ଫ୍ଲୋରିଡ଼ା: ଟି-୨୦ ବିଶ୍ଵକପ୍ ୨୦୨୪ରେ ଶେଷ ଲିଗ୍ ମ୍ୟାଚ୍ ଖେଳିଥାନ୍ତା ଭାରତ । କାନାଡା ବିପକ୍ଷରେ ମ୍ୟାଚ୍ ହେବାର ଥିଲା । କିନ୍ତୁ ବାଧକ ସାଜିଲା ବର୍ଷା । ଗତକାଲି ଭଳି ଆଜି ମଧ୍ୟ ମ୍ୟାଚ୍ ଧୋଇ ହୋଇଯାଇଛି । ପଡ଼ିଆ ଖେଳିବା ଉପଯୋଗୀ ନ ହେବାରୁ ଶେଷରେ ବିନା ଟସରେ ମ୍ୟାଚକୁ ରଦ୍ଦ କରିବାକୁ ପଡ଼ିଛି। ଦୁଇ ଦଳକୁ ଗୋଟିଏ ଲେଖାଏଁ ପଏଣ୍ଟ ମିଳିଛି। ଅମ୍ପାୟର ଭାରତୀୟ ସମୟ ରାତି ୯ଟାରେ ପଡ଼ିଆ ନିରୀକ୍ଷଣ କରିବା ପରେ ମ୍ୟାଚ୍ ବାତିଲ କରିବାକୁ ନିଷ୍ପତ୍ତି ନେଇଛନ୍ତି। ଗ୍ରାଉଣ୍ଡ ଷ୍ଟାଫ ପଡ଼ିଆକୁ ସୁଖାଇବା ପାଇଁ ବହୁତ ପରିଶ୍ରମ କରିଥିଲେ। ସେଥିପାଇଁ ଦେଢ ଘଣ୍ଟା ଅପେକ୍ଷା କରାଯାଇଥିଲା।
ଭାରତ ଓ କାନାଡ଼ା ମ୍ୟାଚ୍ ଫ୍ଲୋରିଡ଼ାର ଲଡରହିଲ ସ୍ଥିତ ସେଣ୍ଟ୍ରାଲ ବ୍ରୋଭାର୍ଡ ରିଜନାଲ ପାର୍କ ଷ୍ଟାଡିୟମ ଟର୍ଫ ଗ୍ରାଉଣ୍ଡରେ ଖେଳା ଯିବାର ଥିଲା। ଭାରତୀୟ ସମୟ ଅନୁସାରେ ରାତି ସାଢେ ୭ଟାରେ ଟସ୍ ପଡ଼ିବାର ଥିଲା। କିନ୍ତୁ ଖରାପ ଆଉଟ୍ ଫିଲ୍ଡ କାରଣରୁ ନିର୍ଦ୍ଧାରିତ ସମୟରେ ଟସ୍ ପଡ଼ି ପାରି ନ ଥିଲା। ଏହାପରେ ପଡ଼ିଆ କର୍ମଚାରୀ ପଡ଼ିଆ ସୁଖାଇବା ପାଇଁ ଉଦ୍ୟମ କରିଥିଲେ। କିନ୍ତୁ ଶେଷରେ ଅମ୍ପାୟର ମ୍ୟାଚ୍ ରଦ୍ଦ କରିବାକୁ ନିଷ୍ପତ୍ତି ନେଇଛନ୍ତି।
ଏବେ ସୁପର-୮ରେ ଭାରତୀୟ ଦଳ ନିଜର ପ୍ରଥମ ମ୍ୟାଚ୍ ଜୁନ ୨୦ ତାରିଖରେ ଆଫଗାନିସ୍ତାନ ବିପକ୍ଷରେ ଖେଳିବ। ଏହା ପରେ ଜୁନ ୨୨ରେ ଆଣ୍ଟିଗାରେ ବାଂଲାଦେଶ/ନେଦରଲାଣ୍ଡ ମଧ୍ୟରୁ ଗୋଟିଏ ଦଳ ସହ ପରବର୍ତ୍ତୀ ମ୍ୟାଚ୍ ଖେଳିବ। ଜୁନ ୨୪ରେ ସେଣ୍ଟ ଲୁସିଆରେ ଭାରତ ଅଷ୍ଟ୍ରେଲିଆ ସହ ହାଇଭୋଲଟେଜ୍ ମ୍ୟାଚ୍ ଖେଳିବ। ସୁପର-୮ରେ ଭାରତର ସମସ୍ତ ମ୍ୟାଚ୍ ଭାରତୀୟ ସମୟ ଅନୁସାରେ ରାତି ୮ଟାରେ ଖେଳାଯିବ।
