ନୂଆଦିଲ୍ଲୀ: ଜର୍ମାନ ପ୍ରତିରକ୍ଷା ନିର୍ମାତା ରାଇନମେଟାଲ ଜୁନ ୨୫ ତାରିଖରେ ଘୋଷଣା କରିଛି ଯେ, ନେଦରଲ୍ୟାଣ୍ଡର ଦି ହେଗରେ ଅନୁଷ୍ଠିତ ନାଟୋ ଶିଖର ସମ୍ମିଳନୀରେ ଏକ ଚୁକ୍ତି ସ୍ୱାକ୍ଷର ପରେ ୟୁକ୍ରେନକୁ ନୂଆ ରାଇନମେଟାଲ ଅର୍ମାଇନ ଯାନ ଯୋଗାଇ ଦିଆଯିବ। ୟୁକ୍ରେନ ହେଉଛି ଏହି ନୂତନ ପିଢୀର ଟାକ୍ଟିକାଲ ପ୍ଲାଟଫର୍ମ ପାଇଁ ପ୍ରଥମ ଅର୍ଡର ପାଇବାରେ ବିଶ୍ୱରେ ପ୍ରଥମ ଦେଶ।
ରାଇନମେଟାଲ ଡିଫେନ୍ସ ନେଦରଲ୍ୟାଣ୍ଡ ଦ୍ୱାରା ନିର୍ମିତ ଅର୍ମାଇନ ଯାନ ମୁଖ୍ୟତଃ ଯୁଦ୍ଧକ୍ଷେତ୍ରରୁ ଆହତ ସୈନିକମାନଙ୍କୁ ଉଦ୍ଧାର ପାଇଁ ଡିଜାଇନ କରାଯାଇଛି। ଏହି ଯାନଗୁଡିକରେ ହାଲୁକା ବଗି ରଖି ଡିଜାଇନ କରାଯାଇଛି। ଯାହା ଯୁଦ୍ଧକ୍ଷେତ୍ରରେ ଆହତ ବ୍ୟକ୍ତିଙ୍କୁ ଦ୍ରୁତ ପରିବହନ ଯୋଗାଇଦେଇଥାଏ। ଯେଉଁଥିପାଇଁ ଯୁଦ୍ଧ କ୍ଷେତ୍ରରେ ମୃତାହତ ସଂଖ୍ୟା କମ ରହିଥାଏ।
ରାଇନମେଟାଲ ଅନୁସାରେ, ଅର୍ମାଇନ ହେଉଛି "ଏକ ହାଲୁକା ଟାକ୍ଟିକାଲ ସିଷ୍ଟମ, ଯାହା ଡିଜେଲ ଇଞ୍ଜିନ ସହିତ ଇଲେକ୍ଟ୍ରିକ ମୋଟରକୁ ନେଇ କାମ କରିଥାଏ ଏବଂ ଏହା 'ସାଇଲେଣ୍ଟ ମୁଭ୍ ଓ ସାଇଲେଣ୍ଟ ୱାଚ୍'(ନିଶବ୍ଦ ଚାଲ୍) ସୁବିଧା ପ୍ରଦାନ କରିଥାଏ। ଏହାର ସର୍ବାଧିକ ୧୨୦୦ କିଲୋମିଟର ପର୍ଯ୍ୟନ୍ତ ରେଞ୍ଜ ରହିଛି ଏବଂ ଏହା ଏକ ଟନ ପର୍ଯ୍ୟନ୍ତ ଭାର ବହନ କରିପାରେ। କମ୍ପାନୀ ଏହି ଯାନ ବିଷୟରେ ଆହୁରି ସୂଚନା ଦେଇ କହିଛି ଯେ, "ଇଲେକ୍ଟ୍ରିକ ପାୱାରଟ୍ରେନ ଅର୍ମାଇନକୁ ପ୍ରାୟ ନିଃଶବ୍ଦ କରିଥାଏ। ଏହା କଠିନ ଭୂଖଣ୍ଡରେ ଘଣ୍ଟା ପ୍ରତି ୫୦ କିଲୋମିଟର ଏବଂ ସାଧାରଣ ରାସ୍ତାରେ ଘଣ୍ଟା ପ୍ରତି ୧୦୦ କିଲୋମିଟର ବେଗ ପର୍ଯ୍ୟନ୍ତ ନିଃଶବ୍ଦରେ ଗତି କରିପାରିବାର କ୍ଷମାତା ରଖିଛି।"
ଏହା ଶତ୍ରୁପକ୍ଷଙ୍କ ଗୁଇନ୍ଦାଗିରିକୁ ଏଡାଇବାରେ ଗୁରୁତ୍ୱପୂର୍ଣ୍ଣ ଟାକ୍ଟିକାଲ ସୁବିଧା ପ୍ରଦାନ କରେ। ଇଲେକ୍ଟ୍ରିକ ଇଞ୍ଜିନ ଯୁଦ୍ଧକ୍ଷେତ୍ରରେ ଥିବା ସୈନିକମାନଙ୍କ ପାଇଁ ଚାର୍ଜିଂ ପଏଣ୍ଟ ମଧ୍ୟ ଯୋଗାଇବାରେ ସହଯୋଗ କରିଥାଏ। ୟୁକ୍ରେନ ଆସନ୍ତା ୨୦୨୬ ବର୍ଷ ଆରମ୍ଭରୁ ଏହା ଗ୍ରହଣ କରିବା ଆରମ୍ଭ କରିବ।
ନେଦରଲ୍ୟାଣ୍ଡ ପ୍ରଧାନମନ୍ତ୍ରୀ ଡିକ ସ୍କୁଫ ୟୁକ୍ରେନ ପାଇଁ ଏକ ନୂଆ ସାମରିକ ସାହାଯ୍ୟ ପ୍ୟାକେଜ ଘୋଷଣା କରିଛନ୍ତି। ଯେଉଁଥିରେ ୧୦୦ ଡ୍ରୋନ ରାଡାର ସିଷ୍ଟମ, ଫ୍ରଣ୍ଟଲାଇନ ଯାନ ଏବଂ ଡ୍ରୋନ ପହଞ୍ଚ ପାଇଁ ୮୦ ନିୟୁତ ୟୁରୋ (୯୦ ନିୟୁତ ଡଲାରରୁ ଅଧିକ) ଆର୍ଥିକ ରାଶି ଅନ୍ତର୍ଭୁକ୍ତ ରହିଛି।
