ନୂଆଦିଲ୍ଲୀ ୭/୯: ହରିୟାଣାର ଚରଖୀ-ଦାଦରୀରେ ୮ମ ପାସ୍ କରିଥିବା ଜଣେ ଶ୍ରମିକଙ୍କ ବ୍ୟାଙ୍କ ଖାତାକୁ ୨୦୦ କୋଟି ଟଙ୍କା ଆସିଯାଇଛି । ଏହା ଜାଣିବା ପରେ ତାଙ୍କ ହୋସ୍ ଉଡିଯାଇଛି । ପରିବାରଲୋକେ ମଧ୍ୟ ଚିନ୍ତାରେ ପଡିଯାଇଛନ୍ତି । ତେବେ ସେମାନେ ଏଥିରୁ ଟଙ୍କାଟିଏ ବି ଖର୍ଚ୍ଚ କରିନାହାଁନ୍ତି । ବରଂ ପୋଲିସ ଆସି ତାଙ୍କ ଘରେ ଏତେ ଟଙ୍କା କେଉଁଠୁ ଆସିଲା ବୋଲି ପଚରାଉଚରା କରୁଛି । ଏହା ପରେ ପରିବାରର ସମସ୍ତେ ଡରିଯାଇଛନ୍ତି । ଘଟଣାଟି ଚରଖୀ-ଦାଦରୀ ଗାଁ ବେରଲାର । ଏଠାରେ ଜଣେ ଶ୍ରମିକ ବିକ୍ରମଙ୍କ ଖାତାରେ ୨୦୦ କୋଟି ଟଙ୍କା ଆସିବା ପରେ ହଇଚଇ ସୃଷ୍ଟି ହୋଇଯାଇଛି । ଏତେ ଟଙ୍କା କେଉଁଆଡୁ ଆସି ତାଙ୍କୁ ଖୁସି କରିବା ବଦଳରେ ଓଲଟି ତାଙ୍କ ଘରେ ଡର ଖେଳିଯାଇଛି । ପରିବାରଲୋକେ ଥାନାରେ ପହଞ୍ଚି ସୁରକ୍ଷା ପାଇଁ ଅନୁରୋଧ କରିଛନ୍ତି ।
କେବଳ ଏତିକି ନୁହେଁ, ବିକ୍ରମଙ୍କ ପରିବାରଲୋକେ ପୋଲିସ ବିରୁଦ୍ଧରେ ମଧ୍ୟ ଅଭିଯୋଗ ଲଗାଇଛନ୍ତି କି ମାମଲାକୁ ତୁଲାଇବା ବଦଳରେ ଓଲଟି ପୋଲିସ ତାଙ୍କୁ ଧମକାଉଛି । ୨ ଦିନ ପୂର୍ବରୁ ୟୁପି ପୋଲିସ ତାଙ୍କ ଘରକୁ ଆସି ବିକ୍ରମଙ୍କ ୟେଶ୍ ବ୍ୟାଙ୍କ ଖାତାକୁ ୨୦୦ କୋଟି କେମିତି ଜମା ହେଲା ସେନେଇ ପଚରାଉଚରା ମଧ୍ୟ କରିଛି । ବିକ୍ରମଙ୍କ ପରିବାରଲୋକଙ୍କ କହିବାନୁସାରେ ପୋଲିସ ତାଙ୍କୁ ଜଣାଇଛି କି ୨୦୦ କୋଟିର ମାମଲା । ତେଣୁ ଏକ ଟିମ୍ ବ୍ୟାଙ୍କରେ ପହଞ୍ଚି ଖାତାର ଯାଞ୍ଚ କରିବ । ଯାଞ୍ଚ ଆଧାରରେ ଆଗାମୀ କାର୍ଯ୍ୟାନୁଷ୍ଠାନ ନିଆଯିବ । ବର୍ତ୍ତମାନ ବ୍ୟାଙ୍କ ଖାତାକୁ ଫ୍ରିଜ୍ କରିଦିଆଯାଇଛି ।
୨ ଦିନ ପୂର୍ବରୁ ୟୁପି ପୋଲିସ ବିକ୍ରମଙ୍କ ଘରେ ପହଞ୍ଚିଥିଲା । ପୋଲିସ ବିକ୍ରମଙ୍କୁ ପଚାରିଥିଲା କି ତାଙ୍କ Yes Bank ଖାତାକୁ ୨୦୦ କୋଟିର ଟ୍ରାଞ୍ଜାକ୍ସନ କେମିତି ହେଲା । ଏହି ପଇସା କେଉଁଠୁ ଆସିଲା ? ପୋଲିସ କଥା ଶୁଣି ବିକ୍ରମ ଏବଂ ତାଙ୍କ ପରିବାରଲୋକେ ଆବାକାବା ହୋଇଯାଇଥିଲେ । କୁହାଯାଉଛି କି ବିକ୍ରମ ୨ ମାସ ପୂର୍ବରୁ ଚାକିରୀ କରିବା ପାଇଁ ପଟୌଦୀ ଯାଇଥିଲେ । ସେଠାରେ ସେ ଏକ୍ସପ୍ରେସ ୨୦ ନାମକ କମ୍ପାନୀରେ ଶ୍ରମିକ ଭାବେ କାମ କରୁଥିଲେ । ସେଠାରେ ତାଙ୍କର ଖାତା ଖୋଲିବା ପାଇଁ ତାଙ୍କଠୁ ଡକ୍ୟୁମେଣ୍ଟ ନିଆଗଲା କିନ୍ତୁ ପରେ ତାଙ୍କ ଖାତା ରଦ୍ଦ ହୋଇଗଲା କହି ତାଙ୍କୁ ଚାକିରୀରୁ ବିଦା କରିଦିଆଗଲା । ସେଠାରେ ବିକ୍ରମ ପ୍ରାୟ ୧୭ ଦିନ କାମ କରିଥିଲେ । ତେବେ ତାଙ୍କ ଆକାଉଣ୍ଟକୁ କେମିତି ଏତେ ଟଙ୍କା ଆସିଲା ସେନେଇ ଯାଞ୍ଚ କରୁଛି ପୋଲିସ ।