ଭୁବନେଶ୍ୱର,୦୫/୦୮: ଗୁରୁବାର ଠାରୁ ବେଙ୍ଗାଲୁରୁ ଓ ଅନନ୍ତପୁରରେ ଘରୋଇ ଦୁଲୀପ ଟ୍ରଫି ଆରମ୍ଭ ହେବ । ବିସିସିଆଇର ଏହା ଏକ ମର୍ଯ୍ୟାଦାଜନକ ଏବଂ ଗୁରୁତ୍ୱପୂର୍ଣ୍ଣ ଟୁର୍ଣ୍ଣାମେଣ୍ଟ । ୪ଟି ଦଳରେ (ଇଣ୍ଡିଆ ଏ,ବି,ସି ଓ ଡି) ରହିଛନ୍ତି ୬୦ ଜଣ ଖେଳାଳି । ଦେଶର ପ୍ରମୁଖ ତାରକା ଖେଳାଳିଙ୍କ ସହ ଘରୋଇ ରଣଜୀ ଟ୍ରଫି ଓ ଆଇପିଏଲରେ ଶ୍ରେଷ୍ଠ ପ୍ରଦର୍ଶନ କରି ଚର୍ଚ୍ଚାରେ ରହିଥିବା ଖେଳାଳିଙ୍କୁ ଏଥିରେ ଦେଖିବାକୁ ମିଳିବ । କିନ୍ତୁ ଏହି ଟୁର୍ଣ୍ଣାମେଣ୍ଟରେ ଜଣେ ହେଲେ ବି ଓଡ଼ିଆ ଖେଳାଳିଙ୍କୁ ସୁଯୋଗ ମିଳି ନାହିଁ । ଏହାର କାରଣ କ’ଣ ତାହା କାହାକୁ ଅଛପା ନାହିଁ । ରଣଜୀ ଟ୍ରଫି ଏବଂ ଅନ୍ୟାନ୍ୟ ପ୍ରତିଯୋଗିତାରେ ଓଡ଼ିଆ ଖେଳାଳିଙ୍କ ପ୍ରଦର୍ଶନ ଭଲ ନରହିବାରୁ ଓଡ଼ିଆ ଖେଳାଳିଙ୍କୁ ଦୁଲିପ ଟ୍ରଫି ଖେଳିବାର ସୁଯୋଗ ମିଳି ନାହିଁ ।
ଗତ ରଣଜୀ ଟ୍ରଫି ସିଜନ ଉପରେ ଯଦି ନଜର ପକାଇବା ଓଡ଼ିଶାର କୌଣସି ବ୍ୟାଟର ଓ ବୋଲର ଶ୍ରେଷ୍ଠ ୧୦ ଜଣଙ୍କ ମଧ୍ୟରେ ରହି ନଥିଲେ । ଶୁଭ୍ରାଂଶୁ ସେନାପତି ୭ଟି ମ୍ୟାଚ୍ରୁ ୫୩୫ ରନ୍ କରି ଶ୍ରେଷ୍ଠ ବ୍ୟାଟର ତାଲିକାରେ ୨୩ତମ ସ୍ଥାନରେ ରହିଥିଲେ । ସିଜନରେ ୨ଟି ଶତକ ସେ ହାସଲ କରିଥିଲେ । ସେଥିରେ ଗୋଟିଏ ଦ୍ୱିଶତକୀୟ ଇନିଂସ (୨୭୭) ଥିଲା । ବ୍ୟାଟିଂ ଆଭରେଜ ୪୧.୧୫ ରହିଥିଲା । ବୋଲିଂରେ ରାଜେଶ ମହାନ୍ତି ୬ଟି ମ୍ୟାଚ୍ ଖେଳି ୩୧ଟି ୱିକେଟ୍ ନେଇଥିଲେ ।
ଇନିଂସରେ ଶ୍ରେଷ୍ଠ ବୋଲିଂ ୫/୩୩ ଏବଂ ଇକୋନୋମି ୩.୦୯ ଥିଲା । ଯୁବ ୱିକେଟ୍କିପର ବ୍ୟାଟର ଆଶୀର୍ବାଦ ସ୍ୱାଇଁଙ୍କୁ ପଦାର୍ପଣ ସୁଯୋଗ ମିଳିଥିଲା । କିନ୍ତୁ ସେ ସେମିତି ଚମକପ୍ରଦର୍ଶନ ପ୍ରଦର୍ଶନ କରିପାରି ନଥିଲେ । ସନ୍ଦୀପ ପଟ୍ଟନାୟକ ୭ଟି ମ୍ୟାଚ୍ରୁ ୨ଟି ଶତକ ହାସଲ କରି ୪୪୦ ରନ୍ କରିଥିଲେ । ଅନ୍ୟମାନଙ୍କ ପ୍ରଦର୍ଶନ ସେମିତି ଆଖି ଦୃଶିଆ ନଥିଲା । ସିଜନରେ ୭ଟି ମ୍ୟାଚ୍ ଖେଳି ଓଡ଼ିଶା କେବଳ ଗୋଟିଏ ମ୍ୟାଚ୍ ଜିତିବାରେ ସଫଳ ହୋଇଥିଲା । ହିମାଚଳ ବିପକ୍ଷରେ ଏହି ମ୍ୟାଚ୍ ଜିତିଥିଲା । ସେହିପରି ମଧ୍ୟପ୍ରଦେଶ ଓ ପୁଡୁଚେରୀ ବିପକ୍ଷରେ ମ୍ୟାଚ୍ ଡ୍ର’ ରଖି ପଏଣ୍ଟ ଭାଗ କରିଥିଲା । ଗ୍ରୁପ୍ ଡି’ରେ ଦଳ ୧୨ ପଏଣ୍ଟ ପାଇ ସପ୍ତମ ସ୍ଥାନରେ ରହିଥିଲା । ଏଭଳି ଭାବରେ ଗତ ସିଜନରେ ଓଡ଼ିଶାର ଅଭିଯାନ ଶେଷ ହୋଇଥିଲା । ଶୁଭ୍ରାଂଶୁଙ୍କ ଗୋଟିଏ ଇନିଂସକୁ (୨୭୭) ଛାଡ଼ି ଜାତୀୟ ସ୍ତରରେ ଚର୍ଚ୍ଚାକୁ ଆସିଲା ଭଳି କେହି ଖେଳ ଦେଖାଇ ପାରିନଥିଲେ ।
ଓଡ଼ିଶା କ୍ରିକେଟ୍ ଆସୋସିଏସନ୍ (ଓସିଏ) ପକ୍ଷରୁ ଖେଳାଳିଙ୍କୁ ସମସ୍ତ ସୁବିଧା ସୁଯୋଗ ଯୋଗାଇ ଦିଆଯାଉଛି । ଓସିଏ ଏକାଡେମୀରେ ସବୁ ପ୍ରକାର ଅତ୍ୟାଧୁନିକ ସୁବିଧା ସୁଯୋଗ ରହିଛି । ସେମିତି ପ୍ରତି ସିଜନରେ ଅଭିଜ୍ଞ କୋଚଙ୍କୁ ନିଯୁକ୍ତ କରାଯାଉଛି । ୱାସିମ ଜାଫର, ଦିନେଶ ମୋଙ୍ଗିଆଙ୍କ ପରେ ଏବେ ସୁରେନ୍ଦ୍ର ଭାବେ କୋଚ ନିଯୁକ୍ତ ହୋଇଛନ୍ତି । ତୃଣମୂଳ ସ୍ତରରୁ କ୍ରିକେଟ୍ର ବିକାଶ ନେଇ ଓସିଏ ପକ୍ଷରୁ ସାରା ରାଜ୍ୟରେ ୪୧ଟି ଏକାଡେମୀ ପ୍ରତିଷ୍ଠା କରାଯାଇଛି । ଘରୋଇ କ୍ରିକେଟର ସବୁ ଟୁର୍ଣ୍ଣାମେଣ୍ଟ ଖେଳାଯାଉଛି । ତଥାପି କେଉଁଠି ସମସ୍ୟା ରହୁଛି ଯେ ଦଳକୁ ପ୍ରତିଭାବାନ ଖେଳାଳି ମିଳୁ ନାହାନ୍ତି । ଦୀର୍ଘ ବର୍ଷ ହେଲା ଓଡ଼ିଶା ଦଳ ରଣଜୀ ଟ୍ରଫିରେ ସେମି ଫାଇନାଲ ପର୍ଯ୍ୟାୟକୁ ଉନ୍ନୀତ ହେବାକୁ ନେଇ ସଂଘର୍ଷ କରୁଛି । ଦେବାଶିଷ ମହାନ୍ତି, ଶିବସୁନ୍ଦର ଦାସ ଏବଂ ସଞ୍ଜୟ ରାଉଳଙ୍କ ପରେ ଓଡ଼ିଶାରୁ ଅନ୍ତର୍ଜାତୀୟ ଖେଳାଳି ବାହାରି ପାରି ନାହାନ୍ତି ।
ଆଇପିଏଲରେ ୨୦୦ରୁ ଊଦ୍ଧ୍ୱର୍ ଖେଳାଳି ସାମିଲ ହେଉଥିଲେବି ଓଡ଼ିଶାରୁ ଜଣେ ବି ଖେଳାଳି ନାହାନ୍ତି । ଯଦିବା ଶୁଭ୍ରାଂଶୁ ଚେନ୍ନାଇ ସୁପର କିଙ୍ଗ୍ସ ଦଳରେ ସାମିଲ ଥିଲେ, ଗତ ସିଜନରେ ଦଳ ତାଙ୍କୁ ବାଦ ଦେଇଥିଲା । ଦୁର୍ବଳ ଫର୍ମ ଯୋଗୁ ନିଲାମୀରେ ମଧ୍ୟ ତାଙ୍କୁ କେହି କିଣି ନଥିଲେ । ଇତିମଧ୍ୟରେ ଶୁଭ୍ରାଂଶୁ ଓଡ଼ିଶା ଦଳ ଛାଡ଼ି ସାରିଛନ୍ତି । ଆଗାମୀ ସିଜନରୁ ସେ ମଧ୍ୟପ୍ରଦେଶରୁ ଖେଳିବେ ।
ପୂର୍ବତନ ଅନ୍ତର୍ଜାତୀୟ କ୍ରିକେଟର ଦେବାଶିଷ ମହାନ୍ତି ଏକ ଗଣମାଧ୍ୟମକୁ ସାକ୍ଷାତକାର ଦେଇ କହିଛନ୍ତି, ‘ଓଡ଼ିଶାରୁ କାହିଁକି ଅନ୍ତର୍ଜାତୀୟ ଖେଳାଳି ବାହାରୁ ନାହାନ୍ତି ତାହା ବଡ଼ ବିତର୍କର ବିଷୟ । ମୋ ପରେ ବସନ୍ତ ମହାନ୍ତି ଅନ୍ତର୍ଜାତୀୟ ମ୍ୟାଚ୍ ଖେଳିବାର ଯୋଗ୍ୟତା ରଖିଥିଲେ। ମାତ୍ର ସେ ସୁଯୋଗ ପାଇନଥିଲେ । ସେମିତି ଏବେ ଶୁଭ୍ରାଂଶୁଙ୍କ ଠାରେ ମଧ୍ୟ ସୁଯୋଗ ଥିଲା । ମୁଁ ଯେଉଁ ସମୟରେ ବିସିସିଆଇ ଚୟନ କମିଟିରେ ଥିଲି, ସେ ସମୟରେ ତାଙ୍କ ପ୍ରଦର୍ଶନ ଭଲ ରହିନଥିଲା । ଜୁନିୟର ବର୍ଗରେ ରାଜେଶ ମହାନ୍ତିଙ୍କୁ ଅନ୍ତର୍ଜାତୀୟ ଖେଳିବାର ସୁଯୋଗ ଦେଇଥିଲି । ସେ ବି ଘରୋଇ କ୍ରିକେଟ୍ରେ ଭଲ ପ୍ରଦର୍ଶନ କରିଥିଲେ ।’
ଅର୍ଥାତ ସବୁ ସୁବିଧା ସୁଯୋଗ ଥାଇ କାହିଁକି ଖେଳାଳି ଭଲ ପ୍ରଦର୍ଶନ କରିପାରୁ ନାହାନ୍ତି ଏ ଦିଗରେ ଓସିଏ ବିଶ୍ଳେଷଣ କରିବା ସହ ଦେବାଶିଷ ଯେଉଁ ବିତର୍କର କଥା କହୁଛନ୍ତି, ଏହା ଉପରେ ଗୁରୁତ୍ୱ ଦେବା କଥା । ଓସିଏ ପକ୍ଷରୁ ‘ଭିଜନ-୨୦୨୪’ ନାମରେ କାର୍ଯ୍ୟ ଚାଲିଥିଲା କିନ୍ତୁ ତାହା କେତେ ଫଳପ୍ରଦ ହେଲା, ତାହା କାହାକୁ ଜଣା ନାହିଁ । ଓସିଏର ଘରୋଇ ଟୁର୍ଣ୍ଣାମେଣ୍ଟରେ ବିଭିନ୍ନ କ୍ଲବ ଓ ଜିଲ୍ଲା ଦଳ ଚୟନରେ ଅନିୟମିତା ଅଭିଯୋଗ ପୂର୍ବରୁ ରହିଛି । ପ୍ରକୃତରେ ତୃଣମୂଳସ୍ତରରେ ଦଳ ଚୟନ ଠିକ୍ ଭାବରେ ହେଉଛି କି ନାହିଁ, ତା ଉପରେ ଓସିଏ ସତର୍କ ଦୃଷ୍ଟି ଦେବାର ଆବଶ୍ୟକତା ଅଛି ।
