ଡେରାଡୁନ୍,୧୯/୧୧: ଉତ୍ତରକାଶୀ ସୁଡ଼ଙ୍ଗ ମଧ୍ୟରେ ୭ ଦିନ ହେଲା ଫସିରହିଥିବା ଶ୍ରମିକମାନଙ୍କୁ ଉଦ୍ଧାର ପାଇଁ ୩ଟି ଉପାୟ ଅବଲମ୍ବନ କରାଗଲାଣି । କିନ୍ତୁ ସବୁ ଫେଲ୍ ମାରିଛି । ଏବେ ଆହୁରି ୩ଟି ଯୋଜନା ଉପରେ କାର୍ଯ୍ୟ କରାଯାଉଛି । ପ୍ଲାନ୍ ‘ଏ’ ଅନୁସାରେ ଏକ ବୁଲ୍ଡୋଜର୍ ଦ୍ୱାରା ମାଟି ଅତଡ଼ା ବାହାର କରାଯାଇ ଶ୍ରମିକଙ୍କୁ ଉଦ୍ଧାର ଲାଗି ଯୋଜନା ହୋଇଥିଲା । ପ୍ଲାନ୍ ‘ବି’ରେ ଏକ ୯୦୦ ମିମି ବ୍ୟାସବିଶିଷ୍ଟ ପାଇପ୍ ଭର୍ତ୍ତି ଲାଗି ଚେଷ୍ଟା ହୋଇଥିଲା । ପ୍ଲାନ୍ ‘ସି’ରେ ଅଧିକ ଶକ୍ତିଶାଳୀ ଆମେରିକୀୟ ଅଗର୍ ମେସିନ୍ ଭାରତୀୟ ବାୟୁସେନା ଦ୍ୱାରା ପହଞ୍ଚାଯାଇଥିଲା । ଏହି ମେସିନ୍ ଦ୍ୱାରା ୭୦ ମିଟର ଖୋଳାଯିବା ପରେ ଶୁକ୍ରବାର ସନ୍ଧ୍ୟାବେଳରୁ ଏହା ବନ୍ଦ ହୋଇଯାଇଛି ।
ପ୍ଲାନ୍ ‘ଡି’ ଅନୁସାରେ ଇନ୍ଦୋରରୁ ନୂଆ ମେସିନ୍ ଅଣାଯାଇ ଆଉ ଏକ ଭୂଲମ୍ବ ଆକାରର ଖନନ କରାଯିବ । ଏହାଦ୍ୱାରା ଏକ ଉପକରଣ ଦ୍ୱାରା ପାଇପ୍କୁ ସୁଡ଼ଙ୍ଗ ମଧ୍ୟକୁ ଠେଲାଯିବ । ଶେଷରେ ଏହା ଶ୍ରମିକମାନଙ୍କ ପାଖରେ ପହଞ୍ଚି ପାରିବ । ଏହା ଫେଲ୍ ମାରିଲେ ପ୍ଲାନ୍ ‘ଇ’ରେ ଊଦ୍ଧ୍ୱର୍ ଖନନ କରାଯାଇ ଏକ ବଡ଼ ଗର୍ତ୍ତ ସୃଷ୍ଟି କରାଯିବ । ସୁଡ଼ଙ୍ଗର ଯେଉଁ ସ୍ଥାନରେ ଶ୍ରମିକମାନେ ଫସିଛନ୍ତି,ଠିକ୍ ତାହାରି ଉପରପଟେ ଏହି ଗର୍ତ୍ତ ସୃଷ୍ଟି କରାଯିବ । ଅନ୍ତିମ ଯୋଜନା ରେଳପଥ ଦ୍ୱାରା ଦିଆଯାଇଛି । ଏହା ଅନୁସାରେ ସୁଡ଼ଙ୍ଗର ବିପରୀତ ଦିଗରୁ ଆଉ ଏକ ସମାନ୍ତରାଳ ସୁଡ଼ଙ୍ଗ ଖୋଳାଯିବ । ମୁଖ୍ୟ ସୁଡ଼ଙ୍ଗ ସହ ଏହାକୁ ମିଶାଇ ସେହି ବାଟ ଦେଇ ଶ୍ରମିକମାନଙ୍କୁ ବାହାର କରାଯିବ ।
ଫସିଥିବା ଶ୍ରମିକମାନଙ୍କର କିଛି ପରିବାର ଏବେ ଧୀରେ ଧୀରେ ଆଶା ଛାଡ଼ିବା ଆରମ୍ଭ କରିଛନ୍ତି । ଜଣେ ଶ୍ରମିକଙ୍କ ଭାଇ କହିଛନ୍ତି, ସେମାନଙ୍କ ସ୍ୱାସ୍ଥ୍ୟାବସ୍ଥା ଖରାପ ହେବା ପୂର୍ବରୁ ସେମାନଙ୍କୁ ତୁରନ୍ତ ବାହାର କରିବାକୁ ହେବ। ଉଦ୍ଧାର କାର୍ଯ୍ୟ ଆହୁରି ତ୍ୱରାନ୍ୱିତ ହେବା ଜରୁରି। ଡାକ୍ତରମାନେ ମଧ୍ୟ ବ୍ୟାପକ ଥଇଥାନ ବ୍ୟବସ୍ଥା ଉପରେ ଗୁରୁତ୍ୱ ଦେଇଛନ୍ତି । ଅଧିକ ସମୟ ଫସିବା ଦ୍ୱାରା ଶ୍ରମିକମାନେ ଶାରୀରିକ ଓ ମାନସିକ ସ୍ତରରେ ପ୍ରଭାବିତ ହୋଇପାରନ୍ତି ।
ଉଲ୍ଲେଖଯୋଗ୍ୟ, ନଭେମ୍ବର ୧୨ ଅର୍ଥାତ୍ ଦୀପାବଳି ଦିନ ଭୋର ୪ଟାରେ ଉତ୍ତରକାଶୀର ନିର୍ମାଣାଧୀନ ସୁଡ଼ଙ୍ଗ ଭୁଶୁଡ଼ି ପଡ଼ିଥିଲା । ସେଥିରେ ଓଡ଼ିଶାର ୫ ସମେତ ମୋଟ ୪୦ ଶ୍ରମିକ ଫସିଥିବା ନେଇ ରିପୋର୍ଟ ଆସିଥିଲା । ଏବେ ଏହି ସଂଖ୍ୟା ୪୧ ବୋଲି ଜଣାପଡ଼ିଛି । ଏମିତି କି ଭିତରେ ଆହୁରି ଶ୍ରମିକ ଥାଇପାରନ୍ତି ବୋଲି ଆଶଙ୍କା କରାଯାଉଛି । ସୁଡ଼ଙ୍ଗ ଭୁଶୁଡ଼ିବା ଘଟଣାକୁ ଆଜି ୭ ଦିନ ପୂରିଛି । ଆଜି ବି ଶ୍ରମିକମାନଙ୍କ ନିକଟରେ ଶୁଖିଲା ଖାଦ୍ୟ, ପାଣି ଏବଂ ଅକ୍ସିଜେନ୍ ପାଇପ୍ ଯୋଗେ ପହଞ୍ଚାଯାଇଛି ।
ପିଏମ୍ଓର ଉପସଚିବ ମଙ୍ଗେଶ ଘିଲ୍ଡିୟାଲ୍ ଏବଂ ପିଏମ୍ଓ ଉପଦେଷ୍ଟା ଶନିବାର ସକାଳେ ଘଟଣାସ୍ଥଳ ପରିଦର୍ଶନ କରି ଏନ୍ଏଚ୍ଏଆଇ, ରେଳପଥ ଏବଂ ନରେୱ ଇଞ୍ଜିନିୟରଙ୍କ ସହ ବୈଠକ କରିଛନ୍ତି । ବୈଠକରେ ସୁଡ଼ଙ୍ଗର ଉପରପଟୁ କାଟି ଶ୍ରମିକମାନଙ୍କୁ ବାହାର କରିବା ଲାଗି ଯୋଜନା ହୋଇଛି । ଏଥିପାଇଁ ପାହାଡ଼ ଉପରେ ଗଛ କାଟି ମେସିନ୍ ନେବା ଲାଗି ରାସ୍ତା ବନାଯାଉଛି । ଯେଉଁ ସ୍ଥାନରେ ଊଦ୍ଧ୍ୱର୍ ଖନନ (ଭର୍ଟିକାଲ୍ ଡ୍ରିଲିଂ) କରାଯିବ, ତାହାକୁ ଚିହ୍ନଟ କରାଯାଇଛି । ଭର୍ଟିକାଲ୍ ଡ୍ରିଲିଂ ମେସିନ୍ ବି ମଗାଯାଇଛି । ନୂଆ ଅଗର୍ ମେସିନ୍ ମଧ୍ୟ ଶନିବାର ସକାଳ ୧୧ଟାରେ ଉତ୍ତରକାଶୀ ପହଞ୍ଚି ସାରିଛି । କିନ୍ତୁ ଖବର ଲେଖାହେବା ବେଳକୁ ଖନନ ଆରମ୍ଭ ହୋଇ ନ ଥିଲା ।
