ମୁମ୍ୱାଇ : ସନି ଦେଓଲଙ୍କ ଫିଲ୍ମ ‘ବର୍ଡର’, ବଲିଉଡ୍ର ସବୁଠୁ ବଡ଼ ହିଟ୍ସ ଫିଲ୍ମ ମଧ୍ୟରୁ ଗୋଟିଏ। ଏହା ଭାରତୀୟ ସେନାର କାହାଣୀ ଉପରେ ନିର୍ମିତ ସବୁଠୁ ଲୋକପ୍ରିୟ ଫିଲ୍ମ ମଧ୍ୟରୁ ଗୋଟିଏ। ଗଦର-୨ର ଜୋରଦାର ସଫଳତା ପରେ ଏବେ ସନି ଦେଓଲ ବର୍ଡର-୨ ଘୋଷଣା କରିଛନ୍ତି, ସେବେଠାରୁ ବଲିଉଡ୍ ପ୍ରଶଂସକ ଏହି ପ୍ରୋଜେକ୍ଟକୁ ଉତ୍ସାହର ସହ ଅପେକ୍ଷା କରିଛନ୍ତି ଏବଂ ଏବେ ଏହି ଫିଲ୍ମରେ ଜଣେ ଏମିତି ହିଁ ଅଭିନେତା ଆସିଛନ୍ତି, ଯାହାଙ୍କ ନାଁ ଶୁଣି ଫିଲ୍ମ ପାଇଁ ଲୋକଙ୍କ ଏକ୍ସାଇଟମେଣ୍ଟ ଡବଲ ହୋଇଯିବ।
ଚଳିତ ବର୍ଷ ସଫଳତାର ସୁନ୍ଦର ଚର୍ଚ୍ଚିତ ପାଲଟି ଥିଲା ଦିଲଜିତ ଦୋସାଞ୍ଜ ଏବେ ବର୍ଡର-୨ର ସଦସ୍ୟ ହେବାକୁ ଯାଉଛନ୍ତି। ଏହି ଧମାକାପୂର୍ଣ୍ଣ ପ୍ରୋଜେକ୍ଟରେ ଦିଲଜିତ ମଧ୍ୟ ସନିଙ୍କ ସହ କାନ୍ଧ ସହ କାନ୍ଧ ମିଳାଇ ଦେଶ ପାଇଁ ଯୁଦ୍ଧ ଲଢିବାର ନଜର ଆସିବେ।
ଶୁକ୍ରବାର ମେକର୍ସ ଏକ ନୂଆ ପ୍ରୋମୋ ସହ ବର୍ଡର-୨ର କାଷ୍ଟରେ ଦିଲଜିତ୍ଙ୍କ ଏଣ୍ଟ୍ରି ଘୋଷଣା କରିଛନ୍ତି। ପ୍ରୋମୋରେ , ସୋନୁ ନିଗମଙ୍କ ସ୍ୱରରେ ଓରିଜିନାଲ ବର୍ଡର ଫିଲ୍ମର ଗୀତ ସନ୍ଦେସେ ଆତେ ହୈ ଶୁଣିବାକୁ ମିଳୁଛି ଏବଂ ଦିଲଜିତ୍ଙ୍କ ନାଁର ଲେଖା ଆସୁଛି। ଏହି ପ୍ରୋମୋରେ ଦିଲଜିତଙ୍କ ଭଏସ୍ରେ ଏକ ଦେଶଭକ୍ତି ପୂର୍ଣ୍ଣ ଡାଏଲଗ୍ ମଧ୍ୟ ରହିଛି – ‘ଏସ୍ ଦେଶ କି ତରଫ ଉଠନେ ବାଲି ହକ୍ ନଜର ଝୁକ୍ ଜାତି ହୈ ଖୌଫ୍ ସେ ... ଏହି ସରହଦୌଁ ପର୍ ଜବ୍ ଗୁରୁ କେ ବାଜ ପହରା ଦେତେ ହୈଁ !’
ଦିଲଜିତ ମଧ୍ୟ ନିଜର ଇନଷ୍ଟାଗ୍ରାମରେ ବର୍ଡର-୨ର ଘୋଷଣା ସେୟାର କରିଛନ୍ତି। ସେ ପ୍ରୋମୋ ସେୟାର କରି ଲେଖିଛନ୍ତି , ପହଲି ଗୋଲି ଦୁଶ୍ମନ ଚଲାଏଗା ଔର ଆଖିରି ଗୋଲି ହମ୍ ! ଏମିତି ପାୱାରଫୁଲ ଟିମ୍ ସହ ଠିଆ ହୋଇ ଏବଂ ଆମର ସୈନିକଙ୍କ ସହ ପାଦ ମିଶାଇ ଚାଲିବାରେ ସମ୍ମାନବୋଧ ଅନୁଭବ ହେଉଛି।
କହି ରଖୁଛୁ କି , ସନି ଦେଓଲ ଜୁନ୍ରେ ଅଫିସିଆଲି ଘୋଷଣା କରିଥିଲେ ଯେ, ସେ ଜେ.ପି.ଡି ଦତ୍ତାଙ୍କ ଫିଲ୍ମ ବର୍ଡର (୧୯୯୭)ରୁ ନିଜର ଫୌଜି ଭୂମିକା ପୁଣି ଥରେ କରିବା ପାଇଁ ପ୍ରସ୍ତୁତ ଏବଂ ଫିଲ୍ମର ସିକ୍ୱଲ ନିର୍ମିତ ହେବାକୁ ଯାଉଛି। ଉକ୍ତ ଫିଲ୍ମରେ ଅନୁରାମ ସିଂହ ନିର୍ଦ୍ଦେଶନା ଦେବେ। ସନି ସୋସିଆଲ ମିଡ଼ିଆରେ ପୋଷ୍ଟ କରି ଲେଖି ଥିଲେ ,୨୭ ବର୍ଷ ପୂର୍ବେ ଜଣେ ଫୌଜି ଶପଥ କରି ଥିଲେ ଯେ , ସେ ପୁଣି ଆସିବେ। ସେହି ଶପଥକୁ ପୂରା କରିବାକୁ, ହିନ୍ଦୁସ୍ତାନର ମାଟିକୁ ନିଜର ସଲାମ କହିବାକୁ ଆସୁଛି।
ଅଫିସିଆଲି ଘୋଷଣା ପରେ ମେକର୍ସ ବର୍ଡର -୨ର କାଷ୍ଟ ଘୋଷଣା କରିବା ଆରମ୍ଭ କରିଛନ୍ତି। ଏବେସୁଦ୍ଧା ଏହି ଫିଲ୍ମରେ ସନିଙ୍କ ସହ ଆୟୁଷ୍ମାନ ଖୁରାନା ଓ ବରୁଣ ଧୱନଙ୍କ ନାଁ ଘୋଷଣା ହୋଇ ସାରିଛି। ବର୍ଡର -୨ ଘୋଷଣା କରିବା ସମୟରେ ମେକର୍ସ ଏହାକୁ ଇଣ୍ଡିଆର ସବୁଠୁ ବଡ଼ ୱାର ଫିଲ୍ମ କହିଥିଲେ। ପ୍ରଯୋଜକ ସଂସ୍ଥାର ସୂଚନାନୁସାରେ, ବର୍ଡର-୨ , ୨୦୨୫ରେ ରିଲିଜ ହେବ।
