ନ୍ୟୁ ୟର୍କ, ୧୪/୦୮ : ୩୩ତମ ଅଲିମ୍ପିକ୍ କ୍ରୀଡ଼ା ପ୍ରତିଯୋଗିତା ସଫଳତାର ସହ ଶେଷ ହେବା ପରେ ଏବେ କ୍ରୀଡ଼ାପ୍ରେମୀଙ୍କ ନଜର ଲସ ଏଞ୍ଜଲସ ସହର ଉପରେ ରହିବ । ୨୦୨୮ ଅଲିମ୍ପିକ୍ସ ଆୟୋଜନ କରିବ ୟୁଏସଏର ଏହି ଲୋକପ୍ରିୟ ତଥା ବହୁ ଚର୍ଚ୍ଚିତ ସହର । ଲସ ଏଞ୍ଜଲସ ମେୟର କାରେନ ବାସ୍ ପ୍ୟାରିସ୍ ସହରରୁ ଅଲିମ୍ପିକ ପତାକା ଆଣି ସ୍ୱଦେଶରେ ପହଞ୍ଚି ସାରିଛନ୍ତି । ଆଗାମୀ ୪ବର୍ଷ କଡ଼ା ଚ୍ୟାଲେଞ୍ଜ ଆଣିବ ବୋଲି ଆଜି ସିଟି ହଲ୍ରେ ମେୟର କାରେନ ପ୍ରକାଶ କରିଛନ୍ତି ।
ଲସ ଏଞ୍ଜଲସ୍ ସହର ପୂର୍ବରୁ ୧୯୩୨ ଓ ୧୯୮୪ରେ ଅଲିମ୍ପିକ୍ସ ଆୟୋଜନ କରିଥିଲା । ତେଣୁ ତୃତୀୟ ଅଲିମ୍ପିକ୍ସ ଆୟୋଜନ ପାଇଁ ଲସ୍ ଏଞ୍ଜଲସ ନିକଟରେ ଯଥେଷ୍ଟ ଭିତ୍ତିଭୂମି ରହିଛି । ଲସ୍ ଏଞ୍ଜଲସ୍ ଏକ ଭୂକମ୍ପ ପ୍ରବଣ ଅଞ୍ଚଳ ହୋଇଥିବାରୁ ଆୟୋଜକ ନୂଆ ଷ୍ଟାଡ଼ିୟମ୍ ଆଦି ନିର୍ମାଣ ପରିପର୍ତ୍ତେ ପୂର୍ବରୁ ରହିଥିବା କ୍ରୀଡ଼ା ଭିତ୍ତିଭୂମୀର ଉନ୍ନତି ଓ ନବୀକରଣ ଉପରେ ଗୁରୁତ୍ୱ ଦେବେ । ଏଥର କ୍ରୀଡ଼ା ପ୍ରତିଯୋଗିତା ପାଇଁ ସହରକୁ ବେସରକାରୀ ମୋଟୋର ଯାନ ରହିତ କରିବା ଆୟୋଜକଙ୍କ ପାଇଁ ପ୍ରମୁଖ କାର୍ଯ୍ୟ ହେବ ।
ମେୟର କହିଛନ୍ତି, ଲସ ଏଞ୍ଜଲସ୍ର ଟ୍ରାଫିକ୍ ଦୀର୍ଘ ବର୍ଷରୁ ଚିନ୍ତାର କାରଣ ହୋଇଛି । ଏଠାରେ ଲୋକମାନେ ସରକାରୀ ଯାନ ଅପେକ୍ଷା ନିଜ ଗାଡ଼ିରେ ଯିବା ଆସିବାକୁ ପସନ୍ଦ କରନ୍ତି । ତେଣୁ ଟ୍ରାଫିକ ସମସ୍ୟା ସୃଷ୍ଟି ହୁଏ । ତେଣୁ ଅଲିମ୍ପିକ୍ସ ସମୟରେ ସହରରେ କେବଳ ସରକାରି ଯାନକୁ ଅନୁମତି ମିଳିବ । ଲସ୍ ଏଞ୍ଜଲସ୍ ବିମାନ ବନ୍ଦର ପର୍ଯ୍ୟନ୍ତ ମେଟ୍ରୋ ରେଳ ଚଳାଚଳ ପାଇଁ ପ୍ରସ୍ତୁତି ଚାଲିଛି । ୨୦୨୬ସୁଦ୍ଧା ସମସ୍ତ ନିର୍ମାଣ କାର୍ଯ୍ୟ ଶେଷ ହେବ । ଏଥର ୟୁଏସଏ, କାନାଡ଼ା ଓ ମେକ୍ସିକୋ ମିଳିତ ଭାବେ ୨୦୨୬ରେ ଫିଫା ବିଶ୍ୱକପ୍ ଆୟୋଜନ କରୁଛନ୍ତି । ତେଣୁ ଏହା ପୂର୍ବରୁ ସମସ୍ତ ପ୍ରସ୍ତୁତି କାର୍ଯ୍ୟ ଶେଷ କରିବାକୁ ଯୋଜନା ରଖା ଯାଇଛ
