ନୂଆଦିଲ୍ଲୀ,୨।୧: କରୋନା ଭାଇରସ୍‌ର ନୂଆ ଭାରିଆଣ୍ଟ ଜେଏନ୍୧ କାରଣରୁ ଭାରତ ସହିତ ବହୁ ଦେଶରେ ସଂକ୍ରମଣ ବଢିବାରେ ଲାଗିଛି। ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ମଙ୍ଗଳବାର ଜାରି ସୂଚନା ଅନୁସାରେ, ଭାରତ ଗତ ୨୪ ଘଣ୍ଟାରେ କରୋନା ଭାଇରସ୍‌ର ୫୭୩ ନୂଆ ମାମଲା ସାମନାକୁ ଆସିଛି ଓ ଆକ୍ଟିଭ ରୋଗୀଙ୍କ ସଂଖ୍ୟା ୪,୫୬୫ ରହିଛି। ଇଣ୍ଡିଆନ୍ ସାର୍ସ-ସିଓଭି-୨ ଜିନୋମିକ୍ସ କନର୍ସୋଟିୟମ୍ (INSACOG) ମଙ୍ଗଳବାର ଜାରି ସୂଚନା ଅନୁସାରେ, ଦେଶରେ ଏପର୍ଯ୍ୟନ୍ତ କୋଭିଡ୍‌ର -୧୯ ନୂଆ ଭ୍ୟାରିଆଣ୍ଟ ଜେଏନ୍‌୧ର ମୋଟ ୨୬୩ ମାମଲା ସାମନାକୁ ଆସିଛି, ଯେଉଁଥିରେ ପ୍ରାୟ ଅଧା ମାମଲା କେରଳରେ ରହିଛି।

ଏପର୍ଯ୍ୟନ୍ତ ୧୦ ରାଜ୍ୟ ଓ କେନ୍ଦ୍ର ଶାସିକ ରାଜ୍ୟରେ ଭାଇରସ୍ ଜେଏନ୍‌୧ ଭ୍ୟାରିଆଣ୍ଟର ଉପସ୍ଥିତି ସମ୍ପର୍କରେ ଜଣାପଡିଛି। ଆଇଏନ୍‌ଏସ୍‌ଏସିଓଜିର ସୂଚନା ଅନୁସାରେ, ଏହି ରାଜ୍ୟ ଭିତରେ କେରଳ(୧୩୩), ଗୋଆ(୫୧). ଗୁଜରାଟ(୩୪), ଦିଲ୍ଲୀ(୧୪), କର୍ଣ୍ଣାଟକ(୮), ମହାରାଷ୍ଟ୍ର(୯), ରାଜସ୍ଥାନ(୫), ତାମିଲନାଡୁ(୪), ତେଲେଙ୍ଗାନା(୨) ଓ ଓଡିଶାରେ (୧) ଟି ମାମଲା ଜଣାପଡିଛି। ସଂଖ୍ୟାରୁ ଜଣାପଡୁଛି ଡିସେମ୍ବରରେ ଦେଶରେ ରେକର୍ଡ କରାଯାଇଥିବା କୋଭିଡ୍‌ର ୨୩୯ ଟି ମାମଲାରେ ଜେଏନ୍‌୧ ମିଳିଛି। ସେଭଳି ନଭେମ୍ବରରେ ଏଭଳି ୨୪ଟି ମାମଲା ସାମନାକୁ ଆସିଛି।