ଭୁବନେଶ୍ୱର,୧୨/୦୨: ଘାଇଲା କଲାଣି ‘ଭାଇରାଲ ଫିଭର’ । ଘରକୁ ଘର ସଂକ୍ରମଣ ମାଡ଼ିଚାଲିଛି । ଯାହାକୁ ଦେଖିବ ଜ୍ୱର, ଥଣ୍ଡା, ଛିଙ୍କ ଆଉ କାଶରେ ଛଟପଟ । ପୀଡ଼ିତ । ପିଲାଙ୍କଠାରୁ ବୟସ୍କ ପର୍ଯ୍ୟନ୍ତ ସମସ୍ତେ ଯନ୍ତ୍ରଣାରେ କଲବଲ ହେଉଛନ୍ତି । ହଠାତ ପାଗରେ ପରିବର୍ତ୍ତନ ପାଇଁ ଏଭଳି ପରିସ୍ଥିତି ଦେଖା ଦେଇଛି । କ୍ୟାପିଟାଲ ହସ୍ପିଟାଲରେ ଭାଇରାଲ ରୋଗୀଙ୍କ ସଂଖ୍ୟା ୪୦% ପାଖାପାଖି ବୃଦ୍ଧି ପାଇଥିଲା ବେଳେ ଏମ୍ସରେ ଶିଶୁ ରୋଗୀଙ୍କ ସଂଖ୍ୟା ୨୦% ବୃଦ୍ଧି ପାଇଛି । ବିଶେଷ କରି ଶ୍ୱାସ ଓ ବହୁବିଧ ରୋଗରେ ପୀଡ଼ିତ ବ୍ୟକ୍ତି ସଂକ୍ରମଣରେ ଗୁରତର ହେଉଛନ୍ତି ବୋଲି ବିଶେଷଜ୍ଞ ମତ ରଖିଛନ୍ତି । ଆଉ ଶିଶୁଙ୍କ ମମ୍ପସ୍ ବା ‘ଗାଲୁଆ’ ରୋଗ ଚିନ୍ତା ବଢ଼ାଉଛି ।
ଘରେ ଘରେ ଏବେ ଥଣ୍ଡା କାଶରେ ଖୁଁ ଖାଁ ହେଉଛନ୍ତି ଲୋକେ । ସଂକ୍ରମଣରେ ନୟାନ୍ତ ହେଲେଣି ଲୋକେ । ହସ୍ପିଟାଲରେ ସଂକ୍ରମିତଙ୍କ ଲମ୍ବା ଲାଇନ୍ ଲାଗୁଛି । ପିଜିଆଇଏମ୍ଇଆର ପ୍ରଫେସର ପ୍ରେମକାନ୍ତ ମହାନ୍ତି କହିଛନ୍ତି, ରାଜଧାନୀର ବିଭିନ୍ନ ହସ୍ପିଟାଲରେ ଭାରଇାଲ ସଂକ୍ରମିତ ରୋଗୀଙ୍କ ସଂଖ୍ୟା ବୃଦ୍ଧି ପାଉଛି । ଗତ ମାସ ଅପେକ୍ଷା ହଠାତ ଭାଇରାଲ ଫିଭରରେ ପୀଡ଼ିତ ରୋଗୀ ୪୦% ବୃଦ୍ଧି ପାଇଛି । ଆଉଟ୍ଡୋରରେ ଦୈନିକ ୫ ଶହ ରୋଗୀ ଆସୁଛନ୍ତି । ସେମାନଙ୍କ ଭିତରୁ ପ୍ରାୟ ୧୦୦ଶହ ପାଖାପାଖି ଭାଇରାଲ ଫିଭରରେ ପୀଡ଼ିତ । ଇନ୍ଡୋରରେ ମଧ୍ୟ ରୋଗୀଙ୍କ ଆଡ୍ମିଶନ ସଂଖ୍ୟା ୨୦% ବୃଦ୍ଧି ପାଇଛି । ପାଗରେ ପରିବର୍ତ୍ତନ ପାଇଁ ଲୋକେ ସଂକ୍ରମିତ ହେଉଛନ୍ତି । ବର୍ତ୍ତମାନ ପରିସ୍ଥିତିରେ କୋଭିଡ୍ ନିୟମ ପାଳନ କରିବା ଦରକାର । ଜ୍ୱର ଓ ଥଣ୍ଡା ଭଲ ହେଉଛି । ହେଲେ ଯାହାର ଆଜମା, ଏଲାର୍ଜି, ଡାଇବେଟିସ୍ କିମ୍ବା ଶରୀରର ରୋଗ ପ୍ରତିରୋଧକ ଶକ୍ତି କମ ରହୁଛି, ତାକୁ ଥଣ୍ଡା କାଶ ଲମ୍ବା ସମୟ ଧରି ରହୁଛି ।
ଏମ୍ସ ଭୁବନେଶ୍ୱର ଶିଶୁ ବିଭାଗ ପ୍ରଫେସର ରଶ୍ଚି ରଞ୍ଜନ ଦାସ କହିଛନ୍ତି, ହଠାତ ପାଗରେ ପରିବର୍ତ୍ତନ ଯୋଗୁ ଶିଶୁମାନେ ବେଶୀ ସଂକ୍ରମିତ ହେଉଛନ୍ତି । ବର୍ତ୍ତମାନ ଭୁବନେଶ୍ୱର ଏମ୍ସରେ ୨୦% ଶିଶୁ ସଂକ୍ରମିତଙ୍କ ସଂଖ୍ୟା ବଢ଼ିଛି । ସବୁଠାରୁ ଅଧିକ ମାତ୍ରାରେ ମମ୍ପସ୍ ବା ‘ଗାଲୁଆ’ରେ ପୀଡ଼ିତ ଶିଶୁଙ୍କ ସଂଖ୍ୟା ବଢ଼ିଛି । ପୂର୍ବରୁ ବର୍ଷକୁ ୨ ଜଣ କି ୩ ଜଣ ମମ୍ପସ୍ ସଂକ୍ରମିତ ରୋଗୀ ଡାକ୍ତରଖାନାକୁ ଆସୁଥିଲେ । ହେଲେ ବର୍ତ୍ତମାନ ପ୍ରତି ସପ୍ତାହରେ ୬ରୁ୭ ଗାଲୁଆ ରୋଗୀଙ୍କୁ୍ ଦେଖିବାକୁ ମିଳୁଛି । ଏହି ରୋଗ ୫ରୁ ୭ଦିନ ଭିତରେ ଭଲ ହୋଇଥାଏ । ହେଲେ ରୋଗୀଙ୍କ ପାଇଁ ଭବିଷ୍ୟତରେ ଜଟିଳ ପରିସ୍ଥିତି ସୃଷ୍ଟି କରିଥାଏ । ମମ୍ପସ ସଂକ୍ରମିତ ଭବିଷ୍ୟତରେ ନିଃସନ୍ତାନ ଭଳି ସମସ୍ୟା ସୃଷ୍ଟି ହୋଇପାରେ ବୋଲି ଡାକ୍ତର ଦାସ କହିଛନ୍ତି । ଏହି ରୋଗ ନିରାକରଣ ପାଇଁ ଭ୍ୟାକ୍ସିନ୍ ରହିଛି । ଏହା କେବଳ ଘରୋଇ ମାର୍କେଟ୍ରେ ମିଳୁଛି । କେନ୍ଦ୍ର ସରକାର ଯଦି ତାଙ୍କ ଟିକାକରଣ କାର୍ଯ୍ୟକ୍ରମରେ ମମ୍ପସ୍ ନିରାକରଣ ପାଇଁ ଟିକା ଦେଇପାରନ୍ତେ, ତେବେ ଏଥିରୁ ଅନେକ ଉପକୃତ ହୁଅନ୍ତେ ବୋଲି ସେ କହିଛନ୍ତି ।
