ନୂଆଦିଲ୍ଲୀ, ୦୨/୦୭: ଆଗାମୀ ଆଇପିଏଲ୍-୨୦୨୬ ପୂର୍ବରୁ ଚେନ୍ନାଇ ସୁପରକିଙ୍ଗ୍ସ ଭାରତୀୟ ୱିକେଟ୍ କିପର ବ୍ୟାଟର ସଞ୍ଜୁ ସାମସନଙ୍କୁ ଦଳରେ ସାମିଲ କରିବାକୁ ଚାହୁଁଥିବା ନେଇ ସ୍ପଷ୍ଟ କରିଛି । ସାମସନ ଗତ ସଂସ୍କରଣରେ ରାଜସ୍ଥାନ ରୟାଲ୍ସ ଦଳର ନେତୃତ୍ୱ ନେଇଥିଲେ । ଦଳ ମେଗା ନିଲାମ୍ ପୂର୍ବରୁ ତାଙ୍କୁ ୧୮କୋଟି ଟଙ୍କାରେ ରଖିଥିଲା । ଆଗାମୀ ଆଇପିଏଲ୍ ଟ୍ରେଡ୍ ସମୟରେ ସୁପରକିଙ୍ଗ୍ସ ପକ୍ଷରୁ ରାଜସ୍ଥାନ ରୟାଲ୍ସକୁ ଏନେଇ ପ୍ରସ୍ତାବ ଦିଆଯିବ ।
ସୁପରକିଙ୍ଗ୍ସର ଜଣେ ବରିଷ୍ଠ ଅଧିକାରୀଙ୍କ କହିବା ମୁତାବକ, ଆମେ ସାମସନଙ୍କୁ ଦଳରେ ସାମିଲ କରିବାକୁ ଯୋଜନା କରୁଛୁ । ସେ ପ୍ରସିଦ୍ଧ ୱିକେଟ୍ କିପର ବ୍ୟାଟର ମହେନ୍ଦ୍ର ସିଂହ ଧୋନିଙ୍କ ସ୍ଥାନ ନେଇପାରିବେ । ସାମସନ ଜଣେ ଭାରତୀୟ ୱିକେଟ୍ କିପର ଓ ବ୍ୟାଟର । ତାଙ୍କ ପାଇଁ ଆମେ ରାଜସ୍ଥାନ ରୟାଲ୍ସଙ୍କୁ ଜଣେ ଖେଳାଳିଙ୍କୁ ଟ୍ରେଡ୍ କରିବୁ । ଯଦି ରାଜସ୍ଥାନ ସହମତି ପ୍ରକାଶ କରେ, ତା’ହେଲେ ଆମେ ସାମସନଙ୍କୁ ଦଳରେ ସାମିଲ କରିପାରିବୁ । ଆମ ଯୋଜନା ସମ୍ପର୍କରେ ରାଜସ୍ଥାନ ରୟାଲ୍ସକୁ ଏପର୍ଯ୍ୟନ୍ତ କୌଣସି ସୂଚନା ଦିଆଯାଇନାହିଁ ।’ ସୁପରକିଙ୍ଗ୍ସର ଅଧିନାୟକ ଋତୁରାଜ ଗାଏକୱାଡ୍ଙ୍କୁ ଦଳ ଟ୍ରେଡ୍ କରିପାରିବ । ମାତ୍ର ତାଙ୍କୁ ଦଳର ଦୀର୍ଘ ସ୍ଥାୟୀ ଅଧିନାୟକ ଭାବେ ଦେଖାଯାଉଥିବା ମୁଖ୍ୟ କୋଚ୍ ଷ୍ଟିଫେନ୍ ଫ୍ଲେମିଙ୍ଗ୍ ପ୍ରକାଶ କରିଥିଲେ । ତେଣୁ ସାମସନଙ୍କୁ ଆଣିବା ପାଇଁ ସୁପରକିଙ୍ଗ୍ସ କେଉଁ ଖେଳାଳିଙ୍କୁ ଟ୍ରେଡ୍ କରିବା ତାହା ଦେଖିବା ବାକି ରହିଲା ।
