ନୂଆଦିଲ୍ଲୀ: ଆଜିଠୁ ଭାରତ-ଇଂଲଣ୍ଡ ଦ୍ବିତୀୟ ଟେଷ୍ଟ । ଏଜବାଷ୍ଟନରେ ଟସ୍ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଛି ଘରୋଇ ଦଳ । ତେଣୁ ଭ୍ରମଣକାରୀ ଟିମ୍ ପ୍ରଥମେ ବ୍ୟାଟିଂ କରୁଛି । ବର୍ମିଂହାମରେ ନୂଆ ରଣନୀତି ସହିତ ପଡ଼ିଆକୁ ଓହ୍ଲାଇଛି ଦଳ । ଶୁବମନ ସେନା ଲିଡ୍ସ ଟେଷ୍ଟର ଭୁଲକୁ ଏଠାରେ ସୁଧାରିବାକୁ ଚେଷ୍ଟା କରିବ । ଏହାସହିତ ଦ୍ୱିତୀୟ ମ୍ୟାଚକୁ ଜିତି ସିରିଜକୁ ଫେରିବା ଲକ୍ଷ୍ୟରେ ରହିଛି ଭାରତୀୟ ଦଳ । କେଏଲ ରାହୁଲ ଏବଂ ଯଶସ୍ବୀ ଜୈସ୍ବାର ପ୍ରଥମ ଇନିଂସ ଆରମ୍ଭ କରିଛନ୍ତି ।
ଦ୍ବିତୀୟ ଟେଷ୍ଟରେ ଭାରତ ପକ୍ଷରୁ ତିନୋଟି ପରିବର୍ତ୍ତନ କରାଯାଇଛି । ଫାଷ୍ଟ୍ ବୋଲର ଯଶପ୍ରୀତ୍ ବୁମରାଙ୍କୁ ରେଷ୍ଟ ଦିଆଯାଇଥିବା ବେଳେ ସର୍ଦୁଲ ଠାକୁର ଓ ସାଇ ସୁଦର୍ଶନ ଦଳରୁ ବାଦ୍ ପଡ଼ିଛନ୍ତି । ତାଙ୍କ ସ୍ଥାନରେ ଦୁଇ ଜଣ ଅଲରାଉଣ୍ଡର ଏବଂ ଜଣେ ବୋଲରଙ୍କୁ ସାମିଲ୍ କରାଯାଇଛି । ସାଇ ସୁଦର୍ଶନ ଓ ସର୍ଦୁଲ ଠାକୁରଙ୍କ ସ୍ଥାନରେ ନିତିଶ ରେଡ୍ଡୀ ଏବଂ ଓ୍ବାଶିଂଟନ ସୁନ୍ଦର ଚୂଡ଼ାନ୍ତ ଏକାଦଶରେ ସୁଯୋଗ ପାଇଛନ୍ତି । ସେହିପରି ବୁମରାଙ୍କ ସ୍ଥାନରେ ଆକାଶ ଦୀପ ସୁଯୋଗ ପାଇଛନ୍ତି ।
ଭାରତୀୟ ଦଳ ଚୂଡ଼ାନ୍ତ ଏକାଦଶ: ଶୁବମନ ଗିଲ୍ (ଅଧିନାୟକ), ଯଶସ୍ବୀ ଜୈସ୍ବାଲ, କେଏଲ ରାହୁଲ, କରୁନ ନାୟର, ରିଷଭ ପନ୍ତ( ଉପ-ଅଧିନାୟକ), ରବିନ୍ଦ୍ର ଜାଡେଜା, ନିତିଶ ରେଡ୍ଡୀ, ଓ୍ବାଶିଂଟନ ସୁନ୍ଦର, ମହମ୍ମଦ ସିରାଜ, ପ୍ରସିଦ କ୍ରୀଷ୍ଣା, ଆକାଶ ଦୀପ
ସେପଟେ ଘରୋଇ ଇଂଲଣ୍ଡ ଦଳ ଚୂଡ଼ାନ୍ତ ଏକାଦଶରେ କୌଣସି ପରିବର୍ତ୍ତନ କରିନାହିଁ । ପ୍ରଥମ ଟେଷ୍ଟର ବିଜୟ ରଣନୀତି ନେଇ ଦ୍ୱିତୀୟ ଟେଷ୍ଟକୁ ଓହ୍ଲାଇଛି ବେନ୍ ସେନା । ଲିଡ୍ସ ଭଳି ବର୍ମିଂହମ କବଜା ଲକ୍ଷ୍ୟରେ ରହିଛି ଘରୋଇ ଦଳ ।
ଚୂଡ଼ାନ୍ତ ଇଂଲଣ୍ଡ ଏକାଦଶ: ଜ୍ୟାକ୍ କ୍ରଲି, ବେନ ଡକେଟ୍, ଓଲି ପୋପ, ଜୋ ରୁଟ୍, ହ୍ୟାରୀ ବ୍ରୁକ୍, ବେନ ଷ୍ଟୋକ୍ସ (ଅଧିନାୟକ), ଜାମି ସ୍ମିଥ, କ୍ରିସ ୱକ୍ସ, ବ୍ରାଇଡନ କାର୍ସ, ଜୋସ ଟଙ୍ଗ, ସୋହେବ ବସିର ।
