକର ୭୦୬ ଡିସିମିଲ ଜମି ବିକ୍ରି କରାଯାଇଛି । ଏବାବଦରେ ମିଳିଥିବା ୨ କୋଟି ୩୯ ଲକ୍ଷ ୫୪ ହଜାର ୮୮ ଟଙ୍କାକୁ ବ୍ୟାଙ୍କରେ ରହୁଥିବା ସ୍ଥାୟୀ ଜମା ବା କର୍ପସ ଫଣ୍ଡରେ ଶ୍ରୀମନ୍ଦିର ପ୍ରଶାସନ ଜମା କରିଛି ।
ଅବଶିଷ୍ଟ ଦରଖାସ୍ତ ମଧ୍ୟରୁ ମାଟିଆପଡ଼ାର ୯୩୪ ଗୋଟି, ତାଳବଣିଆ ମୌଜାରେ ୭୬୯ ଗୋଟି ଓ ଚକ୍ରତୀର୍ଥ ମୌଜାରେ ୬ ଗୋଟିକୁ ମିଶାଇ ମୋଟ ୧୭୦୯ ଗୋଟି ଦରଖାସ୍ତ ରହିଛି । ଏହି ୩ ମୌଜାରେ ବନ୍ଦୋବସ୍ତ କାର୍ଯ୍ୟ ଚୂଡ଼ାନ୍ତ ନହୋଇ ନଟ୍ ଫାଇନାଲ ଅବସ୍ଥାରେ ଥିବାରୁ ବିକ୍ରିବଟା ପଦକ୍ଷେପ ସ୍ଥଗିତ ରହିଛି ।
ବାକି ଦରଖାସ୍ତ ମଧ୍ୟରୁ ୨୦ଟି ମୌଜା ଅନ୍ତର୍ଗତ ୭୨୯ ଗୋଟି ଜମି ବିକ୍ରି ଦରଖାସ୍ତ ସମନ୍ୱୟ ଅଧିକାରୀଙ୍କ ସ୍ତରରେ ସରଜମିନ ତଦନ୍ତ ଶେଷ ହୋଇଛି । ଏହା ପୁରୀ ଜିଲ୍ଲାସ୍ତରୀୟ ଲ୍ୟାଣ୍ଡ ସବ୍ କମିଟି ବୈଠକରେ ଉପସ୍ଥାପନ ନିମନ୍ତେ ପ୍ରସ୍ତୁତ ରହିଛି ।
ଅବଶିଷ୍ଟ ଆବେଦନର ତଦନ୍ତ ଚାଲୁ ରହିଛି । ଅନେକ କ୍ଷେତ୍ରରେ ଦରଖାସ୍ତକାରୀମାନେ ଦଖଲ ସମ୍ପର୍କିତ କାଗଜପତ୍ର ଦର୍ଶାଇବାରେ ବିଳମ୍ବ କରୁଛନ୍ତି । ତେଣୁ କେସ୍ଗୁଡ଼ିକର ତ୍ୱରିତ ଫଇସଲା ହୋଇପାରୁନାହିଁ । ଏତଦ୍ ବ୍ୟତୀତ ଦରଖାସ୍ତକାରୀମାନେ ମୃତ ବ୍ୟକ୍ତିଙ୍କ ମୃତ୍ୟୁ ପ୍ରମାଣପତ୍ର ଓ ଉତ୍ତରାଧିକାରୀ ପ୍ରମାଣ ପତ୍ର ଦାଖଲ କରିବା ସହିତ ଆବଶ୍ୟକ ହେଉଥିବା କାଗଜପତ୍ରର ପ୍ରମାଣିକ ନକଲ ଦାଖଲ କରିବା ପାଇଁ ସମୟ ନେଉଛନ୍ତି । ଫଳରେ କେସ୍ ଫଇସଲା ବିଳମ୍ବ ହେଉଛି । ତେବେ ବିଚାରାଧୀନ ଦରଖାସ୍ତଗୁଡ଼ିକୁ ଅଗ୍ରାଧିକାର ଭିତ୍ତିରେ ଆସନ୍ତା ବର୍ଷେ ଭିତରେ ଫଇସଲା କରିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଛି ।
ସମାନ ନୀତିରେ ବର୍ଣ୍ଣିତ ବ୍ୟବସ୍ଥା ଅନୁଯାୟୀ ସରଜମିନ ତଦନ୍ତ ପରେ ପ୍ରଥମେ ଜମି ବିକ୍ରି କେସ୍ ଗୁଡ଼ିକ ଜିଲ୍ଲାସ୍ତରୀୟ ଲ୍ୟାଣ୍ଡ ସବ୍କମିଟି ବୈଠକରେ ଆଲୋଚନା କରାଯାଇ ଜମିର ମୂଲ୍ୟ ଧାର୍ଯ୍ୟ ଏବଂ ଏବାବଦରେ ସୁପାରିସ ପାଇଥାଏ । ଏହା ସୁପାରିସ ପରେ ଶ୍ରୀଜଗନ୍ନାଥ ମନ୍ଦିର ଲ୍ୟାଣ୍ଡ ସେଲ୍ କମିଟି ବୈଠକରେ ଉପସ୍ଥାପନ ହୋଇଥାଏ । ଲ୍ୟାଣ୍ଡ୍ ସବ୍ କମିଟି ସୁପାରିସ ପ୍ରସ୍ତାବ ଶ୍ରୀମନ୍ଦିର ପରିଚାଳନା କମିଟି ବୈଠକରେ ଅନୁମୋଦନ ପାଇବା ପରେ ଜମିର ମୂଲ୍ୟ ଗ୍ରହଣ କରାଯାଏ । ପରେ ଶ୍ରୀଜଗନ୍ନାଥ ମନ୍ଦିର ଆଇନର ଧାରା ୧୬(୨) ଅନୁଯାୟୀ ସରକାରଙ୍କ ଅନୁମତି ପ୍ରାପ୍ତି ନିମନ୍ତେ ବିଧି ବିଭାଗକୁ ସୁପାରିସ କରାଯାଏ । ସରକାରଙ୍କ ଅନୁମତି ପ୍ରାପ୍ତ ହେବା ପରେ ରେଜେଷ୍ଟ୍ରି ଦଲିଲ ମାଧ୍ୟମରେ ସମ୍ପୃକ୍ତ ଦରଖାସ୍ତକାରୀଙ୍କୁ ଜମି ବିକ୍ରୟ କରାଯାଇଥାଏ । ସମାନ ନୀତି ବା ୟୁନିଫର୍ମ ପଲିସି ପାଇଁ କ୍ରିୟାନ୍ୱୟନ କମିଟି ଗଠନ କରିବାକୁ ପ୍ରସ୍ତାବ ରହିଛି ।
