ବାସୁଦେବପୁର, ୧୧/୦୬ : ଦେଢଶୁର ଶାବଳ ମାଡ଼ରେ ଭାଇ ବୋହୂ ମୃତ। ବାସୁଦେବପୁର ପୌରପାଳିକା ୭ ନମ୍ବର ୱାର୍ଡର ପ୍ରବୋଦପୁର ଗ୍ରାମରେ ଏଭଳି ବିଭତ୍ସ ହତ୍ୟାକାଣ୍ଡ ଘଟିଛି। ଜମିଜମା ବିବାଦକୁ କେନ୍ଦ୍ର କରି ଦେଢଶୁର ଶାବଳ ମାଡ଼ରେ ଭାଇ ବୋହୂର ମୃତ୍ୟୁ ଘଟିଥିବା ଜଣାପଡ଼ିଛି।
ସୂଚନାନୁଯାୟୀ, ବାସୁଦେବପୁର ପୌରପାଳିକା ୭ ନମ୍ବର ୱାର୍ଡର ପ୍ରବୋଦପୁର ଗ୍ରାମର ବାୟାଧର ଜେନାଙ୍କ ପରିବାର ମଧ୍ୟରେ ଜମିଜମା ମାପଚୁପ ହୋଇଥିଲା। ଏହି ସମୟରେ ଦେଢଶୁର ରତିକାନ୍ତ ଜେନାଙ୍କ ସହିତ ଭାଇବାହୁ ପ୍ରୀତିରେଖାଙ୍କର ପାଟିତୁଣ୍ଡ ହୋଇଥିଲା। ଅପରାହ୍ନରେ ରତିକାନ୍ତ ନିଶାସକ୍ତ ଅବସ୍ଥାରେ ଆସି ହଠାତ୍ ଏକ ଶାବଳରେ ପ୍ରୀତିରେଖାଙ୍କ ମୁଣ୍ଡକୁ ୨ ଥର ଶକ୍ତ ପ୍ରହାର କରିଥିଲେ। ଫଳରେ ପ୍ରୀତିରେଖା ଗୁରୁତର ହୋଇଥିଲେ। ତାଙ୍କୁ ପ୍ରଥମେ ବାସୁଦେବପୁର ଓ ପରେ କଟକ ବଡ ଡାକ୍ତରଖାନାକୁ ନେବା ବାଟରେ ରାସ୍ତାରେ ମୃତ୍ୟୁ ହୋଇଯାଇଥିଲା। ସନ୍ଧ୍ୟାରେ ଏହି ଘାଟଣାକୁ ନେଇ ପ୍ରୀତିରେଖାଙ୍କ ପରିବାର ଲୋକେ ବାସୁଦେବପୁର ଥାନାରେ ଏକ ଲିଖିତ ଅଭିଯୋଗ କରିଥିଲେ। ପୋଲିସ ଅଭିଯୁକ୍ତ ରତିକାନ୍ତକୁ ଖୋଜିବାକୁ ଯାଇଥିବା ବେଳେ ସେ ଫେରାର୍ ହୋଇଯାଇଥିଲେ। ପୋଲିସ ଓ ଗ୍ରାମବାସୀ ରାତିସାରା ଖୋଜାଖୋଜି କରିଥିବା ସତ୍ତ୍ଵେ ତାଙ୍କର କୌଣସି ସନ୍ଧାନ ମିଳିନାହିଁ।