ଭୁବନେଶ୍ୱର,୨୨/୧୨: ଦେଶରେ କୋଭିଡ୍ ଚିନ୍ତା ବଢ଼ାଉଛି । ଆଉ ଥରେ ସଂକ୍ରମଣ କାୟା ବିସ୍ତର କରିବ କି ? ଏଭଳି ଆଶଙ୍କା ଉଙ୍କି ମାରିଛି । କୋଭିଡ୍ ନେଇ କେନ୍ଦ୍ର ସରକାର ସତର୍କ କରାଇଲା ପରେ ରାଜ୍ୟ ସରକାର ମୁକାବିଲା ଦିଗରେ ତତ୍ପରତା ପ୍ରକାଶ କରିଛନ୍ତି । ପୂର୍ବ ପ୍ରସ୍ତୁତିକୁ ନେଇ ସଜାଗ ଅଛନ୍ତି ।
ଜନସ୍ୱାସ୍ଥ୍ୟ ନିର୍ଦ୍ଦେଶକ ଡା. ନିରଞ୍ଜନ ମିଶ୍ର କହିଛନ୍ତି, ରାଜ୍ୟରେ ଗତ ଡିସେମ୍ବର ୩ ତାରିଖଠାରୁ କୋଭିଡ୍ ଗୋଟିଏ ହେଲେ କେସ ଆସିନାହିଁ । ରାଜ୍ୟରେ କୋଭିଡ୍ ରୋଗୀ ନାହାନ୍ତି । ତଥାପି କେନ୍ଦ୍ରରୁ ରାଜ୍ୟ ସ୍ୱାସ୍ଥ୍ୟ ବିଭାଗକୁ ଆଲର୍ଟ ରହିବା ପାଇଁ ନିର୍ଦ୍ଦେଶ ଦିଆଯାଇଛି । କେସ୍ ବାହାରିବାର ସମ୍ଭାବନା ରହିଛି । ସମସ୍ତ ଜିଲ୍ଲା ହସ୍ପିଟାଲରେ ସର୍ଭେଲାନ୍ସ ବଢ଼ାଇକୁ କୁହାଯାଇଛି । ଏହାବ୍ୟତୀତ କୋଭିଡ୍ ଟେଷ୍ଟ ବଢ଼ାଇବା ସହ ଫିଭର୍ କ୍ଲିନିକ୍ ଚଳାଇବେ । କୋଭିଡ୍ କେସ ଯଦି ବଢ଼େ ତା'ପାଇଁ ସମସ୍ତ ପ୍ରକାର ପ୍ରସ୍ତୁତି ଏବେଠାରୁ କରି ରଖିବେ । ଔଷଧ, ଲଜିଷ୍ଟିକ, ଟେଷ୍ଟ କିଟ୍, ବେଡ୍, ଅକ୍ସିଜେନ୍, ଇକୋ ସିଷ୍ଟମ ସହ ଆବଶ୍ୟକ ଜିନିଷ ରଖାଯିବ । ପ୍ରତି ୩ ମାସରେ ଥରେ ମକ୍ ଡ୍ରିଲ୍ କରିବା ପାଇଁ ମଧ୍ୟ ନିର୍ଦ୍ଦେଶ ରହିଛି । ଲୋକଙ୍କୁ ସଚେତନ କରିବା ପାଇଁ କୁହାଯାଇଛି । କିନ୍ତୁ ଆତଙ୍କିତ ହେବାର ଆବଶ୍ୟକତା ନାହିଁ । ଲୋକଙ୍କୁ ନିବେଦନ ରହିବ କୋଭିଡ ନିୟମ ଅନୁପାଳନ କରିବାକୁ । ଥଣ୍ଡା, କାଶ, ଜ୍ୱର ହେଲେ ଗହଳି ସ୍ଥାନକୁ ଯାଆନ୍ତୁ ନାହିଁ । ଆଉ ତୁରନ୍ତ ଟେଷ୍ଟ କରାନ୍ତୁ । ବୟସ୍କ ଓ ପିଲାମାନେ ମାସ୍କ ବ୍ୟବହାର କରନ୍ତୁ ।
ଡାକ୍ତର ମିଶ୍ର କହିଛନ୍ତି, ସାରା ଦେଶରେ ୧୫ ଦିନ ଭିତରେ କୋଭିଡ୍ ସଂଖ୍ୟା ସାମାନ୍ୟ ବଢ଼ିଛି । ୫ ରାଜ୍ୟରୁ ୯୮%ରୁ ଅଧିକ ରୋଗୀ ଚିହ୍ନଟ ହୋଇଛନ୍ତି । ଆଉ କେବଳ କେରଳରୁ ୮୮ ପ୍ରତିଶତ ରହିଛି । ନୂଆ ଭାରିଏଣ୍ଟ ଜେଏନ୍ .୧ ବ୍ୟାପିଛି । ହେଲେ ଜମା ସାଙ୍ଘାତିକ ହେଉନାହିଁ । ସାଧାରଣ ଇନ୍ଫ୍ଲୁଏଞ୍ଜା ଭଲି ଥଣ୍ଡା, କାଶ, ଜ୍ୱର ରହୁଛି । ତେଣୁ ଜନସାଧାରଣ ସତର୍କ ରୁହନ୍ତୁ ।
Also Read ;-
ଓଡ଼ିଶାରେ କୋଭିଡ ଚି଼ହ୍ନଟ ହୋଇନାହିଁ, ଲକ୍ଷଣ ଦେଖାଗଲେ ପରୀକ୍ଷା କରିବାକୁ ଜନ ସ୍ୱାସ୍ଥ୍ୟ ନିର୍ଦ୍ଦେଶକଙ୍କ ଅପିଲ